4
1 Rhopangkung te cahmang la a om khui boeih atah sal khaw, boei khaw, aka om boeih te a tanglue tloe moenih ka ti coeng. 2 Tedae pa kah a tuetang duela imtawt neh hnokhoem kut hmuiah a om sak. 3 Te dongah mamih khaw cahmang la n'om uh vaengah diklai kah a niing hmuiah sal aka bi la n'om? 4 Tedae a tue a soepnah loh ha pawk vaengah Pathen loh a capa te han tueih. Huta lamloh om tih olkhueng hmuiah phoe. 5 Rom 8.15-17Te daengah ni olkhueng hmuikah rhoek te a tlan eh. Te daengah ni a cacah la m'phaeng eh. 6 Te dongah ca rhoek la na om uh coeng. Abba a pa tila aka pang a capa kah Mueihla te Pathen loh mamih thinko ah han tueih. 7 Te dongah sal voel pawt tih ca la na om uh coeng. Ca tah Pathen rhangneh rhopangkung la om van.
Galati rhoek ham Ngaihlih
8 Tedae Pathen ana ming pawt vaengah a coengnah loh pathen la aka om pawt rhoek kah sal na bi uh. 9 Tedae Pathen te mingpha coeng ta. Te dongah Pathen loh lat m'ming ta. Metlae tattloel neh a niing aka khodaeng taengla koep na mael uh. Te rhoek taengah salbi ham koep na ngaih uh. 10 Khohnin khaw, hla khaw, khoning khaw, kum khaw na yaeh uh coeng. 11 Nangmih ham ka thakthae he a hoeihae pawt khaming tila nangmih taengah ka birhih.
12 Kai bangla om uh lah. Kai khaw nangmih vanbang ni tila manuca rhoek nangmih te kan hloep. Kai nan veet uh moenih. 13 Tedae a cuekca kah nangmih taengah ka phong te pumsa kah vawtthoek dongah tila na ming uh. 14 Ka pumsa ah nangmih ham noemcainah om cakhaw nan hnaelcoe uh pawt tih nan tuei uh moenih. Tedae Pathen kah puencawn bangla, Jesuh Khrih bangla kai nan doe uh. 15 Te koinih nangmih kah yoethennah tah menim? A phoeng mai koinih na mik te na koeih uh tih kai nan paek uh mako tila nangmih taengah ka laipai. 16 Nangmih ham oltak ka thui dongah nangmih kah rhal la ka coeng a? 17 Nangmih taengah a thatlai uh te thuem pawh. Tedae nangmih te khoe a ngaih uh daengah amih te na thatlai thil uh mako. 18 Tedae a then la thatlai ham tah then yoeyah ngawn. Te dongah nangmih taengkah ka om rhuet bueng moenih. 19 Ka ca rhoek nangmih ah Khrih a kap duela u ham nim ka bung a tloh bal. 20 Te dongah nangmih taengah om laeh ka ngaih coeng. Ka ol te thovael ham khaw nangmih soah ka ingang coeng.
Sarah neh Hagar Paipi Panit
21 Kai taengah thui uh lah. Olkhueng hmuiah om ham aka ngaih rhoek, olkhueng te na ya uh mahnim? 22 Sue 16.15; Sue 21.2Abraham loh capa panit a khueh te a daek coeng ta. Pakhat te salnu kah tih pakhat te aka loeih nu kah ta. 23 Tedae salnu kah te tah pumsa la a cun. Aka loeih nu kah te tah olkhueh lamloh a cun. 24 Amih rhoi loh a tueng sak te om. Amih rhoi tah paipi panit la om. Pakhat tah Sinai tlang lamkah tih sal la a cun. Anih tah Hagar ni. 25 Hagar tah Arabia kah Sinai tlang coeng ni. Tahae kah Jerusalem banghui la, a ca rhoek taengah sal a bi. 26 Tedae soben Jerusalem tah aka loeih ni. Anih tah mamih kah manu ni. 27 Isa 54.1A daek coeng te ta,
Cakol la cacun mueh aw uum khungdaeng lamtah
bung aka tlo pawt aw tamhoe lah.
Va aka khueh lakah khosoek kah camoe tah taoe ping ta.
28 Manuca rhoek nangmih ngawn tah Isaak bangla olkhueh kah ca rhoek la na om uh. 29 Sue 21.9Tedae pumsa la a cun loh mueihla la cun te a hnaemtaek vanbangla tahae ah khaw om van tangloeng. 30 Sue 21.10Tedae cacim loh, “Salnu neh a capa te haek laeh. Salnu kah a capa te aka loeih nu kah capa taengah phaeng loengloeng pawh,” a ti te ta. 31 Te dongah manuca rhoek salnu kah voel pawt tih aka loeih kah ca rhoek la n'om uh.