1 He tonghma cabu he tah Azariah koca, Seraiah capa Ezra kah ni. Azariah he Ahitub cadil, Zadok capa Shallum koca Hilkiah capa ni. 2 Hilkiah he tah Eleazar capa Phinehas koca Abishua cadil, Borith ka a ca Unzzi capa Arna koca, Maraimoth ka a ca Amariah capa Eli capa Phinehas koca Ahijah capa ni. 3 Eleazar he khaw Levi koca Aaron cadil ni. Anih he Persian mangah Artaxrerxes tue vaengkah Medes ram la a sol uh.

4 Boeipa ol tah kataengla ha thoeng tih, 5 “Cet lamtah ka pilnam kah boethae a saii he phong laeh, a ca rhoek loh kai taengah boethae a saii uh coeng. Te daengah ni a ca rhoek kah a ca rhoek taengah khaw a thui uh eh. 6 A napa rhoek kah a tholhnah te a ca rhoek taengah a koei uh, amih loh kai n'hnilh uh tih kholong kah pathen taengah hmueih a nawn uh. 7 Egypt khohmuen kah thong im lamloh amih aka doek te kai moenih a? Tedae amih loh kai m'veet uh tih ka cilsuep te a hnawt uh. 8 Te dongah na lu dongkah na sam te poelh lamtah boethae boeih te amih soah thithut laeh. Amih loh ka olkhueng ngai uh pawt tih boekoek pilnam lamni a om uh. 9 Amih te me hil nim ka ueh vetih, amih soah hoeikhangnah khaw meyet hil nim ka khueh lah ve? 10 Amih yoe ham ni manghai khaw muep ka palet. Pharaoh neh a sal rhoek khaw, a caem khaw ka tloek pah dae. 11 Amih hmaiah namtom khaw boeih ka phae tih, khothoeng ah khocut panit kah pilam khaw ka taekyak ta. Nangmih hamla Bethsaida khopuei ka phae tih tuithim khopuei panit ka hlup moenih a? Tyre neh Sidon kah amih rhal te khaw ka ngawn pah ta.

12 Tedae amih te voek lamtah thui pah, Boeih loh a thui coeng. 13 Tuipuei longah nangmih aka mawt khaw kamah rhep ni. Caenglong a om nah pawt ah dingsuek longpuei aka tuk pah khaw kamah ni. Nangmih kah mawtkung la Moses, khosoih la Aaron kam paek coeng. 14 Nangmih ham hmai tung dong lamkah hmaivang kang khueh tih nangmih lakli ah kopoekrhai a lenkoek khaw kang khueh coeng. Te lalalah ni kai nan hilh uh Boeipa loh a ti.

15 Tlungthang Boeipa loh he ni a thui. Nangmih kah miknoeknah la tanghuem om tih, na tungaepnah ham rhaehhmuen kam paek dae a khuiah na kohuet uh bal pueng. 16 Na thunkha rhoek a pocinah khuiah ka ming khaw na pomsang uh pawt hmanah tahae kohnin hil na kohuet uh bal pueng.*Nangmih aka hloem neh a caem rhoek te khaw tuili ah ka buek sak dae pilnam loh amah kah pocinah dongah kohuet uh 17 Nangmih kan tuem te banglae a hoeikhangnah. Khosoek ah na pongnaeng uh tih na halthi uh vaengah ahtah kai taengah na pang uh pawt nim? 18 Kamih ngawn ham balae tih khosoek la nang khuen? Khosoeik ah duek ham lakah tah Egypt ham thohtat pah he mamih hamla then ngai coeng,” na ti uh. 19 Na hueinah uh te lungma ka ti dongah na caak uh ham manna kam paek tih puencawn buh na caak uh. 20 Na halh uh vaengah lungto ka phaek tih tui muep a phuet moenih a? Kholing vaengah khaw thing hnah neh nangmih kang khuk dae ta. 21 Khohmuen laimen te nanming kam phaeng tih Kanaan khaw, Perzzi khaw, Philitian khaw nangmih hmaiah ka haek. Naming ham balae a pueh la kan saii bal bueng eh? Boeipa loh he ni a thui. 22 Tlungthang Boeipa loh he ni a thui, khosoek kah na om uh vaengah tuikhaa sok ah tuihalh neh ka ming na soehsal uh. 23 Tedae nangmih kah soehsalnah soah nangmih te hmai kan tueih pawt tih, tui dongah thing na khoh uh vaengah sokca tui khaw koep tui.

24 “Aw Jakob nang taengah balae kan saii eh? Judah nang khaw kai ol na ngai moenih. Namtom taengla ka mael vetih ka ming he amih ni ka paek pawn eh. Te daengah ni ka olrhi he a tuem uh eh. 25 Kai nan hno uh dongah nanming kan hno van ni. Kai taengah rhennah nan bih akhaw nangmih te rhennah kan tueng mahpawh. 26 Kai nan khue uh vaengah khawng nangmih taengla ka hnatung mahpawh. Na kut te thii neh na poeih uh tih na kho khaw hlang ngawnnah kungla hoi uh paitok. 27 Kai nan hnawt la poek uh boeh, namamih ni na hnawt uh coeng tila Boeipa loh a thui.

28 Tlungthang Boeipa loh he ni a thui. A napa loh a ca rhoek, a namu, a canu rhoek, camoe ca-om rhoek a toei bangla nangmih kan toei. 29 Namah man sue ka ca la na om uh vetih na pa la ka om pai sue. 30 Ainu loh a ca rhoek a phae hmuiah ah a ku bangla nangmih kang ku. Tedae nangmih ham bangnim ka saii lah ve? Nangmih he ka mikhmuh lamloh kang haek pawn ni. 31 Kai taengah na olcaeng nan thung uh vaengah khaw nangmih taeng lamloh ka maelhmai ka hoi pawn ni. Nangmih kah khotue hnin khaw, hla sae khaw, pumsa kah rhetnah khaw ka hnawt coeng. 32 Ka tueiyoeih tonghma rhoek te nangmih taengla kan tueih coeng dae, amih te na khuen uh tih na ngawn uh, a pum te maeh la na poel uh. Nangmih kah thii te kan suk ni. Boeipa loh he ni a thui.

33 Te dongah Boeipa loh he ni a thui. Na im te khopong la om vetih, khohli long cangkong a yawn bangla nangmih te kan haek ni. 34 Na ca rhoek long ca khueh mahpawh. Nangmih taengah om uh tih ka olpaek te a poe dongah ka mikhmuh ah a thae te a saii uh. 35 Na im te pilnam aka lo taengah ni ka paek eh. Amih loh kai kawng ya noek pawt dae kai n'tangnah uh. Ka olpaek a saii uh ham miknoek pakhat khaw amih ka tueng pawt dae ta. 36 Tonghma khaw hmu noek pawtdae a hnuksul pai hmuen te koep a thoelh uh ta. 37 Aka thoeng ham pilnam kah khoboe ham laipai ka khue ni. Ka pum he hmu uh pawt cakhaw ka thui ol he a mueihla neh a tangnah dongah a ca rhoek khaw omngaih kohoe neh om ni.

38 A pa khothoeng lamkah aka pawk pilnam kah hoemdamnah ke so lamtah hmu van lah. 39 Amih taengah mawt kung la, Abraham, Isaak, Jacob, Hosea, Amos, Micah, Joel, Obadiah, Jonah, 40 Nahum, Habakkuk, Zephaniah, Haggai, Zechariah, Malachi ka paek ni. Amih te Boeipa kah puencawn la a khue uh coeng.