GALATI CAPAT
(Letter to the Galatians)
GALATI CAPAT
He kah ca he Asia Minor kah Galati hlang boel rhoek ham a tael pah. Paul amah he caeltueih tang la om tih, a olthang khaw oltak ni tite a cimphan la a thui. (1.1-10).
Paul he caeltueih tak tak ni. Anih he namtom taengah missionary la Boeipa loh a tueih tih Jerusalem ah tah caeltueih taktak la a pom. (1.18—-2.10). Peter he namtom rhoek kah caak ok kawng dongah kapyik kapyok la a om dongah Paul loh rhaprhap a toel (2.1—18). Tangnah he hi khangnah daemnah longpuei la a om. Abraham kah tangnah kawng a tip la Paul rhep rhep a thui. Galati capat he AD 57vaengah a tael.
Sawt Yoeinah
Caeltueih taktak neh olthang taktak (1.1-10)
Pathen loh Paul a tuek (1.11-24)
Paul loh amah olthui te a huul (2.1-21)
Tangnah rhangneh daemnah (3.1—4.31)
Mueihla kah hoihaengnah (5.1—6.10)
Rhalrhingnah (6.11-18)
1
Olrhan
1 Hlang lamkah pawt tih, hlang rhangnen pawt tih, Jesuh Khrih neh duek lamkah anih aka thoh a pa Pathen rhangneh caeltueih Paul neh, 2 ka taengkah manuca boeih loh Galati hlangboel rhoek taengah kan yaak sak. 3 Mamih a pa Pathen neh Boeipa Jesuh Khrih kah lungvatnah neh ngaimongnah nangmih taengah om saeh. 4 Mamih kah tholhnah kongah amah aka hnawn uh te. Te daengah ni ta kumhal kah aka pai boethae khui lamloh a pa neh Pathen kah kongaih bangla mamih n'hlawt eh. 5 Thangpomnah tah a taengah kumhal kah kumhal ah om pai saeh. Amen.
Olthangthen A Tloe Om Pawh
6 Khrih kah lungvatnah dongah nangmih aka khue taeng lamloh a tloe olthangthen la ki na buung uh te ka ngaihmang van. 7 Te te a tloe la a om moenih. Te pawt akhaw nangmih aka hinghuen tih Khrih kah olthangthen palet ham aka ngaih te hlangvang na om uh. 8 Tedae kaimih neh vaan lamkah puencawn long pataeng nangmih taengah ka phong uh te nangmih ham voelh a phong atah kosi yook saeh. 9 Thui tangtae vanbangla tahae akhaw koep ka thui. Pakhat mai loh na doe uh tangtae te nangmih taengah voelh a phong atah kosi yook saeh. 10 Hlang nim, Pathen nim ka ngaitang coeng he. Hlang kolo nim ka toem. Hlang taengah ka ko a lo ka om pueng atah Khrih kah sal la ka om eh ka ti moenih.
Paul loh Paihmuen A Thui
11 Te dongah manuca rhoek nangmih taengah ka phoe coeng. Kai loh ka phong olthangthen he hlang dongah a kungsut moenih. 12 Kai tah hlang lamloh ka doe pawt tih n'thuituen bal moenih. Tedae Jesuh Khrih kah pumphoenah rhangnen ni. 13 Clt 8.3; 22.4,5; 26.9-11Hnukbuet kah Judah sing neh ka omih te na yaak uh coeng. A puehkan aih la Pathen kah hlangboel te ka hnaemtaek tih ka thup. 14 Clt 22.3Judah sing dongah ka namtu lakli kah thawnpuei rhoek lakah ka lamhma. Kamah patuel rhoek kah singyoe aka om dongah khaw muep ka hmae. 15 Clt 9.3-6; 22.6-10; 26.13-18Tedae a nu bung lamloh kai aka hoep tih a lungvatnah neh aka khue Pathen loh, a capa te ka pum dongah pumphoe sak ham a lungtlun. 16 Amah te ni namtom taengah ka thui eh. Thii neh saa neh koeloe ka thaem moenih. 17 Kai hlankah caeltueih rhoek taengah Jerusalem lam khaw ka cet pawh. Tedae Arabia la ka cet tih Damasku la koep ka bal.
18 Clt 9.26-30Te lamkah a kum thum phoeiah Jerusalem la ka cet tih Kephas te ka ming. Te vaengah anih taengah hnin hlainga ka om. 19 Tedae Boeipa kah a mana James pawt atah a tloe caeltueih rhoek te ka hmu pawh. 20 Te dongah Pathen hmuh ah ka laithae moenih tila nangmih ham ka daek he ne. 21 Te phoeiah Syria neh Kilikia pingpang la ka pawk. 22 Tedae ka om vaengkah Khrih ah Judea kah hlangboel maelhmai te khaw ka mangvawt coeng. 23 Tedae, “Hnukbuet kah mamih aka hnaemtaek loh hnukbuet kah a phae tangnah te a phong coeng,” tila a yaak uh dawk nen ni a om uh. 24 Te vaengah kai dong lamloh Pathen te a thangpom uh.