1 Kum ya sawmli kum ko vaengah Judas neh a hlang rhoek taengah, Antiokus Eupator tah rhalkap a yel neh Judea a paan ti ol te a yaak. 2 Te vaengah uktaemnah aka hutkung la aka om, a taengom Lysias khaw a taengah om. Amih te Greek rhalkap thawng yakhat neh thawng rha, marhang caem thawng nga yathum, vuei pum kul pum nit, tumca leng yathum te caem la rhip a khueh uh.

3 Menelaus khaw amih taengla kap tih Antiokus te thailatnah neh a palawh. Anih long te a ram kah khosaknah ham poek pawt tih amah khosoih bibi pai sak ham ni a ngaih. 4 Tedae manghai rhoek kah manghai Antiokus kah thintoek tah hlangthae taengah sai coeng. 5 Anih te laikung ni tila Lysias loh manghai taengah a thui pah. Te dongah Menelaus te Beroea la khuen tih te hmuen kah khosing neh a longim bangla duek sak ham ol a paek. Te ah te dong sawm nga aka sang im sang pakhat om tih hmaiphu muep bae. A rhai lamlong te hmaiphu khui la kiki sungling thuk. 6 pathen taengah tholnah aka khueh khaw, dumlai dongah ming aka thang khaw te ah a tulh uh tih a duek sak uh. 7 Te bang yoekam te olkhueng aka aep Menelaus taengah khaw pai tih diklai ah khaw a vuei kangna kolla duek. 8 He bang laitloeknah he tiktam pai. Anih he hmueihtuk taengah khaw tholhnah muep a khueh coeng. Tekah hmai neh hmaiphu pataeng cim dae ta. Te dongah anih he hmaiphu khuiah dueknah a hmuh.

9 Manghai a muen neh mangkhak la cet tih a napa tue vaengkah a saii lak a thae ngai hno te Judah rhoek taengah a tueng sak. 10 Tedae Judas loh he a yaak vaengah tah, Boeipa taengah khoyin khothaih thangthui tih, Olkhueng khaw, a ram khaw, a bawkim cim khaw a porhak la a om vaengah bomnah om yoeyah ham, 11 pilnam te hlapham pawt ham neh, Gentiles kah soehsalnah kut khuiah cungkunah om pawt ham ol a paek. 12 Amih te rhenbihnah pakhat dongah boeih cut uh tih, sitlohnah Boeipa te rhah neh, yaehnah neh, doei yalh uh tih bawt mueh la, hinthum khui ah thangthui uh. Judah loh amih te a thaphoh tih sikim la pai ham ol a paek.

13 A hamca rhoek te a huep la a dawt phoeiah manghai rhalkap loh Judea a muk tih khopuei a hul hlan ah, Pathen kah bomnah rhangneh caeh hamla cai. 14 Te dongah kotamnah boeih te diklai Suenkung taengah a hal tih, a lambong te khaw olkhueng, bawkim, khopuei, khohnuen neh rhaenpuei ham tah dueknah hil rhalthen la tloek ham a thaphoh. Te vaengah a dap te Modein taengah a tuk. 15 A lambong te, “Pathen kah caemthang,” tila rhalrhing a paek. Cathong rhalthen a coelh rhoek neh khoyin ah manghai kah buep te a muk tih dap khuikah hlang te thawng hnih hil muep a ngawn. Vuei len neh a sokah aka ngol te khaw a khah. 16 A bawtnah ah dap te mueirhih neh, ngaihmangnah neh bae tih tanah neh khoe uh. 17 Boeipa kah bomnah rhangneh anih te a tungaep dongah he he boeih a om neh, khothaih pahoi a pha coeng.

18 Manghai loh Judah rhoek kah a rhalthen te a ten coeng dognah amih kah namtlak a vueh tih a paihmuen a tloek. 19 Judah rhoek rhalmah vong aka cak Bethzur te a paan dae vik mael. Koep a tloek dae vik yawk bal. 20 Judah loh a ngoenah bangla rhalmah boeih a tueih. 21 Tedae Judah rhaengsang hlang lamkah Rhodocus long tah rhal taengla olhuep a thak. Te dongah anih te a tlap uh tih a tuuk phoeiah tah thongim ah a khueh uh. 22 Manghai te Bethzur kah pilnam neh a paek la voek uh thae. Amih kotluepnah a paek tih a doe phoeiah khoe uh. Tedae Judas neh a hlang rhoek loh a tloek tih yawk bal. 23 Te vaengah uktaemnah aka hutnah ham a khueh Philip tah Antiok ah boe a koek tila ol a yaak tih nga coeng. Judah rhoek te a khueh tih a hamsum te boeih paek ham, amih neh khosak tih hmueih nawn ham, rhokso te hinyahnah tih hmuen cim ham tah moeihoeihnah tueng sak ol a kam. 24 Makkabi te a doe phoeiah tah Hegemonides tah Ptolemais lamloh Gerar hil kah khoboei la a caeh tak. 25 Ptolemais la a caeh vaengah, Ptolemais kah pilnam tah paipi te a noih uh. Te dongah a thintoek uh tih a khuikah aka om te boeih hnawt hamla a ngaih uh. 26 Lysias tah toltung ah langya cet tih a thenkoek la a tungaep, amih te tha a paek, amih te a sim tih amih kah boethen te a dang. Te phoeiah Antiok la cet. He tah manghai kah a tloek kawng, a voei a bal kawng ni.