9
Tamna La Caehnah
1 Israel te na Pathen taeng lamloh
na cukhalh uh cangpai cangtilhmuen tom ah
a paang na lungnah uh dongah ni
pilnam bangla omngaihnah la na ko a hoe uh pawh.
2 Cangtilhmuen neh va-am loh
amih te luem puei pawt vetih
a khuiah misur thai loh a vaitah ni.
3 BOEIPA kah khohmuen ah kho a sak uh pawt vaengah tah
Ephraim te Egypt la mael vetih
Assyria ah rhalawt hno a caak uh ni.
4 BOEIPA taengah misurtui bueih uh pawt vetih
a taengah a lungtui uh mahpawh.
Amih kah hmueih te
amamih taengah tamsa buh bangla om ni.
A hinglu te BOEIPA im la a kun pawt dongah
aka ca boeih khaw a buh neh poeih uh ni.
5 Tingtunnah hnin neh
BOEIPA kah khotue hnin ah balae na saii uh eh?
6 rhoelrhanah lamloh cet uh mai cakhaw ne,
amih te Egypt loh a coi vetih
Memphis loh amah la a up ni.
Amih kah cak te dohui loh a nulnah uh vetih
amamih khaw a dap khuiah ni mutlo hling loh a huet eh.
7 Luk 21.22Cawhnah hnin a pha coeng,
sahnah hnin a pha coeng.
Tonghma ang neh mueihla hlang kah
a pavai Israel loh ming saeh.
Namah thaesainah loh cungkuem tih
na muennah khaw yet.
8 Ka Pathen neh Ephraim aka tawt
tonghma khaw a longpuei boeih ah
sayuep kah pael a om pah tih
a Pathen im ah muennah om.
9 Ltk 19.1-30Gibeah tue bangla muelh paci uh tih,
amih kah tholhnah a cawh pah vaengah
amamih kah thaesainah a poek bitni.
Ephraim Cakol
10 Lmp 25.1-5Israel khaw khosoek kah misur bangla ka hmuh.
Thaibu dongkah thaihloe a moe vaengkah bangla ka hmuh.
Na pa rhoek khaw Baalpeor la a caeh uh dongah ni
yahpohnah dongah a cue uh akhaw
sarhingkoi te a lungnah bangla om uh.
11 Ephraim loh amih kah thangpomnah te
cacun khui lamloh, bungko lamloh,
rhumpum lamloh vaa bangla a ding puei ni.
12 A ca rhoek te pantai uh mai bal cakhaw
hlang te a pum la ka cakol sak ni.
Amih taeng lamloh ka nong vaengah amih aih te anunae!
13 Ephraim te Tyre taengah
tolkhoeng dongkah a phung bangla
ka hmuh dae Ephraim he a ca rhoek
aka ngawn pah taengah khuen ham om.
14 Aw BOEIPA amih te pae dae.
Balae tih amih te cakol bung neh
rhangsuk aka rhae te a paek khaw na paek eh?
15 Amih kah boethae loh
Gilgal ah khaw cungkuem coeng.
Amih kah khoboe thaenah dongah ni
amih te hnap ka thiinah.
Amih te ka im lamloh ka haek vetih
amih lungnah ham ka khoep mahpawh.
A mangpa boeih khaw a thinthah uh.
16 Ephraim te a ngawn tih a yung a koh dongah
a thaih a cuen kolla om mahpawt nim?
Amih bungko kah ngailaemnah te
cun uh mai sitoe cakhaw ka duek sak ni.
17 A ol te a hnatun uh pawt dongah
amih te ka Pathen loh a hnawt vetih
namtom taengah aka poeng la om uh ni.