2
1 Na manuca rhoek te, ‘Ka pilnam, na ngannu rhoek te ‘Kan haidam’ ti nah.
Israel kah Cukhalhnah
2 Na nu te ho rhoe ho laeh.
Anih te kai yuu pawt tih kai khaw a va moenih.
A pumyoihnah te a mikhmuh lamloh,
a samphaihnah a rhangsuk laklo lamkah khoe laeh saeh.
3 Anih te pumtling la ka hlik vetih
a thang hnin kah bangla amah ka khueh tarha ve.
Anih te khosoek bangla ka khueh vetih
rhamrhae khohmuen la ka khueh phoeiah
tuihalh neh ka duek sak ni.
4 Amih pumyoi ca rhoek mai te,
a ca rhoek te khaw ka haidam mahpawh.
5 A manu te cukhalh pai tih amih a yom te yak.
“Kai aka lungnah tih ka buh, ka tui,
ka tumul, ka hlamik, ka situi neh
ka tuiok aka pae ka lungnah hnukah ni ka caeh eh,” a ti.
6 Te dongah kamah loh
a longpuei te hling neh ka buk pah.
A vongtung te ka biing pah vetih
a hawn hmu voel mahpawh.
7 A lungnah rhoek te
a hloem dae amih te kae mahpawh.
Amih te a tlap akhaw hmu mahpawh.
Te vaengah, “Ka cet vetih lamhma kah
ka va taengah ka mael ni.
Kai hamla tah then ngai mai coeng.
8 Kai loh anih taengah cangpai,
misur thai, situi khaw ka paek tih
anih soah cak khaw ka kum sak dae
sui te Baal hamla a khueh uh.
9 Te dongah amah tue vaengah
ka cangpai neh a khoning vaengkah
ka misur thai te ka lat pah vetih ka loh pah ni.
A yah a khuk nah ka tumul neh
ka hlamik khaw ka lat ni.
10 Te phoeiah a yah te
a hlang ngaih mikhmuh ah ka poelyoe pah pawn vetih
hlang loh anih te ka kut lamkah huul thai mahpawh.
11 A omthennah, a khotue,
a hlasae neh a Sabbath khaw,
a tingtunnah boeih khaw boeih ka paa sak ni.
12 A misur neh a thaibu khaw ka pong sak ni.
“Te rhoek te kamah kah pumyoih phu la
ka hlang ngaih rhoek loh kai taengah m'paek uh,” a ti.
Te cakhaw te te duup la ka khueh vetih
kohong mulhing loh a caak ni.
13 Amih taengah a phum bangla
Baal kah khohnin khaw anih taengah ka cawh ni.
A hnaii neh a hnaphaa a thawn tih
a hlang ngaih hnukah cet dae,
kai BOEIPA kah olphong te a hnilh.
Israel Ham Khodawkngainah
14 Te dongah kamah loh anih te ka hloih ni ne.
Tedae amah te khosoek la a pha sak phoeiah ni
a lungbuei ah ka voek eh.
15 Jos 7.24-26Te lamloh a misurdum te amah taengla ka paek vetih
Akor kol te ngaiuepnah thohka la om ni.
Te vaengah a camoe tue vaengkah bangla pahoi oei vetih
Egypt kho lamloh a caeh hnin bangla om ni.
16 BOEIPA kah olphong te a khohnin neh a pha vaengah tah ka va la nan khue vetih kai taengah, “Kai kah Baal,” la na khue voel mahpawh. 17 Baal ming te a ka lamloh ka khoe pah vetih a ming te poek voel mahpawh. 18 Te khohnin ah tah amih ham paipi te kohong mulhing neh, vaan kah vaa neh, diklai rhulcai neh ka saii pah ni. Diklai lamkah lii, cunghang neh caemtloek te ka bawt sak vetih amih te ngaikhuek la ka yalh sak ni. 19 Nang te kamah ham kumhal duela kam bae vetih duengnah neh, tiktamnah neh, sitlohnah neh, haidamnah neh nang te kamah hamla kam bae ni. 20 Nang te kamah hamla uepomnah neh kam bae van daengah ni BOEIPA te na ming eh.
21 Te khohnin te a pha vaengah
BOEIPA kah olphong te ka doo vetih
vaan te khaw ka doo ni.
Amih long khaw diklai te a doo uh ni.
22 Diklai long khaw
cangpai misur thai neh situi te a doo vetih
amih loh Jezreel te a doo ni.
23 Rom 9.25; 1Pe 2.10Anih te kamah hamla lohma ah ka soem vetih
a haidam pawt te ka haidam ni.
Nang Loami te ka pilnam ka ti vetih
anih long khaw ka Pathen a ti ni.