16
Khohmuen aka hung tuca te
Sela khosoek lamloh Zion nu kah
tlang duela thak uh laeh.
Anih tah a bu a hno tih aka poeng vaa bangla om tih
Arnon lamkai kah Moab nu rhoek khaw te tlam te om uh.
cilsuep khaw pae rhoela pae uh.
Oltloeknah saii uh.
Khothun lung kah na mueihlip te
khoyin bangla khueh laeh.
A yong vaengah a heh rhoek te
thuh lamtah phoe boeh.
Ka heh Moab te namah taengah bakuep saeh.
Aka rhoelrhak kah mikhmuh lamloh
amih hlipyingnah om saeh.
Hlangphaep khaw khawk van ni.
rhoelrhanah khaw khum bitni.
Hlang aka taelh khaw diklai lamloh cing ni.
Ngolkhoel te sitlohnah neh a cikngae sak vetih,
a soah uepomnah neh ngol ni.
David kah dap ah lai a tloek tih,
tiktamnah a toem vaengah duengnah khaw a ming.
Moab kah hoemdamnah tah a poikuk la,
a hoemnah te muep n'yaak uh coeng.
A hoemdamnah neh a thinpom dongah
anih te olsai tangkhuet boel saeh.
Te tangloeng ni Moab loh
amah Moab pum ham a rhung te.
Kirhareseth rhae te a rhung thil tih
aka rhawp yungyi ham na caitawk thil.
Heshbon lohmali kah
Sibam misur tah huum coeng tih,
namtom boei rhoek loh a dawn a oh uh.
A pae loh Jazer la a pha.
Khosoek ah yam hmaang tih
tuipuei khaw a poeng uh.
Te dongah ni Jazer kah a rhah bangla
Sibam misur te ka rhah tangkhuet.
Heshbon neh Elealeh nang te
ka mikphi neh kan hmilhmal sak.
Nang kah khohal neh na cangah kah
tamlung khaw paa coeng.
10 Cangthai dong lamkah kohoenah neh
omngaihnah khaw khum coeng.
Misurdum ah khaw tamhoe voel pawh.
Misurtui te yuhui thil voel pawh.
Va-am te a mael khaw a mael thil voel pawt dongah
tamlung khaw ka bawt sak coeng.
11 Te dongah ka ko ah Moab ham rhotoeng bangla,
ka kotak ah Kirhareseth ham hue a sak.
12 Moab kah a ngak a phoe pah khaw om bitni. Thangthui hamla hmuensang kah a rhokso te a paan vaengah coeng thai mahpawh.
13 Hekah ol he BOEIPA loh hlamat ah ni Moab ham a thui coeng. 14 Tahae BOEIPA loh koep a thui tih, “Kum thum khuiah kutloh kum kah bangla Moab kah thangpomnah neh hlangping boeih te rhaidaeng la muep om ni. A yolkai la aka sueng duen khaw khala pawh.