ESTHER
(The Book of Esther)
Esther Cabu Kawng
Esther he Hebrew ming la Hadassah (Cuihal pai) tih, Persian ming la Esther (Aisi nu) tila om. Esther cabu (Hebrew) dongah khokhuen cil neh olcueih cil rhen a bok. Hebrew nu hula sakthen Esther kawng a thui. Anih te Persia boeinu la om tih Persia ram kah Judah hlang rhoek kah hinglu a hlawt pah.
A tloe kungpuei la aka tueng tah Persia manghai Xerxes ni. Anih a kopoek bahoeng loe.
Mordekai he Esther kah a napa noe la om. Anih loh manghai kah hinglu a hlawt pah.
Haman he manghai kah boei a sang koek la om. Esther Cabu (Lxx) dongah tah Haman he Macedonia hlang la om tih Persian manghai ngawn ham, Persia ram te Mekedonia ram ka poeh sak eh a ti A hnukbang panit taengah duem a thui te Modekai loh a ming tih a phoe. Te dongah Haman kah hnukbang rhoi te manghai loh a ngawn. Te dongah Persia Judah rhoek taengah te boeih thup ham a taeng. Judah rhoek kah Purim khotue a tongnah kawng khaw a thui. Amih kah khokhuen cil bueng kolla Perisan rhoek singyoe kawng a tueng sak. Vangsawnnah ram ah kho a sak uh dae Judah rhoek loh amah bawknah dongah khak a cak uh te khaw tueng. A tloe cabu dongkah bangla Pathen loh vaan puencawn a tueih pah a saii pah ti om pawh. Tedae hlanghing khosaknah dongah Pathen a thumnah kawng a thui. A pilnam loh rhainah a hmuh vaengah Pathen loh a hoeptlangnah khaw a thui.
Tae Yoeinah
I. Mueirhih khuikah Judah rhoek1. 1—3. 15
A. Manghainu Esther 1. 1—2. 23
B. Haman loh Judah rhoek a taeng 3. 1—3. 15
II. Judah rhoek loeihnah (4.1-10.3)
A. Esther kah thaphohnah 4. 1—7. 10
B. Thunkha sokah phulohnah 8. 1—9. 19
C. Purim Khotue 9. 20—9. 32
D. Mordekai pomsangnah 10. 1—10. 3
1
Manghai loh Vashti a Noih
1 Ezr 4. 6.Amah Ahasuerus tue vaengah he he om. Ahasuerus tah India lamloh Kusah duela paeng ya pakul parhih a manghai thil. 2 Te vaeng tue ah manghai Ahasuerus tah Shushan rhalmah im kah a ram ngolkhoel dongah ngol. 3 A manghai nah kum thum vaengah a mangpa rhoek neh a sal boeih ham buhkoknah a saii. Te vaengah a mikhmuh ah Persia tatthai khaw, Madai angrhaeng rhoek khaw, paeng mangpa rhoek khaw omuh. 4 Te vaengah a ram kah thangpomnah khuehtawn neh, a lennah boeimang umponah te, m khohnin la hnin ya sawmrhet ah puet a tueng sak.
5 Khohnin a cup vaengah tah manghai loh Shushan rhalmah im ah a hmuh pilnam, tanoe kangham boeih ham buhkoknah te manghai impuei dum kah vongup ah hnin rhih a saii pah. 6 Hniyan a bok neh a thim khaw baibok daidi rhui neh cak hnaai te a bang. Lungphaih a ling, a thim neh a bok-awp a muem sokah sui neh cak thingkong khaw lungbok tung neh cung.
7 Manghai kut kah bangla a ram kah misurtui khaw phul tih hnopai khaw hnopai neh a thovael phoeiah, sui hnopai neh a tul. 8 Te vaengah a okcaknah te olkhan bangla tanolh pawh. Manghai loh a im kah boeiping boeih te hlang neh hlang kah kolonah bangla saii ham a uen. 9 Vashti manghainu long khaw manghai Ahasuerus kah manghai im ah nu buhkoknah a saii.
10 A hnin rhih vaengah tah misurtui lamloh manghai kah lungbuei khaw umya coeng. Te dongah manghai Ahasuerus mikhmuh kah aka thotat imkhoem parhih Mehuman, Biztha, Harbona, Bigtha, Abagtha, Zethar, Karkas taengah, 11 Vashti manghainu te manghai rhuisam neh manghai mikhmuh ah khuen ham a thui pah. Anih te a mueimae a then dongah a sakthen te pilnam neh mangpa rhoek tueng ham a ngaih. 12 Tedae manghai kah dumlai dongah imkhoem kut neh caeh ham tah Vashti manghainu loh a aal. Te dongah manghai khaw bahoeng a thintoek tih a kosi loh a khuiah a alh pah.
Manghai kah Oltloeknah
13 Te dongah manghai loh olkhan neh dumlai aka ming boeih kah mikhmuh ah manghai kah ol vanbangla a tue aka ming hlang cueih rhoek, 14 amah taengah aka yoei Persia mangpa parhih Karshena, Shethar, Admatha, Tarshish, Meres, Marsena, Memukan neh ram khuiah khosa lamhma neh manghai maelhmai aka hmu Madai te, 15 “Olkhan dongkah bangla manghainu Vashti te metlam ka saii eh? Imkhoem kut dongkah manghai Ahasuerus olpaek te a vai moenih,” a ti nah.
16 Te vaengah Memukan loh manghai neh mangpa rhoek kah mikhmuh ah, “Manghai amah bueng taengah moenih. Vashti manghainu he mangpa boeih taeng neh manghai Ahasuerus paeng tom kah pilnam boeih taengah khaw paihaeh coeng. 17 Manghainu kah ol he huta boeih taengla pawk vetih a mikhmuh ah a boei a hnaep pawn ni. Amih long te, 'Manghai Ahasuerus loh a mikhmuh la manghainu Vashti te khuen ham a ti nah dae a caeh moenih,’ a ti uh ni. 18 Tahae khohnin ah Persia neh Madai boeinu rhoek, manghainu kah ol aka ya manghai kah mangpa cungkuem taengah khaw a thui pawn ni. Te dongah hnaepnah neh thinhulnah ngawn rhoeh coeng. 19 Manghai ham a then mak atah manghai ol te a mikhmuh lamloh tueih saeh. Persia neh Madai olkhan khuiah daek saeh. Te dongah te te poe boel saeh lamtah Vashti te manghai Ahasuerus mikhmuh ah mop voel boel saeh. Anih kah ram khaw manghai loh anih lakah aka then a hui taengla pae saeh. 20 Ram he len cakhaw a ram tom ah manghai kah oltloeknah a saii te a yaak daengah ni huta boeih, tanoe kangham loh a boei ham umponah a khueh eh?,” a ti nah.
21 Ol te manghai neh mangpa rhoek kah mikhmuh ah then coeng. Te dongah manghai loh Memukan ol bangla a saii. 22 Te phoeiah tah manghai kah paeng tom la cabu a pat. Paeng pakhat taengah amah paeng kah ca neh, pilnam khat taengah amah pilnam kah ol neh a pat. A imkhui ah boei la aka om hlang boeih loh amah pilnam ol neh a thui pah.