1 He phoei lamkah, Persian manghai Artaxerxes a manghai vaengah Shallum capa, Hikkiah koca, Arazriah kah a ca, Seraiah capa Ezrra te ha pai. 2 Anih he Zadok koca, Ahitub koca, Amariah koca, Azariah koca, Bukki koca, Abishaua koca, Phinehas koca, Eleazar koca, Aaron koca lam khaw om.

3 Ezara he tah Moses kah olkhueng aka daek thai taengtae la Babylon lamloh ha mael coeng. Te khaw Israel kah Pathen long ni a paek. 4 Te dongah anih te manghai loh hinyahnah a tueng sak tih a bihnah boeih dongah khaw manghai mikhmuh ah kolonah a dang. 5 Anih taengah Jerusalem la aka cet rhoek he Israel pilnam hlangvang khaw, khosoih khaw, Levi rhoek khaw, bawkim kah laa sa rhoek khaw, thohtawt rhoek khaw, bawkim kah tueihyoeih rhoek khaw thum uh. 6 Te tah Artaxerxes kah a manghai nah kum rhih vaengah ni. Te vaengah manghai te kum rhih lo coeng. Amih te hla khat dongkah hla sae vaengah Babylon lamloh thoo uh tih a hla nga nah hla sae vaengah tah Jerusalem a pha uh. Boeipa loh amih a paek vanbangla a yincaehnah khaw thaihtak uh. 7 Ezra he tah mingnah khaw muep a khueh pai. Te dongah Boeipa kah olkhueng neh olpaek te a hmaai moenih. Olrhi neh laitloeknah boeih te Israel pum taengah a cang puei.

8 A dangkah catlaep he tah manghai Artaxerxes taengkah laipai loh a daek tih khosoih neh Boeipa kah olkhueng aka taekung Ezra taengla a pat.

9 Manghai Artaxerxes loh khosoih neh Boeipa kah olkhueng aka taekung Ezra te kun kan tuuk.

10 Kai kah lungvat oltloeknah vanbangla, ka ram khuikah Judah namtu boeih, khosoih rhoek neh Levi rhoek boeih taengah oltloeknah te kan paek coeng. Amih loh a saii ham koi te khaw sayalh la saii saeh lamtah, namah taengah Jerusalem la ha lo saeh. 11 Muep taekyak uh mai ngawn cakhaw, kamah neh ka baerhoep la aka om ka paya parhih kah oltloeknah ka khueh bangla nang taengla ha lo uh saeh. 12 Boeipa kah olkhueng dongah a om tarhing la Judea neh Jerusalem ah olka te khaw so saeh. 13 Kamah neh ka hui rhoek loh ka ol ka hlo bangla Boeipa hamla kutdoe he sui khaw, cak khaw, Babylonia khohmuen ah a hmuh boeih te tah, Jerusalem la khuen uh saeh. 14 Namtom loh Jerusalem kah Boeipa bawkim hamla a paek coeng te tah, sui khaw, cak khaw, saelhung khaw, boiva khaw, tu khaw amamih neh puei uh saeh. 15 Te te Jerusalem ah a Boeipa kah hmueihtuk dongah hmueih la nawn uh saeh.

16 Namah neh na huiko taengkah aka om carhui tah, sui khaw, cak khaw na Pathen kah kongaih bangla amah tarhing neh saii hamla ko poek uh. 17 Te tah Jerusalem ah na Pathen bawkim kah hnonah a paek Boeipa kah hnopai la om saeh. 18 Na Pathen bawkim ham a kueknah la nangmih taengah aka phoe boeih te tah manghai thakvok khui lamkah loh nangmih m'bom saeh.

19 Kai, manghai Artaxerxes loh Syria neh Phoenicia kah hnokhoem rhoek te olpaek ka pat coeng dongah, Khohni Pathen kah olkhueng aka taekung khosoih Ezra te a ngaithuen uh vetih a bom bitni. 20 Cak te khaw talen yakhat hlai, cang khaw voh yakhat hlai, misur tui bath yakhat, lungkae khaw a coihpawk la ka pueh lah ko. 21 Pathen olkhueng dongah a daek olka boeih te Khohnin Pathen ham tah rhuemtuet la soep saeh. Te daengah ni manghai ram neh a ca rhoek soah kosi a tlak pawt eh. 22 Cawn neh a tloe mangmu boeih loh Levi neh khosoih rhoek khaw, bawkim laa sa rhoek khaw, thohtawt rhoek khaw, bawkim kah sal rhoek khaw, bawkim kah bibi hlang he nan boel saeh lamtah amih te u long khaw mangmu thohh sak hamla tanol boel saeh.

23 Ezra nang ngawn tah, Syria neh Phoenicia tom boeih ah, Pathen kah cueihnah tarhing la, na Pathen kah cueihnah aka ming boeih taengah, tiknamnah neh laitloeknah aka khueh, laitloekkung la n'tuek coeng. Te dongah te te aka ming pawt rhoek te na thuituen ni. 24 Na Pathen kah olkhueng neh, ram kah olkhueng aka poe boeih te tah rheprhep cawh saeh. Dueknah neh khaw, dantatnah khaw, rhongnah khaw, thongtlaknah khaw om saeh.

25 Te vaengah Ezra kah cadaek dongah, “Boeipa bueng he tah a yoethen pai, Amah long ni manghai thinko ah he he a cuen sak, Jerusalem kah a im thangpom ham he khaw.

26 Boei loh kai he manghai mikhmuh ah khaw, a baerhoep rhoek neh a paya boeih, a boei a na rhoek mikhmuh ah n'hinyahnah coeng.

27 Ka Pathen Boeipa kah bomnah loh kai n'thaphoh coeng, Te dongah kamah neh ka puei uh la Israel hlang te ka coi,” a ti.

28 A napa imkhui neh a rhoihui bangla manghai Artaxerxes a manghai vaengah kamah neh Babylon lamloh aka cet hang rhoek tah,

29 Phineas koca kah Gershom, Ithamar koca rhoek ah Gammel, David koca ah Shecaniah capa Hattush. 30 Parosh koca ah Zekhariah neh a taengkah hlang ya sawmnga te kun uh.

31 Pahath-moab koca kah te Zerahiah capa Eliehoenai neh a tangkah hlang ya hnih. 32 Zattu koca ah Jahaziel capa Shecaniah neh a taengkah hlang yathum. 33 Elam koca ah Gotholiah capa Jeshaiah neh a taengkah hlang sawmrhih. 34 Sephatiah koca kah Michael capa Zeraiah neh a taengkah hlang sawmrhih. 35 Joab koca ah Jehiel cap Obadiah neh a taengkah hlang ya hnih hlainit. 36 Bani koca ah Josiphiah capa Shelomith neh a taengkah hlang ya sawmrhuk. 37 Bebai koca rhoek ah Bebai capa Zekhariah neh a taengkah hlang pakul parhet. 38 Azgad koca ah Hakkatan capa Johanan neh a taengkah hlang ya parha. 39 A hnukhueng la Adonikam koca rhoek kah a ming tah, Eliphelet, Jeuel, Shemaiah neh a taengkah hlang sawm rhih. 40 Bigvai koca ah, Istalculus capa Uthai neh a taengkah hlang sawm rhih.

41 Theras tuiva ah amah rhoihui boeih ka tingtun sak tih hnin thum ka rhaeh uh. 42 Te vaengah amih te ka cae tih ka hmuh he, khosoih neh Levi koca a om moeh nih. 43 Te dongah Eliezer, Iduel, Massmas, 44 Elnathan, Shemaiah, Jarib, Nathan, Elnathan, Zekhariah neh Meshullam taengla ol ka pat. Amih tah a lu neh aka yakming hlang la om uh. 45 Amih te thakvoh hmuen kah hlang mawtkung la aka om, Iddo taengla caeh ham ka thui pah. 46 Amih te, “Iddo neh a huiko taeng neh tangka khoem rhoek taengah khaw thui pah lamtah, mamih kah Boeipa im ah khosoih bi hamla hlang han tueih saeh,” ka ti nah. 47 Te dongah ka Boeipa kut rham loh Israel ca, Levi koca Mahli cadil hlang tang rhoek te kamih taengla han tueih. A ming lamtah Sherebiah neh a taengkah a huiko khaw, a cadil khhaw hlang hlairhet lo uh. 48 Hashabiah khaw, Annunus neh a manuca Jeshaiah khaw, Hananiah cadil neh a cadidil rhoek khaw hlang pakul lo uh. 49 Bawkim kah tueihyoeih rhoek khaw, David loh Levi bibi mawkut la a khueh rhoek khaw, bawkim kah tueihyoeih rhoek khaw yahnih pakul lo uh. Amih te a ming rhep boeih a khueh pah.

50 Theras tuiva kaengah cadong rhoek te ka Boeipa mikhmuh ah yaehnah khueh tih, ka yincaehnah dongah sadingnah ham khaw, ka cae rhoek neh ka ca rhoek ham khaw Boeipa taengah bih hamla olcaengnah ka khueh. 51 Manghai taengah rhalkap khaw, marhangcaem khaw, kaimih aka puei tih rhal kut lamloh kaimih tungaep hamla bih khaw ka yak coeng. 52 Anih taengah tah ka Boeipa kah thaduengnah ni ka uepnah tih amah dongah aka pangtung ni a hoeptlang ti khaw ka thui coeng. 53 Te dongah kaimih hoeptlang hamla ka Boeipa taengah ka thangthui uh tih kamih thangthuinah te a hlat coeng.

54 Te vaengah khosoih mawtkung hlatnit te ka hoep tih, Sherebiah, Hashabiah neh a huiko hlainit lo uh. 55 Te vaengah amih ham te cak neh sui khaw ka loeng pah tih ka Boeipa im kah hnopai cim te khaw ka hmoel pah. Te khaw manghai mah neh a olrhoep rhoek, a boeina rhoek neh Israel pum boeih kah a paek hno ni. 56 Te vaengkah ka loeng tih amih ka paek te cak talent yarhuk sawmnga, cakben hnopai talent yakhat, sui talent yakhat, 57 Sui baeldung pakul, rhohum baelyak pakul lo. Te khaw rhohum then la om tih sui bangla phaa.

58 Te phoeiah amih te, “Nangmih tah a pa rhoek kah Boeipa neh Boeipa taengah na cim uh coeng. Te dongah sui neh ca khaw, a pa rhoek kah Boeipa taengah Boeipa hamla a caeng coeng. 59 Te rhoek te khosoih neh Levi rhoek taengla, Jeruslaem kah Israel imkhui kah pacut boeilu taengla a pha hil, mamih Boeipa im kah imkhui la a pha hil dawn hueltue uh,” a ti nah. 60 Te dongah cak neh, sui neh Jerusalem ah aka om baelyak te a loh uh tih Boeipa kah bawkim la a khuen uh.

61 Hlasae hnin hlainit vaengah tah Theras tuiva lamloh ka hlah uh. Ka Boeipa kah thaom kut he kaimih soah om tih Jerusalem te ka pha uh. Amah loh a hnukhmai kah rhal kut lamloh n'loeih sak dongah Jerusalem ka pha uh. 62 A hnin thum dongah ah tah sui neh cak ne ka loeng tih ka Boeipa im kah Uriah capa khosoih Meremoth taengah ka paek. 63 Anih taengah Phinehas capa Eleazar khaw, amih taengah Jeshua capa Jozabad khaw, Binnui capa Moeth khaw Levi la om uh. 64 A pum la tih loeng vaengah khaw, a loeng boeih te amah tue vaengah boeih hlum pah la om.

65 Vang sawn lamkah aka mael rhoek loh Israel Pathen Boeipa taengah hmueih boeih a nawn uh. 66 Te vaengah kikong sawmko parhuk, tu sawmrhih pumnit, uemnah hmueih la maae tal pum hlainit neh Boeipa taengah hmueih la a nawn uh. 67 Manghai kah olpaek te boei tueihyoeih taeng neh, Coelesyria neh Phonikia khoboei rhoek taengah a khuen uh. Amih tah Boeipai bawkim neh pilnam khaw a hinyanah uh.

68 He tla a om phoeiah tah boeilu rhoek te kai taengla ha pawk uh tih, 69 “Israel pilnam khaw, boeilu rhoek khaw, khosoih rhoek neh Levi rhoek khaw, khohmuen pilnam neh amih kah a tihnai donglam loh amamih te khoe uh mah pawt ni? Amih te Kanani khaw, Khitti rhoek khaw, Perzi rhoek khaw, Jebusi rhoek khaw, Moab rhoek khaw, Egypt rhoek khaw, Edom rhoek pawn ni. 70 A ca rhoek loh he pilnam kah tanu te a loh uh. Te dongah a cim koca rhoek khaw khohmuen kah kholong pilnam neh thoek uh coeng. He olka dongah he a tongcuek lamloh mawtkung rhoek neh hlangcong rhoek khaw amih kah boethae te a cut puei coeng.

71 He olka he ka yaak vaengah ka himbai neh ka hnikul cim khaw ka phen coeng, ka lu neh ka baengbae sam khaw ka pham tih ngaihmang kothae la ka ngol. 72 Te vaengah Israel Boepa kah ol dongla aka thoeih boeih tah kai taengah tingtun uh. Kai khaw he boethae dongah ka nguek tih, hlaem hmueih tue hil kothae la ka ngol. 73 Te phoeiah ka yaehnah lamloh, ka himbai neh ka hnikul khaw a pawnsoem la ka thoh puei. Te phoeiah ka sungkueng thuk tih Boeipa taengla kut ka phuel.

74 Te vaengah, “Aw Boeipa, yah ka poh tih, na mikhmuh tah ka ngaihmang coeng. 75 Kaimih kah tholhnah he ka lu lakah khaw sang tih, tholhdalhnah loh vaan duela som coeng. 76 A pa rhoek tue lamloh tihnin duela ka tholnah he muep len. 77 Kamih kah tholhnah neh a pa rhoek kah tholhnah kongah ni, kaimih neh ka huiko rhoek khaw, ka manghai rhoek neh ka khosoih rhoek khaw, diklai manghai rhoek taeng ah, cunghang dongla, vangsawn la, kutbuem la, tihin ah yahhat la m'voeih coeng. 78 Aw Boeipa na rhennah cungnueh te kaimih teangla ha lo mai laeh mako. Kaimih ka yung phoek mai cakhaw na hmuen cim kah ming nen tah. 79 Ka Pathen Boeipa im ah kaimih ham vangnah tueng sak lamtah ka lamlum uh tue vaengah kaimih he buh m'pae lah. 80 Pinyenah khuiah pataeng ka Boeipa loh kaimih hno moenih. Te dongah nih Persian manghai taengah kolonah n'khuen tih kaimih te buh m'paek. 81 Te vaengah ka Boeipa kah Bawkim te a thangpom tih, Zion te khopong lamloh thoh sak ham, Judea neh Jerusalem akh ka hmuencak khueh ham pawn ni.

82 Aw Boeipa, he bang hno a om vaengah balae ka thui lah eh? Na olpaek te khaw ka poe uh coeng he. Te te na sal rhoek neh tonghma rhoek taengah na paek coeng ta. 83 Khohmuen he khohrhang la loh ham na kun thil coeng. Kholong khohmuen kah tuinu loh khohmuen a nu sak. Amih te a khawt hoeng la om coeng. 84 Te dongah, ‘Na tanu rhoek he amih cadil taengah vasa la tueih uh boeh. Na cadil rhoek ham khaw amih nu te loh pah boeh. 85 Amih neh rhoinaeng ham khaw tlap uh boeh. Te daengah ni na rhoeng uh vetih khohmuen kah hno then khaw na caak uh eh. Na carhoek ham khaw rho na caeh tak yoeyah eh,” na ti. 86 Te boeih te mamih taengah ha thoeng he khaw, kaimih kah boethae neh, tholhnah a yet dongah ni. Te dongah Boeipa namah loh kaimih kah tholhnah he ham phil lah. 87 Kaimih he a yung khaw nan phil coeng. Tedae khohmuen kah pilnam rhalawt neh ka thoek uh coeng dongah na olkhueng poe hamla ka mael uh. 88 Ka yung ka pa, tingan neh ka ming om pawt hil ah kaimih nan phae ham khaw kaimih taengah thintoek na hah voel pawh. 89 Aw Boeipa, uepom la na om dongah ni, tihnin due ka yung ka pa khaw nan paih. 90 Na mikhmuh ah boethae halang la ka om coeng ta he. He kah hno rhang neh na mikhmuh ka ka pai ngoeng uh pawh.

91 Ezra he thangthui tih tholhphongnah a khueh vaengah, rhap tih bawkim hmai kah diklai dongah yalh. Te vaengah Jerusalem lamkah tongpa khaw, huta khaw, cadong caloe khaw a taengah muep tingtun uh. Te vaengah hlangping lakli ah bungbung rhap uh. 92 Israel hlang pakhat, Jehiel cap Shekaniah loh Ezra te a khue tih, “Boeipa taengah ka tholh uh coeng, kholong pilnam lamkah kholong nu te ka loh uh coeng. Tedae Israel ham ngaiuepnah om pueng. 93 Boeipa taengah olhlo khueh uh pawn sih. Kholong nu tah a ca neh rhenten hnoo uh pawh sih. 94 Nang ham neh Boeipa kah olkhueng aka ngaih boeih ham khaw aka then la koih. 95 Thoo lamtah thuenglaengah khueh pawn sih. Te nang hut rhoei ni. Kaimih khaw nang taengah thaomnah cungnueh la ka om uh ta,” a ti nah.

96 Te dongah Ezra te thoo tih Israel kah mawtkung rhoek neh Levi rhoek loh a phoei ham te olphoei a khueh pah. Te dongah amih long ol a hlo uh.