EPHESA
(Letter to the Ephesians)
EPHESA CAPAT KAWNG
Paul loh Ephesus Khrihca rhoek taengah ca a pat he a tha bahoeng om. Mamih loeih daemnah ham nih thinglam dongah Jesuh a duek (1.7,8). Tedae Pathen loh Khrih te dueknah khui lamkah a thoh sak. Te dongah Khrih loh diklai he a uk coeng. Hmailong ah khaw dungyan la a uk bal pueng ni (1.20,21).
Judah neh Gentile aka paekboe sak vongpuei te Khrih loh a phae tih Judah neh Gentiles tah pakhat la om coeng (2.14). Amih te Pathen Mueihla Cim a omnah Bawkim cim ah pakhat la a cului coeng (3.11).
Pilnam boeih kah a napa Pathen tah Boeipa Pakhat, Mueihla pakhat neh Pathen pakhat bueng ni a om (4.4,5). Mueihla loh thinko lungbuei pakhat la a khueh coeng atah Khrihca rhoek khaw thin at ko at la om saeh (4.3). Pum khat la omnah kawng he Ephesa capat dongah voei kul tluk a thui. Te dongah tangnah pakhat, baptistma pakhat long pum pakhat la n'coeng sak.
Ephesus he Asia Minor (Turkey) ram kah khotlak tupuei tungkaeng ah om. Paul tue vaengah tah Roman ram khuiah a pali nah khopuei len la om van. It Te vaengah amih kho ah te Artemis pathen nu muep a bawk uh (Caeltueih 19).
Paul loh Ephesa rhoek te hingnah thai dongah hing sak a ngaih (4.17—5.20). Pathen hnukbang rhoek neh Pathen ca rhoek tah amah te a tingtawk la hing saeh (5.1). Yinnah neh a hmuep kah khosa rhoek khaw tahae atah khothaih khosae ah kho sa pawn saeh (5.8,9).
Paul loh yuu neh va kawng, manu napa ka moeiboe, ca na kah moeiboe kawng dongah Khrihca imkhui cako kawng a thui. (5.21—6.9).
Ephesus capat he AD 60 tluk vaengah a tael.
Sawt Yoeinah
Kuttuknah (1.1,2)
Khrih ah Yoethennah (1.3—3.21)
Khrih neh pumkhat la omnah (4.1—6.20)
Oluennah (6.21-24)
1
Uemnah Ol
1 Clt 18.19-21; 19.1Pathen kah kongaih neh Jesuh Khrih kah caeltueih Paul loh Ephesa kah aka om hlang cim rhoek neh Jesuh Khrih ah uepom [kan yaak sak].
2 Boeipa Jesuh Khrih neh a pa Pathen taengkah lungvatnah neh ngaimongnah tah nangmih taengah om saeh.
Pathen kah Yoethen Cungkuem
3 Pathen neh mamih kah Boeipa Jesuh Khrih kah a napa tah uemom la om pai saeh. Amah loh Khrih ah vaan kah mueihla yoethennah cungkuem neh mamih n'uem coeng. 4 Mamih he Lungnah neh amah hmuh ah cimcaih tih cuemthuek la om ham diklai a tong hlanah amah dongah mamih n'tuek pataeng coeng. 5 Amah kah kongaih, kolonah vanbangla amah ham Jesuh Khrih lamloh cacah la mamih n'nuen coeng. 6 A lungvatnah dongkah thangpomnah he koehnah la om pai. Te nen ni lungnah dongah mamih n'lungvat. 7 Kol 1.14A thii lamloh amah dongah tlannah n'dang uh. A lungvatnah dongkah khuehtawn vanbangla tholhdalhnah dongkah khodawkngainah te khaw n'dang uh. 8 Tekah te mamih ah cueihnah cungkuem, lungcueinah neh a baetawt sak. 9 A kongaih kah olhuep te mamih taengah phoe coeng. 10 A kolonah bangla amah khuiah a hmoel te a tuetang a soepnah dongah hnokhoemnah la om coeng. A cungkuem he vaan kah neh diklai kah khaw, Khrih amah dongah cuii sak ham om.
11 A kongaih kah mangtaengnah bangla boeih pongthoo tih, a mangtaengnah vanbangla a nuen rhoek long tah amah dongkah te m'pang uh van coeng. 12 Te dongah amah kah thangpomnah Khrih ah koehnah la mamih n'om ham n'ngaiuep. 13 Nangmih khaw amah dongah ni namamih kah khangnah olthangthen oltak olka te na yaak uh. Amah aka tangnah tah olkhueh dongkah Mueihla Cim neh kutnoek n'daeng thil coeng. 14 Te tah koe dongah tlannah duela, a thangpomnah dongkah koehnah te mamih kah rho cungah la om.
Mueihla ben ah Thangthui nah
15 Te dongah Boeipa Jesuh dongah tangnah neh hlangcim rhoek boeih taengah lungnah te nangmih taeng lamloh ka yaak. 16 Te dongah nangmih ham toeng kolla aka uem loh ka thangthuinah dongah poekkoepnah ka khueh. 17 Te daengah ni mamih Boeipa Jesuh Khrih kah Pathen, thangpomnah a pa loh amah mingnah dongah pumphoenah neh cueihnah mueihla te nangmih m'paek eh. 18 Amah kah khuenah dongah ngaiuepnah aka om te na ming hamla nangmih thinko mik tueng uh. Amah rho dongkah thangpomnah khuehtawn te tah hlangcim rhoek soah om. 19 A thaomnah, a lennah aka baekhawk te tah a thadueng kah thaomnah bibi bangla aka tangnah mamih taengah om.
Khrih ah Pathen kah Saithainah
20 Tgt 110.1Te tah duek lamkah aka thoo Khrih amah khuiah a tueng sak. Te dongah vaan ah khaw a bantang ah ngol coeng. 21 Boeilu neh saithainah khaw, thaomnah neh taemrhainah khaw, ming khue boeih te ta kumhal bueng kah pawt tih hmailong kah khaw boeih a poe. 22 Tgt 8.6Kol 1.18A cungkuem la a kho hmuiah boe a ngai sak tih amah te hlangboel taengah cungkuem soah a lu la a khueh. 23 Te tah amah pum la om tih cungkuem kah a soepnah tah cungkuem taengah soep.