PETER CAPAT
A Pacuek Nah
(Peter’s First Letter)
PETER CAPAT (A PACUEK) KAWNG
Peter he a moecuek lamkah loh Jesuh Khrih hnukbang la om. Tahae kah capat dongah he patangkhangnah kawng muep a thui. Boeipa ham thotat vaengkah, tangnah rhekrha vaengah, noemcainah a om vaengah khosaknah longpuei muep a thui. Hekah capat he Asia Minor tlangpuei la aka taeyaak Khrihca rhoek ham a tael pah. Roman ram khuiah he Jesuh aka tangnah mueh rhoek loh a tloengtlaih la Khrica rhoek muep a ngawn uh. Tedae he lak ah khaw nah pueng thai a ti nah.
Peter loh amih ham te thapaeknah tlek a khueh pah. Pathen hnukbang rhoek he mevaengah khaw noemcainah he a tong yoeyah tila hekah capat rhangneh n'ming. Tedae Peter long tah te te uem uh a ti. Noemcainah long tah tangnah a cak sak tih Boeipa Jesuh Khrih koep a rhum vaengah thangpomnah la om ni a ti. ( 1.6,7).
Khrih he diklai ah a hing vaengah Patang a khang van bangla amah kah patangnah te n'cuut dongah mamih khaw n'pang uh (2.18-25; 4.12-17). Khrih he n'tangnah coeng atah patangnah ngawn om pawn ni ti he oepsoeh la ming sih (3.8—4.19).
Tedae Pathen tah amah la om coeng tih dueknah lamloh Jesuh Khrih aka thohkoep sak khaw Pathen amah ni. Te dongah Khrihca rhoek ham tah hmailong ah ngaiuepnah om pueng. Khrih he patangnah a dang bangla thangpomnah khaw a dang. Jesuh Khrih koep halo vaengah thangpomnah dangnah ham ni Khrihca rhoek long khaw tahae ah patang n'khang uh.
Peter capat he AD 65-67 tluk vaengah a tael.
Sawt Yoeinah
Kuttuknah neh thangthuinah (1.1,2)
Ngaiuepnah taktak kawng (1.3-12)
Pathen kah Pilnam Cim (1.13—2.17)
Khrihca rhoek kah patangnah (2.18-25)
Khrihca rhoek patang vaengah (3.1—4.19)
Hlangboel mawtkung kung ham cilkhih (5.1-11)
Phihnah olrho (5.12-14)
1
Kuttuuknah
1 Jesuh Khrih kah caeltueih, Peter loh, Pontus, Galatia, Kappadokia, Asia neh Bithunia kah a coelh tih canglak mupoe lampah taengah, 2 Jesuh Khrih kah olngainah neh thii a haeh dongah, mueihla kah cimcaihnah rhangneh pa Pathen kah a ming oepsoeh vanbangla, nangmih taengah lungvatnah neh ngaimongnah ping saeh tila kan yaak sak.
Aka Hing Ngaiuepnah
3 Mamih Boeipa Jesuh Khrih kah Pathen neh Pa tah thangpom pai saeh. A rhennah a len vanbangla duek lamkah Jesuh Khrih kah thohkoepnah loh aka hing ngaiuepnah dongah mamih n'cun coeng. 4 Aka kuei tih aka cuem neh aka tlumtloih pawh rho la, 5 hnukkhueng tue ah sikim la aka pumphoe ham khangnah te tangnah lamloh a khoembael tih Pathen kah thaomnah neh nangmih ham vaan ah a kuem coeng. 6 Te dongah hlampan uh lah. A kuek coeng atah noemcainah cungkuem dongah kolkalh khaw kothae neh om ta. 7 Te daengah man aka poci sui lakah aka kuel nangmih kah tangnah dongkah nuemnainah te hmai neh a nuemnai vaengah Jesuh Khrih kah pumphoenah dongah koehnah, thangpomnah neh hinyahnah te a hmuh ve. 8 Anih te m'hmuh pawt dae na lungnah uh. Tahae ah khaw m'hmu uh pawt dae amah te na tangnah uh dongah thui thai lek mueh omngaihnah neh na kohoe uh tih na thangpom uh. 9 Nangmih kah tangnah lamkah aka thoeng loh hinglu khangnah te na dang uh.
10 Nangmih ham lungvatnah kawng aka phong tonghma rhoek loh tekah khangnah kawng te a tlap uh tih a cae uh. 11 Khrih kah patangnah neh te phoeikah thangpomnah te Khrih mueihla loh amih khuiah a phong vaengah balae, mebang tue nim a thuicaih tila a khe uh. 12 Amih taengah aka pumphoe te amamih ham moenih tih te nen te nangmih ham ni a moem uh. Te te vaan lamkah han tueih Mueihla Cim neh nangmih olthangthen a phong te tahae ah amih rhangneh nangmih taengah ha puen coeng. Tekah khuila sawt hamla puencawn rhoek loh a hue uh.
Hing Cim Ham Khuenah
13 Te dongah nangmih kah kopoek pumpu te hlawt lamtah cue uh lah. Jesuh Khrih kah pumphoenah dongah nangmih ham lungvatnah han khuen te khuek ngaiuep lah. 14 Olngainah kah a ca rhoek vanbangla, hnukbuet ah na kotalhnah bangla hoehhamnah te rhoii uh boeh. 15 Tedae nangmih aka khue te a cimcaih vanbangla, nangmih khaw omih boeih dongah cimcaih la om uh lah. 16 Tho 11.44,45; 19.2Kai cimcaih la ka om dongah, cimcaih la om uh tila a daek coeng. 17 Te phoeiah pakhat rhip kah khoboe vanbangla langya ah lai aka tloek te a pa tila na khue uh atah nangmih kah yinlai la na om uh a tue khuiah rhihnah neh khosa uh. 18 Nangmih kah a honghi neh khokhuen omih lamkah aka hmawn thai tangka, neh sui neh n'tlan uh moenih. 19 Tedae tuca bangla a cuemthuek neh a cuemhmuet a phu aka tlo Khrih thii nen ni tila ming uh. 20 Diklai tong hlanah a ming coeng ta. Amah lamloh Pathen dongah uepom nangmih ham hnukkhueng tue ah khaw phoe coeng. 21 Amah te duek lamkah a thoh tih a taengah thangpomnah a paek coeng. Te dongah nangmih kah tangnah neh ngaiuepnah te Pathen dongah om saeh.
22 Hmantang kah manuca lungnah ham oltak kah olngainah neh na hinglu te ciim uh. Thinko a caih lamloh khat neh khat nguen nguen lungnah uh. 23 Aka hmawn thai cangtii lamkah pawt tih aka kuei, aka hing tih aka naeh Pathen kah olka lamloh n'cun coeng.
24 Isa 40.6-8Pumsa boeih tah khopol bangla om tih,
a thangpomnah boeih khaw khopol pai bangla om.
Khopol tah koh tih rhaipai khaw rhul.
25 Tedae Boeipa kah olka tah kumhal duela cak.
Tekah olka tah nangmih taengah thui tangtae olthangthen dae ni.