BARUCH
BARUCH CABU KAWNG
Baruch cabu he Jeremiah kah cataelkung Baruch loh a tael. Rhainah khui ah Baruch long he ca muep a tael van. Anih he Jeremiah neh rhep a ven uh rhoi khaw uepvawtnah om pawh. Anih he BC 586 tluk vaengkah Jerusalem ah kho a sak. Pathen kah duengnah neh cueihnah kawng a tael. Thinsen rhoek kah rhenbihnah tah Pathen loh a hnatun a ti. Jews rhoek he Pathen kah dantatnah a yook ham rhoela tueng. Pathen loh Jews rhoek te a hlak dae a dangkhit la a hlak moenih. Amah sitlohnah loh thangpomnah khuila koep a thoh ni. Hekah cabu BC 200 tluk rhuet vaengah a tael.
Sawt Yoeinah
Ol rhannah 1.1-14
Thangthuinah neh hlawtnah 1.15—3.8
Cueih thangpomnah 3.9—4.4
Jerusalem bomnah neh hloepnah 4.5—5.9
1
Baruch neh Babylon kah Judah Rhoek
He cabu dongkah ol he Hilkiah capa, Hasadiah kah a ca, Zedekaih koca, Mahseiah kah a ca, Neriah capa Baruch loh a daek. Khalden loh Jerusalem a hoeh tih hmai a hlup kum, a kum nganah, hla rhih vaengah a daek. He cabu dongkah ol Baruch loh Judah manghai Jehoiakim capa Jekoniah neh cabu hnatun ham aka loh pilnam boeih taengah khaw, boei rhoek neh, mangpa rhoek taengah khaw, a hamca rhoek neh, pilnam a yol a len Babylon kah Sud tuiva kah khosa rhoek taengah khaw a tae pah. Te vaengah rhap uh tih a yaeh uh, Boeipa mikhmuh ah thangthui uh. Tangka khaw a paek thai carhui tah a coi uh. Te te Jerusalem kah Shallum koca, Hilkiah capa khosoih boei Jehoiakim taeng neh, Jerusalem kah pilnam boeih taengla a pat uh. Amah te vaengkah Sivan hla a hnin rha vaengah tah Baruch loh Boeipa im umam te a loh. Te tah hnuk vaengah Jerusalem bawkim kah ni a khuen uh. Te dongah Judah kho la koep a mael puei uh. Te kah cakben umam tah Judah manghai Josiah capa Zedekiah loh a saii. Babylon manghai Nebukhadnezzar loh Jekoniah khaw, mangpa rhoek khaw, thongtla khaw, boei rhoek khaw, khohmuen pilnam khaw, boeih a tuuk tih Babylon la a khuen.
Jerusalem ham Capat
10 He ah nangmih taengah tangka kan pat, he tangka nen he hmueiphumnah khaw, boirhaem khaw, khocang khaw lai uh lamtah mamih kah Pathen Boeipa kah hmueihtuk dongah nawn uh. 11 Babylon manghai Nebukhanezzar kah khosak ham khaw, a capa Belshazzar khosaknah ham khaw thangthui uh. Te daengah ni amih kah diklai tuetang he vaan tuetang bangla a om eh. 12 Boeipa loh mamih te thdueng neh mik tuengnah khaw m'paek bitni. Mamih khaw Babylon manghai Nebukhadnezzar kap hoeptlangnah hmui neh, a capa Belshazzar kah hoeptlangnah hmuiah khosa uh sih. A mikhmuh kolonah koila kum a sen thotat uh sih. 13 Kaimih ham khaw mamih kah Boeipa Pathen taengah thangthui uh. Mamih kah Pathen Boeipa taengah n'tholh uh coeng. Tahae khohnin duela Boeipa kah thintoek neh kosi he a mael voel moenih. 14 Nangmih taengah cayol kan pat a len la tae uh. Khoning neh khotue vaengah khaw Boeipa im tholh phongnah khueh uh.
Tholh Phongnah
15 Te vaengah he tlam he thui uh. Kaimih kah Boeipa Pathen tah thuem pai oe. Tedae tihnin ah kaimih soah yah ham phen uh coeng. Judah pilnam soah, Jerusalem kah khosa rhoek soah khaw, 16 ka manghai rhoek, ukkung rhoe, ka khosoih rhoek, ka tonghma rhoek, neh a pa rhoek soah khaw. 17 Boeipa nang hmuhah ka tholh uh coeng. 18 A ol ka ngai uh pawt tih ka Pathen Boeipa ol dongah hna ka kaeng uh pai moenih. Kaimih mikhmuh a khueh Boepa kah oltlueh dongah ka pongpa uh moenih. 19 Boeipa loh a pa rhoek te Egypt lamloh a khuen parhi, tihnin hil he, Boeipa Pathen kah ol ka ngai uh moenih. Ka altha uh tih a ol te ka hnatun uh pawh. 20 Te dongah tahae ah tah citcai neh kosi te ka boep uh. Te tah a pa rhoek te khotui neh suktui a long tah khohmuen paek hamla Egyp lamloh a khuen vaengah, a sal Moses kut dongah Boeipa loh a thui coeng. 21 Kaimih taengla han tueih tonghma rhoek ol cungkuem dongkah Pathen Boeipa ol te ka hnatun uh pawh. Kaimih kah halng thinko, mah kongaih bueng te kai vai uh. A tloe kah sungrhai taengah tho ka thueng uh. Te te kaimih kah Pathen Boeipa mikhmuh ah bahoeng thae coeng.