TIMOTHY CAPAT
A Pacuek Nah
(First Letter to Timothy)
TIMOTHY CAPAT KAWNG
Timothy tah a manu Jews hoel tih a napa he Greek hoel la om. A camoe lamloh thangthai tih Pathen a ming coeng (1.5). Paul neh cet rhoi tih bi a bi rhoi (Romans 16.21; 1Kor 16.10; Philipi 2.19). Tangnah dongah tah Paul loh a capa la a khueh (1.2). Timothy he Paul kah uepom bibipuei la a khueh te capat dongah voei nga a tueng sak.
Hekah capat dongah he Paul loh Timothy amah ham khaw ca a tael pah. Te phoeiah Khrihca hlangboel kah khosaknah neh mawtkung (3.1-7), bibikung(3.8-13), neh a hamca (5.17-20) tueknah kawng a thui. Hekah capat he AD 64 tluk vaengah a tael.
Sawt Yoeinah
Kuttuknah (1.1,2)
Hlangboel khosaknah (1.3—3.13)
Bawknah Olhuep (3.14—4.5)
Paul kah oluennah (4.6—6.21)
1
Kuttuuknah
1 Mamih kah khangkung Pathen neh mamih kah ngaiuepnah Jesuh Khrih kah olpaek vanbangla Jesuh Khrih kah caeltueih Paul loh, 2 Clt 16.1tangnah dongah ka ca tak Timothy taengah kan pat. Pa Pathen neh mamih Boeipa Jesuh Khrih lamkah lungvatnah, rhennah, ngaimongnah om saeh.
Olkhueng te Rhoidoeng Tholh
3 Makedonia la ka caeh vaengah Ephesa ah aka om nang te kan uen. Te daengah ni khat khat loh a thuituen tholh pawt ham khaw, cil neh aka puh rhuirhong hnatung pawt ham na uen thai eh. 4 Te rhoek te tangnah dongah Pathen kah hnokhoemnah lakah olpungnah la lat a coeng sak. 5 Tedae oluen dongkah a cuinah tah thinko a caih lamkah lungnah, aka then mingcimnah neh hmantang kah tangnah te ni. 6 He lamkah hlangvang tah hlihloeh tih olhongpaika la mael uh. 7 Saya la om ham a ngaih uh. Tedae a thui te khaw yakming uh pawt tih ba khaw a cak sak uh moenih.
8 Tedae khat khat long ni a longim la a rhoidoeng atah olkhueng tah then tila m'ming uh. 9 Aka dueng ham olkhueng he khueh pawh tila m'ming. Tedae lailak rhoek neh thinthah rhoek ham, baltalh rhoek neh hlangtholh rhoek, aka cimpawt rhoek neh aka rhonging rhoek, a napa aka ngawn neh a manu aka ngawn, hlang aka ngawn, 10 Hlanghalh rhoek, uicuk rhoek, hlang aka yoi, laithae, aka basa neh aka soep thuituennah te a tloe la aka kingkalh boeih ham ni a om. 11 Yoethen Pathen kah thangpomnah vanbangla tekah olthangthen te kai m'paek coeng.
Paul kah Olthui
12 Kai aka thaphoh mamih kah Khrih Jesuh Boeipa taengah uemonah ka khueh. Kai he uepom la m'poek dongah bibi la ng'khueh. 13 Clt 8.3; 9.4,5Lamhma la aka soehsal tih aka hnaemtaekkung neh hnaephnapkung la ka om. Tedae hnalvalnah dongah mangvawt la ka saii oeh dongah n'rhen. 14 Mamih Boeipa kah lungvatnah tah Khrih Jesuh ah tangnah, lungnah neh pawk long. 15 Ol tah uepom neh hlang boeih kah a doe tueng la om. Te dongah ni Khrih Jesuh tah hlangtholh khang ham diklai la ha pawk. Amih khuiah kai tah tanglue la ka om coeng. 16 Tedae he nen he n'rhen coeng. Te daengah ni Khrih Jesuh tah thinsennah boeih neh ka khuiah a tueng lamhma eh. Amah soah tangnah ham aka cai rhoek kah dungyan hingnah ham a ninglam pakhat la om sak ham ni. 17 Tahae ah kumhal kah Manghai, aka kuei, hmuhmueh Pathen bueng te hinyahnah neh thangpomnah kumhal kah kumhal duela om saeh. Amen.
Aka then Vathohnah
18 Camoe Timothy nang te he oluen he kan tloeng. Nang soah tonghma ol bangla ka lamhma sak coeng. Te daengah ni te nen te aka then vathohnah te na vathoh thai eh. 19 Tangnah neh aka then mingcimnah te pom lah. Te te hlangvang loh a tueihno uh dongah tangnah sangpho a poci pa uh. 20 Amih khuiah Hymenaeus neh Alexander nuen rhoi van. Amih rhoi te Satan taengah ka voeih daengah ni ueih rhoi vetih a soehsal pawt eh.