1 Anunae Babylon neh Asia nang aih te! Anunae Egypt neh Syrian nang aih te! 2 Tlamhnin vaep lamtah maae mul mah bai laeh. 3 Nang soah cunghang han tueih coeng dongah u lae a hnuk la aka mael eh? 4 Na soah hmai han tueih coeng tih, unim aka thih lah ve? 5 Nang soah citcai han tueih coeng tih u long nim a vai lah ve? 6 Duup kah sathueng bungpong he aka vai khat khaw om nim? Hmai khaw vai hlup aka rhong keh aka thih thai om nim? 7 Lithen hlangtlung loh a kah palaa ke aka mael sak khat khaw om nim? 8 Boeipa Pathen loh citcai a tueih coeng tih u long te a haek thai eh? 9 A thinsa lamloh hmai thoeng vetih, u long a thih thai eh? 10 Amah te rhaek lah khophaa aka cu te u long a rhih pawt pai eh? Amah te khohum la a hum te u lae a thuen pawt pai eh? 11 Boeipa loh a toeh pawn ni, a mikhmuh ah ulae rhep aka yoka pawt pai eh? 12 Diklai neh a khoengim khaw tuen. Tuitun li khaw a laedil lamloh samboek coeng. Tuiphu neh a khukah nga rhoek khaw Boeipa neh a sarhi thangpomnah hmaiah limlum saeh. 13 A bantang kut loh a lii a tang kalak te a phuk coeng, A palaa loh pat a kah vetih diklai a bawtnah duek pakhat khaw a hmaai mueh la a kah ni. A palaa tah haa tih a kutnoek te a pit pawt dongah diklai a bawtnah hil rhenten a kah. 14 Citcai te a tueih phai coeng dongah diklai hman a pha hil ha mael mahpawh. 15 Hmai a tok coeng dongah diklai khoengim a tlum duela thih voel mahpawh. 16 Tlungluen lithen loh palaa aka bangla mael mah pawh. Te dongah diklai dongah citcai a tueih te mael mahpawh. 17 Ya-oe kai aih, ya-oe kai aih he, te khohnin vaengah u long nim kai n'hlawt lah ve?

18 Kothaenah a tongnah cuek ah, rhaengsaenah khaw muep om ni. Khokha a tong vaengah muep lamlum uh ni. Rhalpuei a tong vaengah sarhi khaw boeih let ni. Citcai a tong vaengah boeih thuen uh ni. Cicai a pai tanglang vaengah balae a saii uh eh? 19 Khokha neh lucik, longlonah neh norhuengnah tah hlanghing aka toel ham hmaitak bangla a tueih coeng. 20 He boeih a om lalah a boethae lamloh mael uh pawt tih toelnah rhuihet khaw lungbuei ah khueh uh pawh. 21 Diklai ah buh maeh bahoeng yoei tih pilnam loh mongnah ngaikhuek la om ni tila mang ana tuk ngawn saeh. Diklai ah citicai te sunghang la, khokha la, ngaihmang khobing la ha phuet bitni. 22 Khokhang dongah diklai khosa rhoek muep lamlum uh vetih, khokha loh a caknoi rhoek te cunghang dongah duek uh ni. 23 Aka duek rhoek te aek bangla a voeih uh vetih amih aka suem te khat khaw om mahpawh. Diklai he khopong la a hno uh vetih khopuei khaw boeih a koengloeng uh ni. 24 Khohmuen aka tawn neh aka tuh ham pakhat khaw paih mahpawh. 25 Thing kung te a thaih thai cakhaw u long a yoep eh? 26 Misur te hmuen cakhaw u long a sui eh? Hmuen takuem ah a dingrhak la boeih om ni. 27 Hlang loh a tloe kah hlang te hmuh ham te, hlang ol yaak ham te a hue uh ni. 28 Khopuei pum neh lohma ah khaw hlang rha bueng, thingko neh lungko ah aka thuk rhoek khaw panit bueng ni a paih eh. 29 Olive a yoep uh vaengah khaw olive thing pathum pali ni a paih eh. 30 Misur dum kah a bit uh vaengah ngaithuen la aka so rhoek long pataenga a bom a yol ni a paih pa eh. 31 Te khohnin ah tah cunghang neh amih im aka khe rhoek loh pathum pali ni a paih eh. 32 Diklai te khopong la a hno vetih khohmuen te a yoe pah ni. Longpuei lamhlawn ah hling a buk vetih boiva khaw yuel mahpawh. 33 Tongpa a om pawt dongah oila khaw nguek ni. Tongpa a om pawt dongah manu rhoek khaw nguek ni. Bomkung a tal dongah tanu rhoek nguekcoi uh ni. 34 Yulokung rhoek te caem loh a ngawn pah vetih a va rhoek khaw khokha ah lamlum uh ni.

35 Ol he hnatun laem lamtah yakming laeh, nang tah Boeipa kah sal ni. 36 He tah Boeipa kah ol ni. Te te doe lamtah Boeipa loh a thui te hnalval boeh. 37 Citcai he yoei coeng tih uelh voel mahpawh. 38 Huta bungvawn bangla, hla ko vaengah tah a ca-om tue loh yoei vaengah, lamhma la khonoek panit pathum vaenagh a bung bahoeng tlo tingtuel coeng. Te dongah camoe a om ham khaw a koe voel moenih. 39 Te dongah diklai dongla citcai aka loh uelh mahpawh, lunglai ngawn tah kopang vetih a tloh la hmuen takuem boeih a tuuk ni.

40 Ka pilnam aw, ka ol hnatun lah. Diklai dongah kholong bangla citcai lakli ah caemtloek la hlah uh laeh. 41 Hno yoi khaw aka rhaelrham bangla, hno lai khaw aka hlong bangla om uh laeh. 42 Bitat aka saii khaw a hoeikhangnah aka dang pawt bangla, im sa khaw a khui ah aka om pawt bangla, 43 cang aka tu khaw aka at pawt bangla, misur aka hloe long khaw a thaih aka yoep pawt bangla, 44 yulo vasa khaw camoe aka cun pawt bangla, yulo vasa mueh khaw nuhmai bangla, om saeh. 45 Thakthae rhoek khaw a poeyoek la thakthae coeng. 46 Kholong loh a thaih a yoep pa vetih a koe a poelyoe pah ni. A im a palet pa vetih a ca rhoek te a sol pah ni. Tamna neh khokha vaengah a ca a khue uh ni. 47 Tangka aka tlap khaw dawk a hmu vetih phaeng a khuen pah ni. Muep aka khueh a khopuei, a him, koerhang a hlang thoeihcam saeh. 48 A tholhnah bangla amih taengah ka thinsanah muep ka khuen pah ni a ti Boeipa long ni a thui. 49 Hinyah kap neh bihaam nu loh pumyoi a tuei bangla, 50 hlang dueng loh boethae a tuei. A hmuh vaengah a nai bahoeng kap mai cakhaw. Diklai dongkah tholhnah boeih aka khe loh a hmai, hmai ah rhep a dang vaengah u long anih a rhun eh?

51 Anih neh anih kah khoboe bangla om boeh. 52 Diklai lamloh boethae a khoe ham te a tue bahoeng toi ca tih duengnah loh mamih n'uk pawn ni. 53 Hlang tholh loh ka tholh pawh ti boel saeh, “Pathen neh amah thangpomnah hmaiah ka tholh pawh,” aka ti boeih kah a lu soah Pathen loh hmai alh a poep pa ni. 54 Pilnam kah a saii boeih te Boeipa loh rhep a ming. Amih kah mangtuk neh a poeknah khaw, a thinko khaw a ming. 55 “Diklai om saeh,” a ti tih om tangloeng. “Vaan khaw om saeh,” a ti tih om tangloeng. 56 A ol loh aisi khaw amah hmuen ah tluep a om sak tih, aisi kah a mi khaw boeih a ming. 57 Tangrhom dung neh a thakvoh khaw a khe, tuitunli neh a hmuenma khaw boeih a nueh. 58 Tui laklung ah tuitun khaw a khueh tih, a ol rhangneh diklai khaw tui soah poe. 59 Impuei bangla vaan khaw a yaal tih, a soah khaw tui khaw a khoem. 60 Khosoek ah tuisih a khueh tih tlang som ah tuibuem a khueh. Te dongah hmuen sang lamloh tuiva a long sak tih diklai ah tui a paek. 61 Hlang hing te a hlombol tih a pum laklung ah a thinko a khueh pah. Hlang te hil, hingnah neh yakmingnah, 62 tlungthang Pathen mueihla te rhip a paek. Amah loh a cungkuem te a saii tih a huephael hmuen kah a huephael te khaw a khe. 63 Nang khaw, na mangtuk neh na thinko kah na poeknah khaw a ming. 64 Anunae aka tholh tih a tholhnah aka hlipdah rhoek aih te. Boeipa loh a khoboe boeih te rhep a cawh pah vetih nangmih boeih khaw langya n'tai pawn ni. 65 Na tholhnah te hlang tloe taengah a phoe vaengah yah na poh bitni. Te khohnin ah na boethae te nang tholh aka phoe la pai ni. 66 Balae na saii van eh? Boeipa neh a thangpomnah hmai ah na tholhnah te metlam na phan eh? 67 Pathen he laitloekkung la om ngawn saeh. Amah te rhih lamtah na thohlnah lamloh paa laeh. Na boethae khaw hnilh ltam a khuila koep kun voel boeh. Boeipa long m'mawt saeh lamtah longlonah cungkuem lamloh na loeih bitni.

68 Kosi hmairhong loh nangmih kah hlangping muep a hoeh coeng. Nangmih lamkah a ngen tah a doek vetih mueirhol maeh te caak ham a tanolh ni. 69 Amih te tah na rhoi atah nangmih te n'lawn ni, n'nueihnah ni, n'hlak ni. 70 Khopuei taengkah hmuen takuem ah Boeipa aka rhih rhoek ham hnaemtaek, kuthlahnah om ni. 71 Hlang tloek rhooek tah hlang lueng rhoek bangla om uh ni. Boeipa aka rhih rhoek te lungma ti muehla a poelyoe vetih a thup uh ni. 72 Amih kah koerhang te a poelyoe uh vetih a im neh imkhui lamloh amih te a vai uh ni. 73 Te vaengah ka tuek hlang rhoek a noemcai vetih a rhilh hmai loh sui a noem cai bangla a rhilh te phoe ni.

74 Ka hlang tuek rhoek aw hnatun uh lah, Boeipa loh a thui lahko. Longlonah hnin tah kut dongah om coeng, a khui lamloh nangmih kan hlawt pawn ni. 75 Rhih boeh, uepvawt boeh Pathen tah nang hoihaeng kung la om. 76 Nang tah ka olpaek neh olrhi te na khoem coeng. Na tholhnah loh nang n'nan boel saeh lamtah, na boethae loh nang m'vuei boel saeh. 77 Anunae a tholhnah loh a ven tih a boethae loh a thing rhoek aih ke. Amih te lota loh a thing lohma bangla om tih a namtlak khaw hling malh sai. Tedongah aka pah thai khat khaw om pawh. 78 Te tah khobing coeng tih hmai long ni a hlawp mai coeng.