EKMÀRYEWYANA KOMO HYAKA ÀMENHOSAHO ON HA.
1
Ehonomnà me xaxa Khoryenkom muru yehtxoho yokarymatxhàrà on ha.
Tàrwonà yonytxamohsoy hatà, Khoryenkomo, amnyehra, khoryen heno komo wya, Ekmàryewyana heno komo wya. Thenyehra rma haxa nenytxamohsekon hatà, àwyanye. Anar me rha nenytxamohsekon hatà, àwyanye. Tàrwonà yokarymanye ro heno komo wya ryhe nenytxamohsekon hatà. Nyamoro heno rma nekarymetxkon hatà, toto heno komo wya, khoryen heno komo wya. Umuru haxa ryhe nekarymaye, kàwyanye, amnyeno rma komo wya. Tàrwonà yokarymaxe buru nyakye, Khoryenkomo, kàhyakanye.
Onà wyaro kanyenhàr me nehxakonà, Khoryenkomo, buru wya. Rokatxho yoh me keryaha hampànà, omeroron kom yoh me mak ha, kanyenhàr me nehxakonà, buru wya. Noro rma yukryeka yakàhtoye. Omeroro nakàhtotàhkaye, tàyàm yano me. Ehonomnà me xaxa Khoryenkom yehtxoho yonyhehe, umuru, ehonomnà me rma rha tesnàr ke. Tàyàm yonyhorunu wyaro rma rha naha, umuru yonyhorunu. Àme rye rma haxa natxhe, tàyàm yakoro. Ohxe roro yukryeka yeryaha. Tàrwon ke ohxe roro neryaha, ehonomnà me xaxa tesnàr ke. Noro rma wayehye, tàwya konyhoryetxho menye, kanhànàthàyamo yowtoho me. Twayhàtxhe rma, kahe yaka toye. Neryewtaye, Khoryenkom hanaka, ehonomnà xaxa hanaka. Neryewtaye, howehehra.
Khoryenkom hanaka eryewtaxaho rma, kahe yawon kom yoho rma haxa nay hamà. Nyamoro rma, ranoto komo omnyamo katxho me natxhe. Noro ryhe, romuru omoro katxho me haxa naha. Nyamoro yoho rma haxa nay hamà, noro ha.
Kahe yawon kom yoho rma haxa Txesus yehtxoho yokarymatxhàrà on ha.
Onà wyaro nkay hatà, Khoryenkomo. Romuru omoro, kay hatà. Romuru ro me haxa mpànà khutwamohson ha, àkehe hampànà, ohoko, kay hatà. Àro wyaro kahra mak nexey hamà, kahe yawon komo wya, tanoto komo wya. Onà wyaro nkay xarha tà. Noro yàm me wehxaha. Noro rma, romuru me naha, kay hatà. Wahoto wyaro ehonomnà me buru yonyakon hamà, Khoryenkomo. Noro rma nyakye, yukryeka hona. Tàwya ànyaknyetoko rma, onà wyaro nkay xarha tà, kahe yawon komo wya. Ranoto komo y, ehonomnà me xaxa manaha katxoko, mosonà wya, kay hatà.
Onà wyaro nmenhohoy hatà, Khoryenkomo, kahe yawon kom hoko.
Khoryenkom yanoto me natxow hatà, kahe yawon komo. Noro wya tànyaketxhenye rma, karyhe tetxow hatà. Atxowowo wyaro karyhe tetxow hatà. Weheto wyaro xarha natxow hatà.
Àro wyaro rma nmenhohoy hatà, kahe yawon kom hoko, tanoto kom hoko. Buru hok haxa ryhe, onà wyaro nmenhohoy hatà. Amna horyenà y, toto komo kayaryetà ro me manay hatà, meya roro hatà. Yaworon me xaxa mosonyhen hatà, omryenon komo wya.
Yaworon me rma rha toto komo yesnàr xe rma haxa manay hatà. Atxke esnàr komo xehra ro mak manay hatà. Àro ke teryehoryemà ro me oyeryan hatà, Khoryenkomo. Ohoryenà ro rma noro ha. Teryehorye rma rha natxow hatà, omryenon komo, oyowtà komo. Omoro haxa ryhe, nyamoro yoho rma haxa teryehorye roro manay hatà.
Àro wyaro rma nmenhohoy hatà, Khoryenkomo, buru hoko. 10 Onà wyaro xarha nmenhohoy hatà, noro hoko rma rha.
Amna yohà y, amnyehra yukryeka makàhtoy hatà. Kahe xarha makàhtoy hatà.
11 Nosomtatken hatà, yukryeka heno, kahe heno hatà. Omoro haxa ryhe, osomtatkahra ro mak manay hatà. Amnye, amnyehranotho wyaro harha nay hatà, yukryeka heno, kahe heno xarha. Womutho amnyehranotho wyaro nay hatà.
12 Amnyehranotho me ehtoko, womutho amna namomyan hamà, amna wya arymatxho me. Àro wyaro rma rha marymen hatà, yukryeka heno, kahe heno xarha. Amnyehranotho womutho wyaro ehxera harha nay hatà. Omoro haxa ryhe, tehxemà roro me manay hatà. Atàhpàra ro mak manay hatà.
Àro wyaro rma nmenhohoy hatà, Khoryenkomo, buru hoko. 13 Onà wyaro xarha nmenhohoy hatà, noro hoko rma rha. Onà wyaro àkehe hampànà, owya. Ehonomnà me xaxa eryewtako, rohanaka, àkehe hampànà, owya. Howehehra eryewtako, àkehe hampànà. Tan oyehtoko rma haka, onà wyaro kany me axanhàn komo weryaha hampànà. Ehonomnà me xaxa manaha kany me weryatxhe hampànà, ohoko, àkehe hampànà, owya.
Àro wyaro rma nmenhohoy hatà. Àro wyaro rma nkay hatà, Khoryenkomo, buru wya. Àro wyaro kahra mak nexey hamà, kahe yawon komo wya, tanoto komo wya. Nyamoro yoho rma haxa nay hamà, Khoryenkom muru.
14 Àsok hana natxow ha, kahe yawon kom ha. Ekato me natxow hamà. Khoryenkom yanoto me natxow hamà. Noro ryhe nànyakyatxhe, àwyanye tàmryenon komo yakoronomatxho me. Khoryenkomo nenyhoryenàr komo rma yakoronometxhe, kahe yawon komo.