TIMOTHY CAPAT
A Pabae Nah
(Second Letter to Timothy)
TIMOTHY CAPAT PABAE KAWNG
Lamhma kah lakah khaw a pabae dongah he Paul loh Timothy amah ham oluennah muep a khueh. Timothy he a oingaih a ca la om tih thangthuinah dongah rhawp a khueh (chapter 1.2,3). Timothy loh muep a ueh dongah Khrih kah rhalkap then la om (2.1,3). Timothy he a manu neh a numca loh mueihla ben ah a rhoengnah hamla a camoe lamloh a tukkil coeng.
Cuekcawnnah dongah aka man cadong caloe rhoek bangla om pawt ham khaw a rhalrhing sak (2.20-26; 3.1-9). Olthangthen thui khaw mah kah mingthennah ham boel saeh lamtah Pathen ram ham saeh (4.2). Te dongah laithae saya rhoek khaw a rhalrhing sak.
Paul loh a dueknah tue khaw laplap a ming, tedae uepomnah thapang khaw anih hamla om coeng (4.6-8), dongah Timothy olrho a pat ( 2.11,12a).
Sawt Yoeinah
Timothy kuttuknah neh thangthui nah (1.1,2)
Boeipa ham atah yak boeh (1.3-18)
Khrih kah rhalkap then la om lah (2.1-26)
Khohnin a bawtnah kah hlang khosak (3.1-9)
Uepom la om phat la (3.10—4.8)
Uennah neh hnukkhueng olrho (4.9-22)
1
Kuttuuknah
1 Jesuh Khrih ah hingnah olkhueh vanbangla Pathen kah kongaih neh Jesuh Khrih kah caeltueih kai Paul loh ka ca thintlo Timothy taengah kan yaak sak. 2 Clt 16.1A pa Pathen neh mamih Boeipa Jesuh Khrih kah lungvatnah, rhennah, ngaimongnah om saeh.
Uemonah
3 Pathen taengah lungvatnah ka khueh. Amah te manu napa lamloh mingcimnah neh a caih la ka bawk. Nang ham poekkoepnah te khoyin khothaih kamah kah rhenbihnah dongah puet ka khueh. 4 Nang kah mikphi te ka poek vaengah omngaihnah neh ka baetawt hamla nang hmuh ka rhingda. 5 Clt 16.1Na khuikah tangnah taktak te thoelhnah la ka loh. Te tah na numca Lois neh na nu Euniki khuiah ana hing lamhma coeng. Te dongah namah khuikah te ni ka pang van. 6 Te paelnaehnah dongah Pathen kah kutdoe te huek hamla nang kan thoelh. Te tah kai kah kut tloengnah lamloh nang soah om coeng. 7 Pathen loh mamih ham rhalyawpnah mueihla m'pae pawt tih thaomnah, lungnah neh kuemsuemnah ni m'paek.
Olthangthen Yah Puei Boeh
8 Te dongah mamih Boeipa kah laipai ham amah kah thongtla la kai ka om khaw yak boeh. Tedae Pathen kah thaomnah tarhing ah olthangthen te patang puei. 9 Mamih n'khang tih aka cim khuenah neh n'khue te mamih kah bibi nen pawt tih Pathen amah kah mangtaengnah neh lungvatnah rhangnen ni. Te te khosuen tue hlanah ni Jesuh Khrih ah mamih m'paek coeng. 10 Tedae mamih khangkung Khrih Jesuh kah a phoenah dongah tah phoe coeng. Dueknah te a hmil ngawn coeng, hingnah neh aka nguel te khaw olthangthen lamloh a yaal coeng. 11 1Ti 2.7Te ham ni olhoe neh caeltueih neh saya la kai m'hmoel. 12 He paelnaehnah dongah ka patang van coeng he. Tedae ka tangnah te ka ming tih ka yak pawh. Ka hnokhueh he te khohnin due dawndah ham a coengthai la a om te ka ngaitang coeng.
Tangnah dongah Uepomnah
13 Jesuh Khrih ah tangnah, lungnah neh kai lamkah na yaak aka soep olka kah a ninglam te muk lah. 14 A then hnokhueh te mamih ah aka hing Mueihla Cim lamloh tuem ne. 15 Asia kah rhoek loh kai boeih n'nong tak uh te na ming. Amih khuiah Phikelu neh Harmokene khaw om. 16 Onesiphor im ah Boeipa loh rhennah han khueh saeh. Kai he n'caih sak taitu tih kai kah kuelrhui te yah puei pawh. 17 Tedae Rom ah aka om loh kai te ngahngah n'toem tih m'hmuh. 18 Tekah khohnin ah Boeipa kah rhennah dang sak ham Boeipa loh anih ham pae saeh. Rhep na ming bangla Ephesa ah khaw bahoeng n'bomcen.