1 Aw Pathen, ka thangthuinah he hnatun lamtah ka lungmacil te rhael boeh.

2 Kai taengah hnatung lamtah kai n'doo dae. Ka kohuetnah neh ka van tih ka pang ka ngawl.

3 Halang kah phaepnah hman ah thunkha kah ol loh kai sola boethae han sop uh tih thintoek neh kai taengah a konaeh uh.

4 Ka ko khuiah ka lungbuei loh phat tih dueknah mueirhih loh kai m'vuei khoep.

5 Kai taengah rhihnah neh thuennah halo tih, tuennah loh kai n'thing.

6 Te vaengah, “U long nim kai ham vahui bangla ka phae han khueh koinih ka ding vetih kho ka sak sue,” ka ti.

7 Yaoe A hla la ka cet sui tih, khosoek ah ka rhaehba mai lah sue. Selah

8 Kai taengkah khohli khui lamloh, hlipuei a tloh khui lamloh kuepkolnah la ka tawn uh sue.

9 Ka Boeipa aw amih ol te haeh saeh lamtah dolh saeh, khopuei ah kuthlahnah neh tuituknah ni ka hmuh.

10 Khoyin khothaih vongtung taengah vikvuek uh tih a ko khuiah boethae neh thakthaenah om.

11 Talnah loh a ko khuiah om tih, hnaephnapnah neh thailatnah loh toltung lamkah nong voelpawh.

12 Kai aka veet he ka thunkha moenih, anih koinih ka phueih pawn ni. Kai taengah aka pomsang uh te ka lunguet moenih. Te koinih anih taeng lamloh ka thuh tak ni.

13 Tedae ka boeihlum neh ka thanat la ka hmaiben hlanghing khaw namah ni.

14 Baecenol neh tun ka tui uh tih, rhoihui neh Pathen im la ka cet uh coeng.

15 Amih ko khuiah khaw, a lampahnah ah khaw thae uh. Te dongah amih te dueknah loh dueknah neh phae saeh lamtah, a hingnah te saelkhui la suntla uh saeh.

16 Pathen te kai loh ka khue tih BOEIPA loh kai n'khang.

17 Hlaem, mincang neh khothun ah ka lolmang tih ka ko vaengah ka ol han yaak.

18 Kai taengkah aka om rhoek he a yet dongah ka hinglu he caemrhal lamkah sading la n'lat.

19 Hlamat lamkah kho aka sa Pathen loh a yaak vetih amih te a phaep ni. Selah.

Amih taengah thovaelnah a om pawt bangla Pathen khaw rhih uh pawh.

20 A ngaimongnah taengah a kut a hlah tih, a paipi a poeih.

21 A ka te maehtha bangla hnal dae a lungbuei tah caemrhal la om. A olka te situi lakah yaai dae tumca a mukuh.

22 Na thinrhih te BOEIPA taengah hal lamtah amah loh nang n'cangbam bitni. Aka dueng te kumhal ah bung sak mahpawh.

23 Tedae Pathen nang loh pocinah rhom khuila amih te na hlak ni. Hlang thii aka ngaih neh hlangthai palat kah khohnin te paekboe pah pawtnim? Kai long tah nang dongah ka pangtung ni.