JAMES CAPAT
(Letter from James)
JAMES CAPAT KAWNG
James capat he Jerusalem hlangboel mawtkung la aka James loh a tael. Anih he Jesuh kah a mana la om.
Baibal Olkhueh thai dongkah capat khuiah tah James capat bahoeng olpuei la om. Hekah capat Rom uknah ham khuila yilhcet coeng. Hnin takuem Khrihca khosaknah moeiboe kawng he yakming yoei la bawt a tael.
James loh canpueinah tah tangnah he khoboe rhoih pawt atah a phu om pawh. He nih hlang kah awt koila a om eh.
Anih loh poeknah mpaek he a caih la a thui, na khodaeng vaengah khaw ngaihmang sak boeh. Tangnah neh noemcai vaengah kobawt sak boeh. Thintoek ham loe sak boeh, khodaeng neh boei khaw hlaang boeh. Hlang ham a then sai lamtah na hmuilai neh huengaihnah khaw kuemsuem. Pathen kho kungah yalh tih Pathen cueihnah dongah ni hangdang ham a om. A thae te oel ham om. Na caeh long ah hoemdam boeh. Na boei akhaw khodaeng bomnah la om saeh.
James capat he AD 45-50 tluk vaengah a tael.
Sawt Yoeinah
Kuttuknah (1.1)
Tangnah cueihnah dongkah khosaknah (1.2-18)
Pathen ol hnatunah neh olngainah (1.19-27)
Boei kuirhang neh anaa khueh ngaih aih boeh (2.1-13)
Tangnah neh bibinah (2.14-26)
Cueihnah neh olcalthingka (3.1-18)
Lunglai neh payalaiko (4.1—5.6)
Uehnah, rhennah, thangthuinah (5.7-20)
1
Uemnah Ol
1 Mat 13.55; Mrk 6.3; Clt 15.13; Gal 1.19Pathen neh Boeipa Jesuh khrih kah sal James loh canglak mupoe koca hlainit taengah ka omngaih.
Noemcainah neh Hing Soepnah
2 Ka manuca rhoeh noemcainah rhoepsaep na um uh te omngaihnah la boeih poek uh. 3 Nangmih kah nuemnainah loh tangnah dongkah uehnah a thoeng sak te ming uh. 4 Uehnah loh khoboe te a lungcuei la khueh saeh. Te daengah ni lungcuei neh hlangsoep la na om vetih na vawtthoek pawt eh.
5 Nangmih khuiah khat khat loh cueihnah a vawt atah kohuet kolla hawt boeih aka pae Pathen taengah bih saeh lamtah anih te a paek bitni. 6 Tedae boelhkhoeh kolla tangnah neh bih saeh. Aka boelhkhoeh tah tuili kah tuiphu aka niknuk neh aka kilkul banghui ni. 7 Tekah hlang loh boeipa taengkah pakhat khaw a dang ham la cai boel saeh. 8 Cikcok hlang tah rhoepsaep dongah a longpuei khaw likloek sut.
9 Tedae manuca aka tlayae long tah amah kah a sang neh pomsang saeh. 10 Isa 40.6,7Kuirhang long khaw a mathoe neh thangpom seh. Anih khaw khopol rhaipai bangla khum ni. 11 Khomik loh a linglai neh a thoeng vaengah khopol te koh. Rhaipai khaw rhul tih a maelhmai kah mueithen long khaw tlum. Kuirhang khaw a caehlong ah muei tangloeng.
12 Yoethen hlang long tah noemcainah a ueh. Ueppang la aka om long ni hingnah rhuisam te a dang eh. Te tah amah aka lungnah rhoek ham a kam pah coeng. 13 Noemcai vaengah Pathen loh n'noemcai ti boel saeh. Pathen ham tah a thae he hnalbat la om tih amah khaw a noemcai moenih. 14 Cuekcawn hlang boeih tah amah kah hoehhamnah loh a payawk tih a yoek. 15 Hoehhamnah loh a cuen dongah tholhnah a cun. Tholhnah loh a ham vaengah dueknah a cun.
16 Thintlo ka manuca rhoek te n'rhaithi uh boel saeh. 17 Doedannah then boeih neh lungcuei kutdoe tah a so lamkah ni. Pa kah vangnah khui lamkah ha suntla coeng. Anih taengah poehlipnah neh hoilaenah mueihlip a om moenih. 18 A kutngo khuiah thaihcuek pakhat la mamih om sak ham ni oltak kah a ngaih vanbangla a ol loh mamih n'cun.
A Yaak te Khoboe neh Rhoih
19 Ka thintlo manuca rhoek ming uh lah. Hlang boeih loh hnatun ham te voeiloe la, cal ham te a hnong a yai la, thintoek ham khaw a hnong a yai la om saeh. 20 Hlang kah thintoek loh Pathen kah duengnah te a saii moenih. 21 Te dongah khoboe rhong neh phayoenah dongkah baecoihnah te boeih hnawt uh. Na hinglu khang ham aka coeng thai mutue ol te muelhtuetnah neh doe uh.
22 Ol aka rhoihkung la om uh lamtah aka yakung dawk loh amah te yoek uh boel saeh. 23 Khat khat loh ol yakung la om tih a rhoihkung pawt atah, anih te hmaidan dongah a rhuirhong kah maelhmai aka dan hlang banghui ni. 24 Amah te hmat uh coeng dae a caeh nen tah metla a om khaw hnap a hmaai. 25 Tedae poenghalnah lungcuei olkhueng te aka so tih aka om thil, aka yakung te aka hnilhkung la om pawt tih khoboe neh aka rhoihkung, yoethen long tah a bibi neh om ni.
26 Khat khat loh aka cuep la a ngai uh tih a ol a tuem kolla, a thinko a hmil a hmak atah, anih kah bawknah tah a honghi ni. 27 Pa neh Pathen hmaiah amih phacip phabaem khuikah cadah rhoek neh nuhmai rhoek te hip ham, amah neh amah diklai lamkah cuemhmuet la cue uh he ni aka cuem aka caih bawknah la a om.