DANIEL
(The Book of Daniel)
Daniel Cabu Kawng
Daniel cabu he olcueih cabu la om tih tonghma ol, khokhuen cil, hmalong mangthui kawng khaw a tael. Lamhma kah a boel dongah he Babylon vangsawn ah aka om Hebrew hoel Daniel neh a hui rhoek kawng a thui. Daniel neh a hui rhoek tah Pathen kut dongah uepom la om tih a mih Babylon ah cueihnah a then la a cangpuei. Daniel tah bahoeng cueih tih hlang loh a ming mueh mang khaw boeih a thuicaih thai. Nebuchadnezzar kah hmaihueng khui lamkah khaw Pathen loh Daniel neh a hui rhoek te a khang. Daniel he hlang loh a uet tih phae hamla a taeng dongah Daniel te sathueng khui la a voeih. Tedae Pathen loh Daniel koep a khang. Daniel loh mang a hmuh te Pathen caeltueih loh koep a thuicaih pah. Lunglai boeih aka tu kung tah Pathen ni ti a thui. Ramtloe kah uknah hmuiah aka om a pilnam te Pathen ngaiuepnah neh a hloep.
Oltlueng Rhoek
Babylon kah Daniel kawng 1.1—6.28
Daniel kah mangthuinah 7.1—12.13
1
Daniel Te Babylon La a Khuen
1 2Mg 24.1; 2Kh 36.5-7Judah manghai Jehoiakim kah a ram, a kum thum vaengah Babylon manghai Nebukhanezar te cet tih Jerusalem te a taengah a dum. 2 2Mg 20.17,18; 24.10-16; 2Kh 36.10; Isa 39.7,8Te vaengah ka Boeipa loh Judah manghai Jehoiakim neh Pathen im kah hnopai ca te Nebukhanezar kut ah a paek. Te dongah te rhoek te Shinar khohmuen kah a pathen im la a khuen tih hnopai te a pathen kah thakvoh im ah a khueh.
3 Te phoeiah manghai loh amah kah imkhoem puei Ashpenaz te Israel ca lamkah neh mangpa tiingan lamkah khaw, angrhaeng rhoek lamkah khaw khuen hamla a thui pah. 4 Te vaengah a taengah a lolhmaih pakhat khaw aka om pawh camoe rhoek neh a mueimae aka then, cueihnah cungkuem neh aka cangbam, mingnah aka ming, cangnah aka yakming neh amih taengah thadueng aka om tah manghai bawkim ah om ham neh amih te Khalden ca neh ol tukkil hamla a khueh. 5 Manghai loh amih ham tah a hnin hnin ah a hmuethma a khueh pah. Manghai buh neh a buhkoknah misurtui paek tih kum thum khuiah amih te pantai sak ham, a tloihsoi ah manghai mikhmuh ah pai sak ha a uen. 6 Amih lakli ah Judah koca lamkah Daniel, Hananiah, Mishael neh Azariah om. 7 Amih te imkhoem mangpa loh ming a paek tih Daniel te Belteshazzar la, Hananiah te Shadrakh la, Mishael te Meshakh la, Azariah te Abednego la a khueh pah.
Babylon ah Uepomnah
8 Tedae Daniel long tah manghai buh neh, a buhkoknah misurtui neh a nok uh pawt ham a lungbuei ah a khueh. Te dongah a nok pawt ham imkhoem mangpa te a dawt. 9 Pathen loh Daniel te imkhoem mangpa mikhmuh ah sitlohnah neh haidamnah a paek rhoe a paek. 10 Tedae imkhoem mangpa loh Daniel te, “Kai khaw ka boei manghai te ka rhih ta. Anih long ni na caak na buhkoknah he hang khueh. Camoe kah na omngaihnah lakah balae tih na maelhmai te hmai aka tal la a hmuh eh? Ka lu he manghai taengah nan mop coeng,” a ti nah.
11 Te vaengah Daniel loh buhtaem, (Anih te Daniel, Hananiah, Mishael neh Azariah soah imkhoem mangpa la a khueh) taengah, 12 “Na sal rhoek he hnin rha khuiah n'noemcai mai lamtah ankak mah kaimih m'pae mai saeh. Ka caak uh khaw tui neh ka yun uh eh. 13 Te phoeiah kaimih kah mueimae neh manghai buh aka ca camoe rhoek kah mueimae te namah mikhmuh ah tueng saeh. Te vaengkah na hmuh bangla na sal rhoek taengah saii,” a ti nah.
14 Te dongah hekah ol bangla amih te a rhoi tih hnin rha khuiah amih te a noem. 15 Hnin rha a thoknah dongah amih kah mueimae te a then la a sawt. Te vaengah manghai buh aka ca camoe boeih lakah a pumsa toitup. 16 Te dongah buhtaem loh amih kah buh neh a buhkoknah misur te a puen tih amih te ankak a paek.
Uepomnah Thaphang
17 Tedae amih pali, camoe rhoek tah Pathen loh a taengah cangnah dongah cabu neh cueihnah boeih te cangbam hamla a paek. Te dongah Daniel loh mangthui neh mueimang te boeih a yakming. 18 Khohnin kuepnah a pha vaengah amih khuen hamla manghai loh a thui pah tih amih imkhoem mangpa loh Nebukhanezar mikhmuh ah a khuen. 19 Manghai te amih taengah a voek vaengah Daniel, Hananiah, Mishael neh Azariah bang he amih boeih khui lamloh hmu pawh. Te dongah amih tah manghai mikhmuh ah pai uh. 20 Olka cungkuem dongah cueihnah neh yakmingnah amih lamkah te manghai loh a cae vaengah amih tah a ram pum kah khungvatuk neh hmayuep boeih lakah a kut parha la a hmuh. 21 Daniel tah manghai Cyrus kah a kum khat nah hil om.