1 He phoeiah tah patuel imkhui kah a lu rhoek, amah koca tarhing ah, a yu rhoek khaw, a capa rhoek khaw, canu rhoek khaw, salnu salpa khaw, a rham sa khaw, caeh hamla a tueik. 2 Darius loh amih neh marhang caem thawngkhat a tueih pah dongah, amih khaw Jerusalem la, lumlaa neh, toembael neh, phavi neh sading la mael uh. 3 A huiko boeih khaw omngaihnah muep om. Te dongah amih neh a caeh ham khaw a saii pah.

4 He tah amah patuel imkhui ah amah koca, amah rhoihui la aka cet rhoek kah a ming ni. 5 Khosoih rhoek la, Aaron capa Phinehas cadil, Seraiah koca Jozadak capa Jeshua, Shaeltiel koca Zerubbabel capa Joakim, David imkhuikah khaw, Phares rhuirhong khaw, Judah koca khaw thum. 6 Anih long te Persian manghai hmaiah hlangcueih ol te, a manghainah a kum bae, a hlakhat nah, Nisan hla vaengah a thui.

7 He tah vangsawn lampah lamkah aka mael Judah rhoek ni. Amih te Babylon manghai Nebukhadnezzar loh Babylon la a khuen rhoek ni. 8 Amih he Jerusalem la aka mael rhoek te Judaea ah mah kho ah aka om khaw om. Amih tah amamih a lu la aka om rhoek, Zerubbale, Jeshua, Nehemiah, Sraiah, Resaih, Enenues, Mordekai, Beelsarus, Aspharasus, Reeliah, Rehum neh Baana ni.

9 Namtu neh a lu rhoek kah hlangmi he tah, Parosh cadil rhoek ah thawng hni yakhat neh sawmrhih panit lo. Sephatiah cadil rhoek ah yali sawmrhi panit lo uh. 10 Arah cadil rhoek te yarhih phoeiah sawmnga parhuk, 11 Pahath Moas cadil, Jeshua neh Joab cadil rhoek tah thawng hnih, ya rhet hlai ni. 12 Elam cadil rhoek te thawng khat yahnin sawmnga pali, Zattu cadil rhoek te thawngkhat yahnih sawmnga pali. Zattu cadil rhoek tah yako sawmli panga, Chorbe cadil rhoek tah yarhih panga. Bani cadil rhoek yarhuk sawmli parhet lo. 13 Bebai cadil rhoek te yarhuk pakul pathum, Azgad koca te thawng khat ya thum pakul panit. 14 Adonidam cadil te yarhuk sawmrhuk parhih. Bigvai cadil te thawnghnih sawmrhuk parhuk, Adin cadil te yali sawmli pali lo. 15 Ater cadil ah a ming lamtah Hezekiah he sawmko panit, Kilan neh Azeta he sawmrhuk parhih, Azaru cadil rhoek te yali sawmthum panit om. 16 Annias cadil rhoek te ya pakhat lo tih Arom cadil rhoek khaw om pueng. Bezai cadil rhoek yathum sawmthum pathum, Arsiphurith cadil rhoek te ya hlainit om.

17 Baiterus cadil te thawngthum panga, Bethlomon cadil te ya pakul pathum lo. 18 Nethopha lamkah rhoek te sawmnga panga, Anathoh lamkah rhoek te ya sawmnga parhet, Bethasmoth lamkah rhoe te sawmli panit lo. 19 Kiritatharim lamkah rhoek te pakuk panga, Cephirah neh Beeroth lamkah te yarhih sawmli pathum lo. 20 Chadiasons neh Ammidans rhoek te yali pakul panit, Kiram neh Geba lamkah rhoek te, yarhuk pakul pakhat lo. 21 Makalon lamkah rhoek te ya pakul panit lo. Betolio lamkah rhoek te sawmnga panit lo. Niphish cadil rhoek te ya sawmnga parhuk lo. 22 Calamolalus neh Ono kah cadil rhoek te ya rhih pakul panga. Jerechus kah cadil rhoek te yathum sawmli panga. 23 Senaah cadil rhoek te thawng thum yathum sawm thum lo.

24 Khosoih rhoek la, Jeshua koca Jedaiah cadil rhoek, Anasib cadil rhoek te yako sawmrhih panit. Immer cadil rhoek te thawngkhat sawmnga panit lo. 25 Pashur cadil rhoek te thawng yahnih sawmli parhih. Kharme cadil rhoek te thawng khat hlai rhih lo.

26 Levi rhoek la, Jehushua neh Kadmeiel ne Baanas, Sudias koca rhoek te sawmrhih pali lo uh. 27 Bawkim kah lasakung rhoek la, Asaph koca rhoek te ya pakul parhet lo uh. 28 Thoka aka tawt la Shallum cadil rhoek, Ater cadil rhoek, Talmon cadil rhoek, Akkub koca rhoek te, Hatita ca dil rhoek, Shobai cadil rhoek te a pum la ya sawmthum pako boeih lo uh.

29 Bawkim kah tueihyoeih rhoek la Esau cadil rhoek, Hasupha cadil roek, Tabbaoh cadil rhoek, Keros cadil rhoek, Sua cadil rhoek, Padon cadil rhoek, Lebanah cadil rhoek, Hagabah cadil rhoek, 30 Akkub cadil rhoek, Uthai cadil rhoek, Ketab cadil rhoek, Hagab cadil rhoek, Subai cadil rhoek, Hana cadil rhoek, Cathua cadil rhoek, Geddur cadil rhoek, 31 Jairus cadil rhoek, Daisan cadil rhoek, Noeba cadil rhoek, Khezib cadil rhoek, Gazera cadil rhoek, Uzza cadil rhoek, Phinoe cadil rhoek, Hasrah cadil rhoek, Basthai cadil rhoek, Asnah cadil rhoek, Maani cadil rhoek, Nephism cadil rhoek, Akuph cadil rhoek, Hakupha cadil rhoek, Asur cadil rhoek, Pharakim cadil rhoek, Bazluth cadil rhoek, 32 Mehida cadil rhoek, Chutha cadil rhoek, Charea cadil rhoek, Barkos cadil rhoek, Serar cadil rhoek, Temah cadil rhoek, Neziah cadil rhoek, Hatipha cadil rhoek.

33 Solomon tueihyoeih kah cadil rhoek, Assphioth kah cadil rhoek, Peruda kah cadil rhoek, Jaalah kah cadil rhoek, Lozon kah cadil rhoek, Isdael kah cadil rhoek, Shephatiah kah cadil rhoek, 34 Agia kah cadil rhoek, Pokhereth-hazzebaim kah cadil rhoek, Sorothies kah cadil rhoek, Masiah kah cadil rhoek, Gas kah cadil rhoek, Addud kah cadil rhoek, Subas kah cadil rhoek, Apherra kah cadil rhoek, Barodis kah cadil rhoek, Shaphat kah cadil rhoek, Allon kah cadil rhoek.

35 Bawkim kah tueihyoeih rhoek neh Solomon kah tueihyoeih rhoek he a pum la yathum sawmrhih panit lo uh.

36 A dangkah rhoek teah Cherub, Addan neh Immer kah mawtnah hmuiah Telmelah neh Telharsha lamkah aka mael rhoek ni. 37 Amih kah a pacut imkhui neh a rhuirhong thuep thai pawt cakhaw amih Israel khui kah rhoek ni. Tobiah koca Delaiah kah cadil rhoek, Nekoda kah cadil rhoek he yarhuk sawmnga panit lo uh.

38 A dangkah rhoek tah khosoih la a poek ngawn dae khosoih la ming rhep ana om pawh. Habiah cadil, Hakkoz cadil rhoek, Jaddus kah cadil rhoek, (Juaddus long he a Agia a yunah tih canu pakhat a khueh. Anih te Barzillai a ming nah. 39 Cabu khuiah anih ming a khe vaengah hekah hlang rhoek he a ming rhawp tueng pawh. Amih khosoih bi lamloh vik a hoep coeng. 40 Nehemiah neh Attharias long tah amih te Urim neh Thummim aka vah khosoihham a thoeng hang hil tah amih te hnocim ben sak boeh a ti nah.

41 Israel ca kum hlainit kah a so hang boeih tah salnu salpa rhoek thui mueh ah thawng sawmli panit phoeiah yathum sawm rhuk lo uh. 42 Amih kah huta tongpa tueihyoeih rhoek tetah thawng rhih yathum sawmthum pathih lo uh. Lasakung neh toembael aka tum te ya hnin sawmli panga lo uh. 43 Kalauk yali sawmthum panga, marhang thawngrhih sawmthum parhuk, muli-marhang yahnih sawmli panga, laak thawng nga yanga pakul panga lo uh.

44 Imkhui kah a lu rhoek hlangvang tah Jerusalem kah Pathen Bawkim la cet uh tih, a coengnah dongkah a then koek neh Bawkim te tlaih vong ham la, 45 bibinah hamla hmuencin kah thakvoh dongah sui minas thawngkhat, cak minas thawngnga, khosoih kah hnicu yakhat te paek hamla ol a hlo uh.

46 Khosoih rhoek khaw, Levi rhoek khaw, pilnam hlangvang rhoek khaw Jerusalem neh a khaepdan kah kho a sak uh. Te vaengah bawkim laasakung rhoek khaw, thokatawt rhoek khaw, Israel boeih tah amah im lo neh om uh.

47 A hla rhih dongah la a pha vaengah tah Israel ca rhoek te amah im ah boeih om uh coeng. Amih te khothoeng vongka hmaikah toltung ah poeknah pakhat neh tingtun uh. 48 Te vaengah Jozadak capa Jeshua neh a khosoih puei rhoek khaw, Shaeltiel capa Zerubbabel neh a huiko khaw a hmuen a loh tih, 49 Pathen kah Moses cabu dongkah uentonah tarhing la a soah hmaihlutnah hmueih phum hamla a rhoekbah uh. 50 Khohmuen pilnam khuikah hlangvang rhoek khaw amih taengla kibaeng uh. Te hmuen kah hmueihtuk khawa phae uh. Khohmuen pilnam te amih taengah muen tih amih tlakah khaw tlung uh. A tuetang a thuem vaengah hmueih te a nawn uh tih hlaem mincang Boeipa taengah hmueih a phum uh. 51 Olkhueng dongkah olpaek bangla pohlip khotue khaw a tuem uh tih, hnin takuem a thuem la hmueih a nawn uh. 52 Te vaengah nawnnah khaw, Sabbath kah hmueih khaw, hlasae neh khotue a hoep boeih khaw phat a khueh uh. 53 Te vaengah Pathen bawkim tah sa uh hlang dae, hlang boeih loh hla sae lamloh a hla rhih dong hil ah, Pathen taengla hmueih nawn ham ol boeih a hlo uh.

54 Kutthai neh imkhoeng rhoek te tangka khaw, caak ok khaw a paek uh. 55 Persian manghai Cyrus kah oltloeknah a daek pah vanbangla Lebanon lamkah lamphai thing, Joppa tuikaengah paan la a khueh uh te phueih hamla Sidonian neh Tyrian rhoek taengah leng a tueih uh.

56 A kum bae nah, a hla bae dongah taih Jerusalem kah Pathen bawkim la cet uh tih, Shaeltiel capa Zerubbabel khaw, Jozadak capa Jeshua long khaw a tong uh. Te vaengah amah huiko khaw, levi khosoih rhoek khaw, vangsawn lamloh Jerusalem la aka mael rhoek khaw boeih tun uh. 57 Te dongah Juaea neh Jerusalem a pha kah a kum bae, a hla bae dongkah hla sae vaengah tah Pathen bawkim kah khoengim te a up uh. 58 A kum la kum kul neh a so hang Levi koca boeih te tah bibi a hutnah hamla a tuek uh. Te vaengah Jeshua te khaw, anih koca rhoek khaw, a huiko rhoek khaw, a manuca Kamidl neh khaw, Jeshua Emadabun koca rhoek khaw, Iliadun capa Joda koca rhoek khaw, a ca rhoek neh a hui ko khaw, Leivi boeih khaw, thoo uh tih poeknah pakhat neh Pathen im kah bibi te a cuuk thil uh.

Imsakung rhoek loh Boeipa kah bawkim te a sak uh tangloeng. 59 Te vaengah ah khosoih rhoek te amamih kah pueinak neh, Asaph koca Levi rhoek te toembael neh, olueng neh, tlaklak neh rhongpai bangla pai uh. 60 Israel manghai David kah uentonah bangla Boeipa te a koeh uh tih a uem uh. 61 Laa a sak uh tih Boeipa taengah uemonah a paek uh. “A boethen neh a thangpomnah he tah Israel boeih soah a yoeyah la a om pai dongah ni,” 62 Te vaengah pilnam boeih loh olueng te a tueng uh tih tamlung neh a len la pang uh. Boeipa im te a thoh uh coeng dognah Boeipa te a uem uh. 63 Levi khosoih hlangvang neh pacut im kah a lu rhoek khaw, lamhma kah im aka hmuh hlang rhuem rhoek khaw, he kah imsak taengla a pang neh a len la rhap tih a paan uh. 64 Te vaengah olueng neh omngaih ol neh muep cet uh. 65 Pilnam kah a rhah ol kongah tah pilnam loh olueng ol khaw ya thai voel pawh. Hlangping loh olueng neh a len la a ueng dongah a ol te a hla lamloh khaw a yaak uh.

66 Te te Judah neh Bejamin koca kah a thunkha rhoek long khaw a yaak uh dongah, olueng ol te metlam a om co tila ming ham a paan uh. 67 Te vaengah vangsawn lamkah amael rhoek loh Israel Pathen Boeipa hamla bawkim a sak uh te a ming uh. 68 Te dongah Zerubbable neh Jeshua khaw, pacut imkhui kah a lu rhoek te khaw a paan uh tih amih te, “Nangmih kan sak uh puei eh. 69 Nangmih kah na saii uh bangla na Boeipa kah ol te ka ngai uh. Assyria manghai Esarhaddon loh kaimih he n'khuen uh parhi te, Boeipa taengah hmueih ka phum yoeyah,” a ti nah.

70 Tedae Zeubbabel neh Jeshua long khaw, pacut im kah a lu rhoek long khaw amih te, “Kaimih kah Pathen Boeipa imkah imsaknah dongah kaimih taengah na saii uh koi a om moenih. 71 Persian manghai Cyrus loh kaimih taengah ol m'paek bangla kamamih bueng long ni Israel kah Boeipa im te ka sak uh eh,” a ti nah.

72 Tedae khohmuen pilnam rhoek loh Judae kah rhoek te khak a khang uh, amih kah lampu khaw boeih a khaih pa uh tih, a imsak khaw a kanghalh pa uh. 73 Amih te poci sak hamla a taeng uh tih a tlai thil uh dongah manghai Cyrus a hing khuiah tah a imsak a coengnah ham khaw a kanghalh uh. Te dongah Darius a manghai hil kum nit khuiah tah imsak te a toeng uh.