1 Mang hai Alexander tah a hluen kah ram la a caeh vaengah Persia kah Elymais tah cak neh sui om tih a ming thang tila a yaak. 2 a bawkim khaw bahoeng boei, sui photling khaw, rhangpho khaw, lamhma kah Greek soah aka uk Makedonia manghai, Philip capa Alexander loh lungpokhaica a khueh. 3 Te dongah anih te cet tih khopuei loh ham te poelyoe hamla cai dae khosaca rhoek loh vik a ming tih coeng thai pawh. 4 Te vaengah amih caemtloek la huek pai uh. Tedongah Alexander khaw vik yong tih, ngaihlihvang la Babylon a pha.

5 Te vaengah hlang khat te Persia ah anih taengla cet tih Judah khohmuen la rhalkap balkhong tih a caeh khaw, 6 Lysias te lamhma ah thaom tloe la cet, Judah taeng lamloh hnukmael ya a yong te khaw, Judah rhoek tah caemrhal dongah thaomnah a khueh khaw, buhan dongah a khueh khaw, rhalkap a ngawn taeng lamkah kutbuem muep a coih pa te khaw 7 Jerusalem kah sarhingrhup la hmuehtuk a suem tangtae a palet uh te khaw, a hmuencim kaepvai neh a khopuei Bethzur kah vongtung a sang a thung te khaw a thui pah.

8 Olthang te manghai loh a yaak vaengah tah let tih tloptlop thuen. A thingkong te a phaih tih a tahah uet ah a sa la tlo. A mangtaengnah hno te khuppalet la a caeh pah. 9 Khoyin a sen sut yalh coeng, a tahahnah aih loh amah a yuek rhapsat. Te dongah a duek ham khaw a ming coeng. 10 Te vaenah a paya rhoek te a khue tih, “Ih tui khaw ka mik dong lamloh nong coeng, mawntangnah he ka kopoek khaw bawt coeng. 11 Kamah mai he, “Me lamkah ngaihmangnah lae ka loh, mebang tuili dongah ka buek coeng, ka thaom vaengkah ka moeihoeinah neh ka sitlohnah aih te,” ka ti. 12 Jerusalem ah thae ka saii khaw ka poek coeng. cak neh sui baelyak boeih te ka loh, lunglilungla maila Jerusalem neh kaepvai te khaw ka thup. 13 He boeih he kai soah yoethaenah la pai coeng tila ka ming. Tahae tah kai he kholong kho ah tahah tangkik neh a khahing la ka paci coeng,” a ti.

14 A paya rhoek khuiah pakhat la aka om Philip te a khue tih a ram kah a cungkuem soah ukkung la a khueh. 15 A capa Antiokus te mawt tih manghai la a om hil dawndah hamla Philip te rhuisam neh a him khaw, kutbuen khaw a paek. 16 Kum ya sawmli kumko vaengah Antiokus te duek. 17 Manghai a dueknah te Lysias loh a yaak vaengah tah a capa Antiokus te manghai la tloep a khueh. Anih te a camoe lamloh a khut coeng dongah a ming te Eupator a sui.

18 Rhalmah hmuen kah pumom rhoek loh hmuencim kaepvai kah Israel rhoek te vawk a toeh. Israel rhoek te a hnukhmai la nganboh a paek tih Gentile te tha a om sak. 19 Te dongah Judas loh amih te thup ham neh dum hamla pilnam boeih a hueh. 20 Kum ya sawmnga vaengah tah rhalmah hmuen te a dum uh tih, tanglung sang neh caemtloeknah seh te a saii uh. 21 Tedae pumom hlang a ngen loh tanglung a poe tih a yong vaengah Pathen aka ming mueh Israel khaw amih neh hui uh thae. 22 Amih te manghai taengah cet uh tih, “Me hil nim tiktamnah sai ham neh mah huiko ham tawnloh khaw na hlong ve? 23 Kaimih tah na pa taengah thohtat ham neh a thui bangla khosak ham, a olpaek te vai ham ni ka ngaih uh. 24 He dongah mah pilnam paca tah rhalmah hmuen a dum uh coeng tih mamih taengah thae a huet uh coeng. Te phoeiah mah khuikah a tuuk uh tih muep a duek sak uh coeng. Mamih kah rho khaw boeih hang rhawt uh coeng. 25 Kaimih taeng bueng ha kut thueng uh pawt tih a khohmuen khorhi khui kah boeih te a ngawn uh coeng. 26 Tihnin ah amih te Jerusalem kah rhalmah hmuen te loh hamla a rhaeh uh thil coeng ke. Hmuencim neh Bethzur khaw hmuencak la a khueh coeng. 27 Amih te a loe la na kang pawt koinih a hno a len la a saii vetih amih na paa sak thai mahpawh.” a ti nah.

28 A yaak vaengah manghai te sai coeng. Te dongah a paya boeih khaw, a rhalkap boei rhoek khaw, saithainah aka khueh khaw a coi. 29 Kutloh rhalkap te khaw anih taengla ram tloe lamkah te tuitunli kah tuisanglak lamloh cet uh. 30 A caem te hlangmi la rhalkap te thawng yakhat, marhang caem thawng kul, vuei sawmtum panit te caemtloek hamla a phaep uh. 31 Amih te Idumea la cetih Bethzur ah rhaeh uh. Khohnin a sen te seh khaw a hnonah tih a tloek uh. Tedae Judah rhoek long khaw a muk uh tih hmai neh a hoeh uh phoeiah thinom la a tloek uh.

32 Judas te rhalmah hmuen lamloh cet tih manghai rhaehmuen kah a dan Bethzekhariah ah rhaeh. 33 Mincang ah manghai loh a caem a khuen tih hlangping la Bethzekhariah longpuei ah cet uh. Te vaengah a lambong te caemtloek la sikim sak ham a olueng te a ueng. 34 Vuei te khaw caemtloek la hueh ham misur thii neh, tikti thii neh a hluk. 35 Te rhoek te caem aka cet rhoek taengah a tael pah. Vuei pakhat te hlang thawng khat loh a puei. Amih te caempho neh, rhohum lumuek eh, aka phaep uh tangtae marhang caem ya nga neh a puei sak. 36 Amih te vuei taengah tavuet uh tih mela a caeh mela a nong a khaw a tloe la thoeih uh pawh. 37 Vuei soah te rhaltoeng thing om tih thingcang neh khak a poi hlang pali neh vuei aka hoihaeng India hlang khaw om. 38 A tloe marhang caem boeih tah voeivang ah pai uh. Thannit lah caem aka cet veet ham te caem la aka cet rhoek te tung aep hamla than nit la pai uh. 39 Khomik loh sui neh rhohum photling te a kah vaengah tah tlang ah hmaithoi hmai bangla laklak phaa.

40 Manghai caem kah a ngen tah tlang sang ah yaal uh, lambong la a ngen tah kolvan ah om uh. Amih te a then la tluep tluep lamhma uh. 41 Amih hlangping kah a ol te boeih a yaak uh. Hlangping a khong uh vaengah mah a kut phakphak a bael uh. A caem te muep len tih a khawk uh dongah aka hmuh rhoek khaw thuen uh.

42 Tedae Judas he caemtloek la a lamhma coeng dongah manghai caem te hlang yarhuk a cungku pah. 43 Te dongah Avaran la a khue Eleazar long tah vuei te boei kah pumcunah neh a thoeihcam. Te tah a tloe rhoek lakah khaw sang tih a soah manghai ngol coinih a ti. 44 Te dongah a pilnam khang ham te dungyan ming then te amah ham dang a ngaih tih a hingnah a paek. 45 Anih te caemrhal lakli la thinom neh yong tih banvoei bantang kah hlang rhoek te a ngawn. Te dongah amih te banvoei bantang la phang paek uh. 46 Anih te vuei takang la kun tih a bunglai ah vawh a cawk pa tih a ngawn. Te dongah diklai ah amah la bung tih duek. 47 Manghai caem tah tlung tih caem khaw rhaprhap a tloek te a hmuh vaengah Jadah rhoek tah ki buung tih yong uh.

48 Manghai caem kah rhalkap rhoek tah Jerusalem la cet uh tiah Judea kah Zion tlang ah rhaeh uh. 49 Bethzur kah pilnam neh rhoepnah a saii tih khopuei a nong tak. Khohmuen te Sabbath kum la a om dongah khopuei a dum khaw caak loh a vaitah uh coeng. 50 Manghai loh Bethzur te a loh tih rhaltawt te pahoi a hueh. 51 Anih he hmuencim hmai ah kum a sen puet rhaeh coeng. Tanglung imsang khaw, caemtloek nah seh, hmai thaltang neh lung to khaw, payai khaw, lungto a dongnah khaw a khueh. 52 Judah rhoek khaw caemtloeknah seh a khueh uh van tih khohnin a sen amih te puet a tloek uh. 53 Tedae caak a tung uh te khaw boeih coeng. A kumrhih nah la om bal tih, Gentile kut lamloh Judea ah aka kuep aka ying long khawng a cangtung im te hlawp a khok uh coeng. 54 Hlang he hmuencim ah a yol bueng a paih uh tih a tloe rhoek tah amah im la phang cet uh coeng. amih hamla khokha khaw bahoeng a tloh pa aih coeng.

55 Manghai Antiokus a hing vaengah a capa Antiokus manghai la a om hil aka khoembael la a khueh Philip kawng te Lysias loh a yaak. 56 Philip te Persia neh Media lamloh manghai neh aka cet rhalkap rhoek te a khuen tih mael. Anih long te kungkung kah uknah rhawt hamla cai. 57 Te dongah Lysias loh, “Manghai taengah khaw, caempuei rhalboei taengah khaw, hlang rhoek neh lambong taengah khaw, “Hnin takuem voevoeh n'yawk uh coeng. Buh long khaw n'koek uh coeng. Mamih long n'tloeknah rhmueh he bahoeng tlung uh, ramkah dumlai loh mamih soah tla coeng. 58 Pilnam neh ol thui pawn sih, amih nen khaw, namtom nen khaw rhoepnah saii pawn sih. 59 Lamhma kah a olkhueng bangla kho a sak ham khaw kotluep puei pawn sih. Amih kah olkhueng m'voeih pah dongah ni a thintoek uh tih hekah hno a saii uh,” a ti nah.

60 Olthui te manghai neh rhalboei long khaw a ngaih. Te dogah Judah te a tah tih rhoepnah a saii dongah dongah a ngai uh van. 61 Manghai neh rhalboei rhoek long ol a hlo uh. Te dongah Judah rhoek long khaw hmuencak te a nong tak. 62 Manghai te Zion tlang la a yoeng vaengah tah a hmuen te rhalmah hmuencak la a om pah. Te dongah olhlo a phoei te khaw a lat tih a taengvai kah vongtung te palet hamla ol a paek. 63 Te phoeiah Antiok la a koe mael. Philip loh khopuei rhep a buem te a hmuh dongah anih te a ngawn tih khopuei te thama la a loh.