1 Boeinaphung parhih neh a manu te khaw a hnaemtaek uh tih rhuihet neh, rhuiboeng neh a boh uh, songrhai la ok sa cak ham khaw manghai loh a tanolh. 2 Amih khuikah pakhat tah hlangcal la pai tih, “Kaimih taengah balae nan dawt ngaih uh tih balae na cang uh? Kaimih he a pa rhoek kah olkhueng poe lakah tah duek ham he ka sikim uh coeng,” a ti nah.

3 Manghai tae a thinsa dongah buek coeng tih, thi-am neh baeldung te ling sak ham ol a paek. 4 Te phoeiah hlang cal kah a lai te hlueng pah ham, a vin te a lu lamloh hlai pah ham, a kut a kho te tloek pa lamtah a manu loh so saeh a tih nah. 5 A tloek pah kah boengha dongah a tat tloel vaengah tah anih te hmai kung la khuen tih a hing a sai neh thi-am dongah kae a ti nah. Thi-am dongkah a khu te yilh a caeh vaengah tah a boeinaphung ah amanu neh uepom la duek sih a tih uh. 6 Te dongah Boeipa Pathen tah mamih aka dawndah la om tih, oltak la mamih soah thinphatnah a khueh. Moses loh a pilnam taengah laipainah a khueh tih a laa neh, “A sal rhoek soah tah thinphatnah a khueh bitni,’ a ti ngawn coeng,” a ti uh.

7 Lamhma kah a manuca te a duek phoeiah tah a pabae te a luemnah ham a khuen uh. A vin te a lu lam loh a hlap pa uh tih, “Na pum dongah vae rhuh pakha phoeiah pakhat a tlawt lakah tah na ca mai aya?” a ti na uh.

8 Tedae amih a napa rhoek kah ol neh a doo tih, “Ka ca mapawh,” a ti nah. Te dongah anih te lamhma kah a manuca a saii bangla hnaemtaeknah neh a saii uh. 9 A mal a pat tom vaengah tah, “Hlang ngawn nah na saii uh, kaimih he hingnah lamloh na bit uh. Tedae lunglai boeih kah manghai loh dungyan hingnah thai dongah n'thoh bitni. Kaimih tah Boeipa kah olkhueng dongah ni ka duek uh ngawn,” a ti.

10 Te phoeiah a pathum te khaw amih luemnah khuiah maeh la a khuen uh. A hoe uh bangla a lai te khaw tlek a hlo pah tih, thinom la a kut te khaw a yueng pah. 11 Te vaengah uepom la, “He rhoek he vaan lamkah ka dang, a olkhueng ham tah he ka hloh moenih, amah taeng lamloh koep ka dang bitni tila ngaiuepnah ka khueh,” a ti. 12 Te vaengah manghai amah neh a taengkah rhoek te cadong kah a lungbuei te a ngaihmang uh. Anih loh a patangnah neh a hong lamni a ngai.

13 Anih a duek phoeiah tah a pali khaw te tlam te a phaep uh bal. 14 A dueknah a yoei vaengah tah, “Hlang khat long te hlang hing kut dongkah dueknah he a tuek mai lai moenih, tedae anih aka thohkoepnah aka pae ham Pathen dongah a ngaiuep te ni a uem. Te dongah nangmih tah thokoep hingnah na dang mah pawh a ti nah.

15 Te phoeiah a panga te a khueh uh tih a hnaemtaek uh bal. 16 Tedae manghai te a sawt tih, “Hlang duek la na om dongah hlang suek soah ni anaa na khueh, na ngaih bangla na saii. Pathen loh ka pilnam a hnawt tila poek boeh. 17 Ngaithuen lamtah, tlungthang kah thaomnah loh nang neh na cadil rhoek metla n'sai khaw ana so nawn,” a ti nah.

18 Anih phoeiah tah a parhuk te a khuen uh. Anih te a duek tom vaengah tah, “Lungli lungla la namah thailatnah boeh. Kaimih ka duek he kamih kah dumlai dongah ni, ka Pathen taengah ka tholh uh dongah ngaihmangnah khaw ha thoeng coeng. 19 Tedae Pathen na tloelh hamla na tlungmu dongah dantat mueh la na cet mahpawh tila poek boeh,” a ti nah.

20 A manu kah a ol ta-oe tah hinyah kap tih poek phat koi la om. Hin at dongah a ca parhih a duek te a khaw a hmuh dae Boeipa dongah a ngaiuep dongah thinomnah neh boethen ni a cuen pah. 21 A ca rhoek te a napa rhoek kah olka neh a hloep. 22 Hinyah kap mueihla neh baetawt tih a huta kah poeknah te khaw tongpa kah poeknah loh a khuk. Te dongah a ca rhoek te, “Ka bung khuiah metla na lo uh khaw kam ming pawh, nangmih hingnah neh hil aka pae khaw kai moenih, na khuiah hnopai tluep aka khueh khaw kai moenih. 23 Te dongah diklai aka suekkung, hlanghing he a tongnah lamloh aka hlinsai tih, hno cungkuem kah a hnun aka suen loh rhennah neh hingnah m'pae vetih, na hil khaw koep m'paek bitni. A olkhueng kawng dongah namamih te hnilh uh laeh,” a ti nah.

24 Antiochus loh amah te soesalnah neh n'toeh tih a hnonah olphoh soah ngaihoihnah a khueh. A mana a noe khit te hing pueng dongah, anih te ol neh a hloep bueng kolla, a olcaengnah neh khaw anih boei la khueh ham ol a khueh pah. A napa rhoek kah khosing lamloh a nong tah paya khueh veih ram kah bibi khaw paeh hamla a thui pah. 25 Camoe loh manghai ol te a hnatun pawt dongah a manu a khueh pah tih amah daemnah ham camoe te a hloep sak. 26 Anih lamloh muep a cahoeh coeng dongah a capa te a hloep pah. 27 A taengla a pha vaengah tah manghai hlang muen te a thainah tih, a capa te amh ol neh, “Ka capa aw, kai he lungma ti mai, kai long nang ka bung khuiah hla ko kan yom, kum thum kang khut coeng, nang kang kueinah tih na hingnah loh tahae kah hmuen a pha coeng, namah te tuem uh nawn. 28 Ka capa nang ni kan hloep coeng, vaan ke so lamtah diklai neh a khuikah aka om boeih khaw hmu lah. Te boeih te Pathen loh aka om tangtae khui lamkah a suen moenih. Hlang hing koca loh aka hing a om he khaw amah te tlam ni. 29 He kah hlang aka ngawn he rhih boeh na maya rhoek kah uepomnah mah tueng sak. Te daengah nih na maya rhoek neh Pathen kah lungvat dongah koep kan dang uh eh,” a ti nah.

30 A thui li vaengah tongpa ca loh, “Balae na rhing? Manghai kah olpaek te ka ngai mahpawh, tedae Moses kut dong lamloh a pa rhoek taengah a paek olkhueng ol ni ka ngai eh. 31 Tedae Hebrew hlang taengah hing toinah aka saii nangmih boeih te ngawn tah Pathen kut dong lamloh na loeih uh mah pawh. 32 Kaimih he ka tholhnah phu ka yook uh mai ca khaw. 33 Kamih kah aka hing Boeipa he kolkalh ah a thintoek tih kaimih he n'toel mai cakhaw a sal rhoek taengah moeithennah koep a khueh bitni. 34 Tedae nangmih hlang rhalawt rhoek, hlang boeih khuiah hlang rhalawt koek, a honghi nen khaw ngaingaih uh boeh, a hohing ngaiuepnah neh khaw phuel uh boei. Vaan kah a ca rhoek te kut na thueng thil van bal pueng. 35 Cungkuem aka hmu Pathen tlungthang kah laitloeknah khui lamloh na tloeih uh voel moenih. 36 Ka maya ngawn tah patangnah te kolkalh ni a ueh tih Pathen kah paipi hmuikah hingnah aka long te a ok uh coeng. Tedae nangmih te Pathen kah laitloeknah rhangneh na thinlennah dongah dantatnah na dang uh coeng. 37 Ka maya rhoek te ka lungah ta. A pa rhoek kah olkhueng dongah a pum neh a hingnah khaw a paek uh coeng. Pilnam taengah haidamnah tueng sak ham Pathen taengah a huithui coeng. Nangmih te tloh neh lucik loh n'saii vetih Pathen amah ni Boeipa tila na phong uh bitni. 38 Kai neh ka maya rhoek dong lamlong tah ka namtu taengah Tlungthang kah kosi aka tla he a bawtnah la om mai pawn saeh,” a ti.

39 Anih kah ol loh manghai te a yan coeng dogah a thintoek te nah nih a tloe rhoek lakah a thae la a saii. 40 Boeipa dongah rhep a pantung dongah uepom la duek van.

41 A hnukkhueng kah a ca rhoek a duek phoeiah tah a manu te khaw duek.

42 Hmueih a caaknah kawng te a tloh la hnaemtaeknah kawng te he ah he rhoeh mai pawn saeh.