JOHAN CAPAT
A Pacuek Nah
(John’s First Letter)
JOHAN CAPAT KAWNG
Johan he Jesuh Khrih kah hnukbang cuek la om. Pathen aka tangnah Khrihca rhoek long he a tholhnah Pathen taengah a phoe atah Pathen loh khodawk a ngai vetih tholh a khoe pah ni” a ti (1.9).
Khat neh khat lungnah he tangnah taktak la a om (3.11-24). Pathen tah lungnah la a om dongah a pilnam he amah mueiloh la om saeh (4.1-21). Tholhnah n'ta he ni tanah taktak la a om. Jesuh tah Pathen capa, Khrih la om tih duek taktak ti hing koep ti tangnah ham om (5.1-12). Johan capat he AD 85-95 vaengah a tael.
Sawt Yoeinah
Ol loh hingnah n'paek (1.1-4)
Pathen tah vangnah neh Khrih tah mamih kah awtkoi (1.5—2.6)
Olpaek thai (2.7-17)
Khrih kah rhal neh Pathen ca rhoek (2.18—3.10)
Pathen neh Mamih kah lungnah (3.11—4.21)
Diklai tanah (5.1-21)
1
Olrhannah
1 Jhn 1.1Te tah a tongcuek lamkah aka om tih te te n'yaak uh. Te te mamih mik neh n'sawt uh coeng. Te te m'hmuh uh phoeiah mamih kut loh a phathuep hingnah Olka kawng ni. 2 Jhn 1.14Hingnah long tah ha phoe ngawn coeng. Te vaengah dungyan hingnah te ka hmuh uh tih ka phong uh vanbangla nangmih taengah ka puen uh. Te tah pa taengah om tih mamih taengah ha phoe coeng. 3 Te te ka hmuh uh tih ka yaak uh dongah ni nangmih taengah khaw ka puen uh. Te daengah ni nangmih khaw kaimih taengah rhoinaengnah, pa neh mamih, a capa Jesuh Khrih neh rhoinaengnah te khaw na khueh uh eh. 4 Hekah he khaw kaimih kah omngaihnah soep sak ham ni kaimih loh ka daek uh.
Pathen neh Rhoinaengnah
5 He kah olthang aka om he amah lamloh ka yaak uh tih nangmih taengah ka puen uh. Pathen tah vangnah la om tih a khuiah a hmuep om loengloeng pawh. 6 Amah neh rhoinaengnah n'khueh uh tila n'thui uh tih yinnah khuiah m'pongpa uh atah n'laithae uh tih oltak n'saii moenih. 7 Tedae amah loh vangnah khuiah a om vanbangla vangnah khuiah m'pongpa uh atah, khat neh khat taengah rhoinaengnah ng'khueh uh. Te vaengah a capa Jesuh kah thii loh mamih he tholhnah cungkuem lamloh n'cilpoe coeng. 8 Tholhnah n'khueh uh moenih tila n'thui uh atah amah la n'rhaithi uh dongah oltak loh mamih khuiah om pawh. 9 Mamih kah tholhnah te m'phong uh atah amah khaw uepom la om tih a dueng dongah mamih kah tholhnah te a hlah tih boethae cungkuem lamkah mamih n'cilpoe. 10 Ka tholh uh pawh tila n'thui uh atah amah laithae m'pup uh tih a olka loh mamih khuiah om pawh.