ISAIAH
(The Book of the Prophet Isaiah)
Isaiah Cabu Kawng
Isaiah he Olkhueh Rhuem dongah tah a sen koek la om. Hlohlailung a dung ngai neh ngaiuepnah ol muep a tael. Isaiah he tuithim kah Judah ram kho a sak tih 742-698 b.c tluk vaengah Pathen loh a voeknah te a thui. Isaiah dongkah a ngen tah 538 b.c vangsawn lamkah a mael phoeiah a tael. Te dongah Isaiah he hlang panit pathum kah a tael te rhen a cong coini tila poeknah om. Judah khohmu rhoek loh Pathen kah tiktamnah neh sitlohnah, thinphoei lungvatnah te hlohlailung la muep a tael. Isaiah he hlop thum la a boel. A pacuek dongah tah pilnam loh Boeipa kah tungaepnah te uepnah pawt tih Moses kah olkhueng a hnawt dongah Pathen kah ollcaeknah a pai ham, thunkha loh a muk vetih amih a tuuk ham khaw a rhalrhing sak. can be divided into three parts. A pabae dongah tah vangsawn kah pilnam taengah ngaiuepnah te omngaih koehnah hlohlailung la a thui. Pathen loh pilnam te a ram la a mael puei vetih Jerusalem bawkim koep a sak uh ham khaw a thui pah. A hnukhueng kah dongah tah pilnam koep a thohnah, Boeipa kah khohnin thai a saenah kawng te a thui.
Sawt Yoeinah
Isaiah a Pacuek: Vangsawn Hlankah 1.1—39.8
Isaiah a Pabae: Vangsawn pilnam ham olthangthen 40.1—55.13
Isaiah a Pathum: Pilnam aka mael ham olthangthen 56.1—66.24
1
1 2Mg 15.1-7; 2Kh 26.1-23; 2Mg 15.32-38; 2Kh 27.1-9; 2Mg 16.1-20; 2Kh 28.1-27; 2Mg 18.1—20.21; 2Kh 29.1—32.33Judah manghai rhoek Uzziah, Jotham, Ahaz neh Hezekiah tue vaengah Judah neh Jerusalem ham Amoz capa Isaiah loh a mangthui a hmuh.
Judah kah A Patang
2 Vaan rhoek loh ya uh lamtah
diklai long khaw hnakaeng saeh.
BOEIPA loh, “Ka ca rhoek he ka pantai sak tih
ka pomsang coeng dae,
amamih long ni kai taengah boe a koek uh.
3 Vaito loh amah aka lai te a ming tih
laak long a boei kah kongduk te a hmat.
Ka pilnam Israel loh ming voel pawt tih
yakming voel pawh.
4 A nunae, namtom laihmuh aih,
thaesainah loh a payawk pilnam,
thaehuet kah tiingan,
poci kah a ca rhoek,
BOEIPA te a hnoo uh tih
Israel kah aka cim te
a tlaitlaek dongah a hnuk la kholong uh coeng.
5 Balae tih koep kang ngawn eh?
Koeknah te na koei uh tih na lu te a tlohtat kak la,
na thinko boeih khaw hal coeng.
6 A kho khopha lamloh a lu due
hlang la om voel pawh.
A tloh neh a hma,
hmasoe a haeng khaw
yawt uh pawt tih poi uh pawh,
situi nen khaw yaih sak pawh.
7 Na khohmuen te khopong la om coeng.
Na khopuei rhoek hmai neh a hoeh coeng.
Na diklai khaw na mikhmuh ah
kholong loh han caak coeng.
Te dongah khopong neh
imrhong bangla a kholong boeih coeng.
8 Zion nu misur dum kah poca bangla,
uitang lo kah tlak bangla,
khopuei a dum bangla hoei sut coeng,” a ti.
9 Sue 19.24; Rom 9.29Caempuei BOEIPA loh mamih he
rhaengnaeng la bet n'hlun pawt koinih
Sodom bangla ng'om vetih
Gomorrah bangla n'lutlat uh ni.
10 Sodom rhalboei rhoek BOEIPA olka te ya uh lah.
Gomorrah pilnam loh mamih
Pathen kah olkhueng te hnakaeng thil lah.
11 Amo 5.21,22Nangmih hmueih aka khawk te kai ham ee te?
BOEIPA loh, “Hmueihhlutnah tutal,
puetsuet kah a tha, vaito thii,
tuca neh kikong loh n'lawt tih ka ngaih moenih.
12 Kai mikhmuh ah phoe hamla
na pawk uh vaengah na kut dongkah he
unim aka suk tih kai kah vongup nan taelh uh.
13 A Poeyoek la khocang nang khuen neh ng'koei boeh.
Bo-ul khaw kai ham tueilaehkoi ni.
Hlasae neh Sabbath ah tingtunnah a khue te khaw,
boethae neh pahong khaw ka ueh thai pawh.
14 Nangmih kah hlasae neh na tingtunnah te
ka hinglu loh a hmuhuet tih,
kai ham laipuei la a poeh dongah
ka phueih ka ngak.
15 Na kut na phuel uh vaengah
nangmih taeng lamloh ka mik vik ka him ni.
Thangthuinah loh puh cakhaw
na kut ah hlang thii a bae dongah ka hnatun mahpawh.
Jerusalem kah Cimcaihnah
16 Sil uh lamtah cim uh.
Na khoboe thaenah khaw khoe uh lamtah
ka mikhmuh lamkah thaehuet te toeng uh.
17 Voelphoeng hamla cang uh.
Tiktamnah te tlap.
Hlang hnaepnah te toel uh.
Cadah te rhuun uh lamtah,
nuhmai ham te oelh pah.
18 Ha mop uh lamtah tluung uh thae pawn sih.
BOEIPA loh, “Nangmih kah tholhnah te
lingdik bangla om cakhaw
vuel bangla om ni.
Talam bangla thimyum cakhaw
tumul bangla bok ni,” a ti.
19 Na huem uh tih na hnatun uh atah
khohmuen kah a thennah te na caak uh ni.
20 Tedae na aal tih na koek uh atah
BOEIPA ol a thui coeng dongah
cunghang na yook uh ni.
Hnukpoh Khopuei
21 Khorha cakrhuet,
tiktamnah neh aka bae te balae tih
pumyoi la poeh.
Duengnah khaw a khuiah rhaehrhong dae
hlang a ngawn coeng.
22 Nangmih kah ngun te aek la poeh tih
na yuhuem khaw tui neh poek uh coeng.
23 Na mangpa rhoek a thinthah uh tih
a pum la hlanghuen neh hui uh thae.
Kapbaih a lungnah tih kapbaih ni a hloem.
Cadah te laitloek pa uh pawt tih
nuhmai kah tuituknah khaw
amamih taengah phoe puei pawh.
24 Te dongah caempuei Boeipa,
Yahovah, Israel kah samrhang olphong loh,
“A nunae, Ka thunkha rhoek soah phu ka loh daengah ni
ka rhal rhoek taengah dam ka ti pueng eh.
25 Nangmih taengah ka kut kan thuung ni.
Te vaengah na khen te lunghuem neh ka dung vetih
na ti boeih ka khong ni.
26 Na laitloek te hnukbuet kah bangla,
na olrhoep khaw lamhma kah bangla kan thuung ni.
Tahae lamkah tah nang te duengnah khopuei,
uepom khorha la ng'khue ni.
27 Zion te tiktamnah neh a lat vetih
duengnah neh ha mael ni.
28 Tedae boekoek rhoek neh
BOEIPA aka hnoo hlangtholh rhoek tah
pocinah loh rhenten a khah ni.
29 Thingnu na nai uh te yak vetih,
dum na tuek uh dongah khaw na hmai tal uh ni.
30 Rhokael te a hnah a hoo bangla,
tui loh dum te a kaktah bangla na om uh ni.
31 Aka tlung khaw malpawt la,
a bisai te hmaidi la poeh ni.
Te vaengah a boktlap la rhenten
a dom vetih thih uh mahpawh.