24
Bawkim Pocini
1 Jesuh tah bawkim lamloh khoe uh tih Cet. Te vaengah bawkim kah hlinsainah te tueng ham a hnukbang rhoek loh a paan uh . 2 Tedae amih te a doo tih, “Boeih na hmuh uh moenih a he? Nangmih taengah rhep kan thui, phil ham pawt koi lungto sokah lungto pataeng hmaai loeng loeng mahpawh he,” a ti nah .
Diklai Tue Bawtnah
3 Olives tlang ah Jesuh amah bueng a ngol vaengah hnukbang rhoek loh a paan uh tih, “Na lonah neh kumhal kah a bawtnah miknoek tah metlam lae? He rhoek he me vaengah lae a om eh? Kaimih taengah thui lah?” a ti na uh.
4 Jesuh loh amih te a doo tih, “Khat khat loh nangmih te n'rhaithi pawt ham dawn uh. 5 Kai ming neh muep ha pawk uh ni. 'Kai tah Khrih ni,’ a ti uh vetih muep a rhaithi uh ni. 6 Tedae caem neh caem kah puenpa na yaak uh tom coeng. Na hmuh uh vaengah let uh boeh. Te khaw a om ham a kuek ngawn dae a bawtnah tah om hlan. 7 Namtom loh namtom, ram loh ram a tlai thil ni.Te phoeiah khokha om vetih hmuen tom ah lingluei hinghuen ni. 8 Tedae he rhoek boeih he bungtloh a tongnah ni.
Hnaemtaeknah Ha Pai Ni
9 Mat 10. 22.Te phoeiah nangmih te phacipphabaem dongah m'voeih uh vetih nangmih te n'ngawn uh ni. Kai ming kongah namtom boeih kah a hmuhuet la na om uh ni. 10 Te vaengah a cungkuem te a khah uh vetih pakhat te a voeih uh phoeiah pakhat te a thiinah uh ni. 11 Te phoeiah laithae tonghma muep thoo vetih hlang muep a rhaithi uh ni. 12 Olaeknah te ping vetih lungnah te muep daeh ni. 13 Mat 10. 22.Tedae a bawt duela aka ueh te tah daem ni. 14 Te phoeiah ram kah olthangthen he namtom boeih taengah laipai la om sak ham lunglai pum boeih ah a hoe ni.Te daengah ni a bawtnah te ha pawk pueng eh.
Rhainah A Len Koek
15 Dan 9. 27; 11. 31; 12. 11.Te dongah tonghma Daniel loh hmuen cim ah pai tih mitmoengnah neh tueilaehnah a thui te na hmuh uh, aka tae loh yakming saeh. 16 Te vaengah Judah kah rhoek loh tlang la rhaelrham uh saeh. 17 Luk 17. 31.Imphu sokah loh a im kah te puen hamla suntla boel saeh. 18 Lohma kah loh a himbai khuen ham a hnukla bal boel saeh. 19 Tedae te khohnin ah bungvawn neh cacun la aka om rhoek tah lungma. 20 Tedae Nangmih kah rhaelrhamnah tah sikca neh Sabbath ah a om pawt ham thangthui uh. 21 Dan 12. 1; Olp 7. 14.Te vaengah phacipphabaem muep om ni. Te bang te Diklai tongcuek lamkah loh tahae duela om noek pawt tih ka om bal eh a ti tlaih voel moenih. 22 Te khohnin te boem pawt koinih pumsa boeih tah daem mai mahpawh. Tedae a coelh rhoek ham te khohnin a boem pah ni. 23 Te vaengah pakhat loh nangmih taengah, 'Hela khrih he, kela ke,’ a ti atah tangnah boeh. 24 Laithae khrih neh laithae tonghma rhoek tah thoo uh ni. Coengthai koinih a coelh rhoek pataeng rhaithi ham miknoek a len neh khobae rhambae te a khueh uh ni. 25 Nangmih taengah kan thui coeng he ne. 26 Luk 17. 23,24.Te dongah nangmih te, 'Khosoek ah om ke,’ a ti uh atah cet uh boeh. 'Imkhui ah la ke,’ a ti uh akhaw tangnah uh boeh. 27 Khophaa loh khothoeng lamkah cet tih khotlak due a phaa bangla hlang capa kah a lonah khaw om van ni. 28 Luk 17. 37.Rhok loh a om nah te langta loh hnap a boo ni.
Hlang Capa Ha Pawk Ni
29 Isa 13. 10; Joe 2. 10,31; 3. 15; Olp 6. 12; Isa 13. 10; Eze 32. 7; Joe 2. 10; 3. 15; Isa 34. 4; Olp 6. 13.Tekah phacipphabaem khohnin phoeiah khomik loh tlek hmuep vetih hla loh a aa pae mahpawh. Aisi tah vaan lamkah loh cuhu vetih vaan kah thaomnah loh hinghoek uh ni. 30 Dan 7. 13; Zek 12. 10-14; Olp 1. 7.Te vaengah Hlang Capa kah miknoek tah vaan ah tueng ni. Diklai koca boeih loh a rhaengae uh vetih, hlang capa loh vaan kah khomai dongah thaomnah, a len la thangpomnah neh ha pawk te a hmuh uh ni. 31 Amah kah puencawn rhoek te olueng ol aka cai neh a tueih vetih a coelh hlang rhoek te dilaikil pali lamkah, vaan ak a soi lamloh a soi duela tingtun uh ni.
Thaibu Kung Nuettahnah
32 Thaibu lamkah nuettahnah te ming uh. A hlaeng loh suepluep la om tih a hnah a boe vaengah khohal tom coeng tila na ming uh. 33 Nangmih khaw he rhoek he boeih na hmuh uh vaengah tah thohka ah ha pawk tom coeng tila ming uh. 34 Nangmih taengah rhep kan thui, he rhoek boeih loh a thoeng hlan atah he cadil he khum loeng loeng mahpawh. 35 Vaan neh diklai tah khumpael ni tedae ka ol he ta khumpael rhoerhoe mahpawh.
A Tue Ming Uh Mahpawh
36 Tekah a tue neh khohnin te a Pa bueng pawt atah Capa long khaw, vaan kah puencawn rhoek long khaw ming pawh. 37 Sue 6. 5-8.Noah tue kah bangla Hlang Capa kah ha lonah khaw om tangloeng van ni. 38 Tevaeng tue kah rhoek tah tuilii hlan lamkah loh Noah lawng khuila a kun khohnin duela a caak uh, a ok uh, yuuloh vasak, rhaihlan neh om uh. 39 Sue 7. 6-24.Tuilii lo tih boeih a khuen duela ming uh pawh. Hlang Capa kah a lonah khaw om van tangloeng ni. 40 Te vaengah lohma ah hlang panit om ni. Pakhat te a khuen vetih pakhat a hlah ni. 41 Phaklung neh aka kuelh rhoi te pakhat a khuen vetih pakhat a paih ni. 42 Te dongah hak uh laeh, na Boeipa ha pawk tue te na ming uh moenih. 43 Luk 12. 39,40.Imkung loh hlanghuen ha pawk tue te ming koinih hak vetih a im te muk sak mahpawh tite na ming uh. 44 Te dongah nangmih khaw sikim la om uh. Hlang capa tah na poek uh pawt tue vaengah ha pawk ni.
Messiah kah Uepom Bibi
45 Te koinih uepom neh sal cueih la unim aka om? Anih te boeipa loh a imkhuikho ah a tuetang vaengah amih ham buh aka poep la a khueh. 46 A boei loh ha pawk vaengah a saii te a hmuh tangloeng atah sal te khaw a yoethen. 47 Nangmih taengah rhep ka thui, amah kah khuehtawn boeih soah anih te a om sak ni. 48 Tedae sal thae long tah a thinko khuiah, 'Ka boeipa tah di coeng,’ a ti.
49 Te dongah a sal puei rhoek te koe a boh. Aka rhui rhoek taengah a caak tih a ok van. 50 A lamso pawh khohnin neh a ming pawt tue vaengah ni boeipa loh sal te a paan eh. 51 Te vaengah anih te a tloek vetih a paihmuen te hlangthai palat rhoek taengla a khueh pah ni. Te rhoek ah rhah neh no rhuengnah ni a om eh.
24. 9 Mat 10. 22.
24. 13 Mat 10. 22.
24. 15 Dan 9. 27; 11. 31; 12. 11.
24. 17 Luk 17. 31.
24. 21 Dan 12. 1; Olp 7. 14.
24. 26 Luk 17. 23,24.
24. 28 Luk 17. 37.
24. 29 Isa 13. 10; Joe 2. 10,31; 3. 15; Olp 6. 12; Isa 13. 10; Eze 32. 7; Joe 2. 10; 3. 15; Isa 34. 4; Olp 6. 13.
24. 30 Dan 7. 13; Zek 12. 10-14; Olp 1. 7.
24. 37 Sue 6. 5-8.
24. 39 Sue 7. 6-24.
24. 43 Luk 12. 39,40.