THESSALONIKA CAPAT
A Pabae Nah
(Second Letter to the Thessalonians)
THESSALONIKA CAPAT
Thessalonika hlangboel rhoek he tangnah neh lungnah dongah a rhoeng uh he ni Paul loh Pathen a uemnah lamhmacuek (chapter 1.3). Amih te ngaihmangnah muep om dae Pathen kah datatnah pawt tih noemcaihnah ni tila amih taengah a thui (1.4,5).
A ngen long tah Paul kah capat dongah Khrih a pabae halo coeng baboel tah tah a ti uh (2.2). Tedae hlang ang bangla om uh boeh a ti nah (2.3).
Paul loh yalpo bingak he a ngaih moenih (3.6-10), ol aka ngai pawt te a then la rhalrhing uh a ti nah.
Sawt Yoeinah
Kuttuknah (1.1,2)
Boeipa halo vaengah tiktamnah (1.3-12)
Boeipa ha mael hlan (2.1-12)
Uepomnah (2.13-17)
Thangthuinah neh bibinah (3.1-15)
Hnukkhueng kah thangthuinah (3.16-18)
1
Uemnah Ol
1 Clt 17.1Paul, Silvanas neh Timothy loh Thessalonika kah hlangboel te a pa Pathen neh Boeipa Jesuh Khrih ah kan yaak sak uh. 2 A pa Pathen neh Boeipa Jesuh Khrih lamkah lungvatnah neh ngaimongnah nangmih taengah om saeh.
Pathen kah Laitloeknah neh Thangpomnah
3 Manuca rhoek nangmih ham Pathen te uem yoeyah ham ka kuek uh. Te tla a om tueng pai. Nangmih kah tangnah te rhoeng khunghak tih nangmih boeih pakhat rhip lungnah tah pakhat taengla pungtai. 4 Nangmih kah uehnah neh nangmih taengkah hnaemtaeknah, phacip phabaem boeih khaw tangnah neh na yaknaem uh. Te dongah kaimih khaw Pathen kah hlangboel rhoek lakliah nangmih ham ka pomsang uh.
5 Pathen kah aka dueng laitloeknah te a mingphanah ni. Pathen ram neh na tiing uh ham dongah te ham te na patang uh van. 6 Hmaitak khuiah amah kah thaomnah puencawn rhoek neh vaan lamkah Boeipa Jesuh kah a pumphoenah dongah, 7 phacip phabaem neh nangmih aka lawn rhoek khaw, hlang aka lawn nangmih khaw, kaimih taengkah hilhoemnah neh sah ham he Pathen hmaiah dueng ngawn. 8 Pathen aka ming pawt rhoek neh mamih Boeipa Jesuh kah olthangthen aka ngai pawt rhoek te kutthungnah a paek. 9 Isa 2.10Te rhoek tah Boeipa mikhmuh lamkah neh a thadueng kah thangpomnah lamloh kumhal rhawpnah te dantatnah la a paek ni. 10 Ha pawk vaengah a hlangcim rhoek neh thangpom uh vetih aka tangnah rhoek boeih khuiah a ngaihmang uh ni. Tekah khohnin ah nangmih taengah kaimih kah laipai te a tangnah uh coeng. 11 Te dongah nangmih ham khaw ka thangthui uh taitu. Te daengah ni mamih kah Pathen loh n'khuenah neh na tingtawk uh vetih boethennah kah kolonah neh saithainah loh tangnah bibi boeih a soep sak eh. 12 Te daengah ni nangmih ah mamih Boeipa Jesuh ming te a thangpom vetih mamih kah Pathen neh Boeipa Jesuh Khrih kah lungvatnah bangla amah ah nangmih khaw n'thangpom eh.