1 Te phoeiah Job loh a doo tih, 2 “Te bang ol te muep ka yaak coeng. Nangmih boeih kah a hloep khaw thakthaenah ni. 3 Khohli ol te a bawtnah om a? Balae tih na doo hamla nang n'huek. 4 Kai khaw nang bangla ka thui thai ta. Na hinglu te ka hinglu yueng la om koinih olthui neh nangmih te kan sun vetih ka lu lamloh nangmih taengah ka hinghuen van ni. 5 Ka ka neh nangmih te kan duel lah vetih ka hmuilai kah thaphohnah loh n'hoeptlang mako. 6 Ka thui akhaw ka thakkhoeihnah a rhoei moenih. Ka paa koinih kai lamloh metlam a caeh eh? 7 Ka hlangboel boeih khaw na pong uh tih ka ngak ngawn coeng. 8 Kai nan tonga sak khaw laipai la om coeng. Ka laithae khaw ka taengah pai sak tih ka mikhmuh ah n'doo coeng. 9 A thintoek loh a baeh tih kai soah a konaeh. Kai taengah a no te a tah coeng. Ka rhal loh kai soah a mik a huel. 10 A ka neh kai n'ang thil uh. Kokhahnah neh ka kam han taam uh tih kai taengah huek ha cu uh. 11 Pathen loh kai he hlang thae taengla n'det tih halang kut dongla kai m'muek. 12 Thayoeituipan la ka om vaengah kai m'phae. Ka rhawn ah n'khak tih kai he n'taekyak. Te dongah kai he amah ham kutnoek la m'pai sak coeng. 13 Ka taengah a lithen rhoek loh m'vael uh tih ka kuel a khoh. Lungma a ti kolla diklai dongah ka hmuet phawt coeng. 14 A puut hman ah a puut loh kai m'va. Hlangrhalh bangla kai taengah cu. 15 Ka vin soah tlamhni ka hui tih ka ki khaw laipi neh ka poelyoe coeng. 16 Ka maelhmai he rhahnah neh nok la nok uh tih ka mikkhu khaw nut coeng. 17 Te cakhaw boethae ka kut ah kuthlahnah om pawt tih ka thangthuinah khaw cil. 18 Diklai nang loh ka thii he vuei boeh. Ka pang ol he khaw hmuen om boel saeh. 19 Job 19. 25. Vaan ah pataeng kai kah laipai om tih ka hlangcal khaw hmuensang ah om coeng ke. 20 Ka hui khaw Pathen taengah kai kah hmuiyoi la om tih ka mik khaw pha coeng. 21 Hlang capa tah hlang ham neh a hui ham Pathen taengah a thui ta. 22 Kum a tarhing ah ha pawk vetih ka mael voel mueh caehlong ah ka cet pawn ni.