1 Mamih taengah aka soep tangtae hno kah cilol te muep a thuep tih boelrhai vaengah, 2 oltak kah tueihyoeih la aka om rhoek neh a tongcuek lamloh loh aka hmu rhep rhoek loh mamih taengah m'paek uh vanbangla, 3 kai khaw khaeh khaeh boeih ka thuep koep tih hlangcong Theophilu nang taengah daek ham tluep ka poek. 4 Te daengah ni hiluepnah ol loh n'thuituen te khaw na ming eh.

5 1 Kho 24. 10. Judea manghai Herod tue vaeng ah, Abijah rhoihui khosoih pakhat, a ming ah Zekhariah te om tih Elizabeth aka ming nah Aaron canu te a yuu nah. 6 Pathen hmaiah a dueng la bok om rhoi. Boeipa kah rhilam neh olpaek cungkuem dongah cuemthuek la pongpa rhoi. 7 Tedae Elizabeth tah cakol la om tih camoe a om kolla a kum khaw patong la bok om rhoi coeng. 8 Pathen hmaiah a khosoih vaengkah bangla anih rhoihui te aitlaeng loh a pha. 9 Khosoih kah khosing bangla, Boeipa kah bawkim khuiah kun tih hmueihphum ham a yo. 10 Bo-ul tue vaengah pilnam khuikah aka om rhaengpuei boeih khaw poeng ah thangthui uh. 11 Te vaengah Boeipa kah puencawn tah a taengah a phoe pah tih bo-ul hmueihtuk kah bantang ah pai. 12 Zekhariah loh a thuen doela a sawt dongah rhihnah loh anih a tlak thil. 13 Tedae anih te puencawn pakhat loh, “Zekhariah rhih boeh, nang kah rhenbihnah te a hnatun coeng dongah na yuu Elizabeth loh nang ham capa pakhat han cun vetih, a ming te Johan la na khue ni. 14 Nang ham omngaihnah neh kohoenah la om vetih anih kah rhuirhong dongah boeih omngaih uh ni. 15 Lam 6. 3. Boeipa hmaiah a len la om vetih, misurtui neh yu te o loengloeng mahpawh. A manu bung khuiah a om vaengah Mueihla Cim neh baetawt ni. 16 Israel ca rhoek te a Boeipa Pathen taengla muep a mael puei ni. 17 Anih tah a hmaiah Elijah kah mueihla neh thaomnah dongah lamhma ni. Pa rhoek kah thinko te ca rhoek taengla, lokhak rhoek te aka dueng lungcueinah dongla mael ni. Rhoekbah tangtae pilnam tah Boeipa ham a hmoel ni,” a ti nah.

18 Te phoeiah Zekhariah loh puencawn taengah, “Hekah he Ba nen lae ka ming eh? Kai tah patong la ka om coeng tih ka yuu khaw a kum te ham coeng,” a ti nah.

19 Dan 8. 16; 9. 21. Te dongah puencawn loh anih te a doo tih, “Kai tah Pathen hmaiah aka pai Gabriel ni, nang taengah he rhoek he phong ham neh thui ham n'tueih. 20 Tedae kai ol te na tangnah pawt dongah he he a soep nah khohnin duela olmueh la na om vetih na cal thai mahpawh ne. Amah tue ah ka ol te soep bit ni,” a ti nah.

21 Te vaengah Zekhariah te aka lamso pilnam a om dongah bawkim khuiah a di te a ngaihmang uh. 22 Ha thoeng vaengah tah amih te voek thai voel pawh. Te dongah bawkim khuiah a mangthui a hmuh coeng tila a ming uh. Te dongah Zekhriah loh amih taengah a lu a thuk tih olmueh la phat om. 23 Amah kah thothueng khohnin te a cup la a om phoeiah tah amah im la cet. 24 Te khohnin phoeiah a yuu Elizabeth te vawn tih amah khaw hla nga thuh uh. 25 “Boeipa loh kai ham hnin at neh a saii tangloeng coeng, te nen ni hlang lakliah kai dogkah hnaelnah te khoe hamla n'hip,” a ti.

26 Hla rhuk dongah Pathen taeng lamkah puencawn Gabriel te Galilee khopuei, a ming ah Nazareth la a tueih. 27 Mat 1. 18. David imkhui kah hlang pakhat, a ming ah Joseph ham te oila a bae pah. Oila ming tah Mary ni. 28 Te phoeiah huta taengla kun tih, “A lungvat tangtae aw, omngaih lah, Boeipa tah nang taengah om pai,” a ti nah.

29 Tedae Mary te tekah olka dongah konglong ngaihit la om tih te toidalnah loh metla a om eh tila a poek. 30 Puencawn loh anih te, “Mary rhih boeh, Pathen taengkah lungvatnah na dang coeng te. 31 Mat 1. 21. Te dongah bungvawn neh na yom tih capa na cun vaengah a ming te Jesuh sui ne. 32 2 Sam 7. 12,13,16; Isa 9. 6. Anih tah tanglue la om vetih Khohni capa tila a khue ni. Boeipa Pathen loh anih te a napa David kah ngolkhoel te a paek ni. 33 Jakob im ah kumhal due manghai pawn ni. A ram te khaw bawt ti om mahpawh,” a ti nah.

34 Te vaengah Mary loh puencawn taengah, “Hekah he metlam a om eh? tongpa khaw ka ming moenih,” a ti nah.

35 Te dongah anih te puencawn loh a doo tih, “Mueihla Cim loh nang n'thoeng thil vetih, Khohni kah thaomnah te nang m'muek sak ni. Te dongah na cun te aka cim Pathen Capa tila a khue bal ni. 36 Te phoeiah namah huiko Elizabeth te a patong soiah, camoe a yom van coeng ke. Te dongah cakol la a khue te tahae ah hla rhuk lo coeng. 37 Suen 18. 14. Pathen kah olka boeih long tah a tloel nah moenih,” a ti nah.

38 Te dongah Mary loh, “Boeipa kah salnu he, na olka bangla kai taengah om saeh,” a ti nah.

Te phoeiah puencawn tah anih taeng lamloh nong.

39 Mary tah tekah khohnin ah thoo tih tlang kah Judah kho ah thahluenah neh cet. 40 Zekhariah im khuiah kun tih Elizabeth te a voek. 41 Mary kah toidalnah te Elizabeth loh a yaak vaengah a bung khuikah cahni te soipet tih Elizabeth khaw Mueihla Cim neh baetawt. 42 Te vaengah tamlung neh pang khungdaeng tih, “Nang tah huta rhoek lakliah na yoethen coeng tih, nang bung kah a thaih te a yoethen coeng. 43 Kai aih he metlam nim, ka boeipa kah a manu kai taengla ha pawk tarha he? 44 Nang kah toidalnah ol te ka hna khuiah a kun vaengah tah, ka bung khuikah cahni loh kohoenah neh soipet he. 45 Te dongah Boeipa loh a thui te hmakhahnah om ni tila aka tangnah tah a yoethen,” a ti nah.

46 Mary long khaw, “Boeipa te ka hinglu loh a oep.

47 Ka mueihla tah ka khangkung Pathen dongah hlampan coeng.

48 1 Sam 1. 11. A salnu mathoe he a paelki thil coeng dongah tahae lamkah tah cadil boeih loh kai ng'uem uh pawn ni.

49 Kai taengah thaom tloe la a saii dongah, a ming tah cim pai saeh.

50 A rhennah tah amah aka rhih rhoek kah cadil cahma ham ni.

51 A ban neh a thaomnah a saii, a thinko kopoek ah buhueng aka pom te a taekyak.

52 Job 5. 11; 12. 19. Mangpa rhoek a ngolkhoel lamloh a hlak tih, tlayae rhoek te a pomsang.

53 Bungpong rhoek te hno then neh a hah sak tih, khuehtawn rhoek a tlongtlai la a tueih.

54 A rhennah te poek sak hamla a ca Israel te a bom‍ . 55 Suen 17. 7. 1 Sam 2. 1-10. A pa rhoek taengah a thui bangla, Abraham neh a tiingan taengah kumhal duela a khueh,” a ti.

56 Mary te Elizabeth neh hla thum tluk hmaih a naeh phoeiah amah im la bal.

57 Elizabeth te a om tue a pha coeng tih capa a cun. 58 Boeipa loh a rhennah te anih taengah a khueh tih, a oep te a huiko neh imben loh a yaak vaengah anih te a omngaih puei uh. 59 Tho 12. 3. Khohnin hnin rhet a lo vaengah camoe te yahvinrhet ham cet uh. Te vaengah anih te a napa ming Zekhariah la a khue uh. 60 Tedae a manu loh a doo tih, “Moenih, Johan la a khue ni,” a ti nah.

61 Te vaengah anih taengah, “Hekah ming la a khue te na cako khuiah a om pawt ah,” a ti nauh. 62 Camoe metla khue a ngaih poek tila a napa te a yavaih uh. 63 Te vaengah cabael a hoe tih a daek hatah, “A ming tah Johan ni,” a ti tih boeih a ngaihmang uh. 64 Te vaengah a hmui, a lai te khaw pahoi a khui pah dongah cal tih Pathen te a uem. 65 Te vaengah amih tolvael rhoek boeih te rhihnah loh a pai thil. Te dongah hekah olka loh Judah tlang tom te boeih a ngae uh. 66 Aka ya boeih loh a thinko khuiah a dueh uh tih, “Hekah camoe he metlam nim a om ve?” a ti uh.

Tedae Boeipa kah kut loh anih te a om puei.

67 A napa Zekhariah tah Mueihla Cim neh baetawt. 68 Te dongah a olphong neh, “A pilnam te a hip tih tlannah a saii dongah, Israel Pathen Boeipa tah uemom pai saeh.

69 A taengom David im khuiah mamih ham khangnah ki a thoh sak.

70 Khosuen lamloh a tonghma ciim rhoek kah ka dongah a thui vanbangla,

71 Mamih kah rhal rhoek neh mamih aka hmuhuet rhoek boeih kut lamkah khangnah,

72 a pa rhoek taengah rhennah tueng sak ham neh a paipi ciim te poek sak ham,

73 a pa Abraham taengah olhlo neh a toemngam te mamih paek ham,

74 amah taengah thothueng hamla rhal kut lamloh hoel n'hlawt coeng.

75 Mamih kah khohnin rhoek boeih te amah hmaiah duengnah neh cimcaihnah ham ni.

76 Mal 3.1. Te phoeiah, camoe, nang tah Khohni tonghma la n'khue vetih a longpuei rhoekbah ham Boeipa hmaiah na lamhma ni. 77 Amih kah tholh khodawkngainah rhangneh a pilnam taengah khangnah mingnah a paek ni. 78 Mamih Pathen kah rhehnah om. Te nen te a sang lamkah khothoeng loh mamih n'hip.

79 Isa 9. 1. Dueknah mueihlip neh yinnah khuiah aka ngol rhoek ham te a tue vetih, mamih kah kho te ngaimongnah longpuei la hoihaeng ham ni,” a ti.

80 Camoe tah rhoeng tih mueihla ah khaw rhaang. Te dongah Israel taengah a phoenah khohnin duela khosoek ah om.