49
Ammon ham Olphong
1 Ezk 21.28-32; 25.1-7; Amo 1.13-15; Zep 2.8-11BOEIPA loh Ammon ca rhoek ham he ni a thui.
Israel te a ca om pawt tih
anih aka pang khaw a om moenih a?
Balae tih Gad Milkom loh a huul tih
a khopuei kah a pilnam kho a sak.
2 Te dongah BOEIPA kah
olphong khohnin ha pawk tangloeng coeng he.
Ammon koca Rabbah ah
caemtloek tamlung ka yaak coeng tih
khopong imrhong la poeh ni.
A tanu te hmai neh a hlup uh ni.
Amah aka huul rhoek te Israel loh koep a huul ni.
He tah BOEIPA long ni a thui.
3 Ai te a rhoelrhak dongah
Heshbon nang rhung laeh.
Rabbah nu rhoek pang uh lamtah tlamhni vah laeh.
Rhaengsae lamtah tanglung khuiah tinghil laeh.
Milkom neh a khosoih rhoek,
a mangpa khaw vangsawn la rhenten cet ni.
4 Hnukmael nu aw,
balae tih tuikol te na yan?
Na tuikol khaw long coeng te.
A thakvoh dongah pangtung ni,
“Unim kai taengla aka pawk eh?” a ti.
5 Na kaepvai boeih lamkah birhihnah te
kai loh nang soah ka thoeng sak ni.
He tah ka Boeipa caempuei
Yahovah kah olphong ni.
Hlang loh a mikhmuh ah a heh tih
aka yong te khaw coi mahpawh.
6 Tedae he phoeiah ni Ammon ca rhoek khuikah thongtla te ka mael puei eh. He tah BOEIPA kah olphong ni.
Edom ham Olphong
7 Isa 34.5-17; 63.1-6; Ezk 25.12-14; 35.1-15; Amo 1.11,12; Oba 1.1-14; Mal 1.2-5Edom kawng he caempuei BOEIPA loh a thui.
Teman ah cueihnah om voel pawt nim?
Aka yakming lamkah cilsuep he bing tih
amih kah cueihnah khaw awk aih.
8 Dedan khosa rhoek te thuh ham
rhaelrham lamtah muelh hoihaeng uh laeh.
Anih ka cawh tue ah tah
Esau kah rhainah te anih soah ka thoeng sak ni.
9 Misur ka bit loh na taengla ha pawk koinih
a yoep koi khaw paih mahpawh.
Hlanghuen long khaw khoyin ah a ngaih te ni a phae eh.
10 Tedae Esau te ka baeh vetih
a huephael te ka hliphen pah ni.
Te vaengah thuh thai pawt vetih a tiingan neh,
a manuca neh a imben khaw a rhoelrhak vetih
amah khaw om mahpawh.
11 Na cadah rhoek te hnoo lamtah ka hing sak bitni.
Te phoeiah na nuhmai ni kai dongah aka pangtung thai.
12 BOEIPA loh he ni a thui. Amih kah tiktamnah mueh a mam ham aih ke. Boengloeng dongah a mam la a mam uh mai. Te dongah nang te m'hmil khaw m'hmil venim? M'hmil pawt vetih na mam rhoe na mam ni. 13 BOEIPA kah olphong neh kamah loh ka toemngam coeng. Bozrah te imsuep la, kokhahnah la, kholing la, rhunkhuennah la om ni. A khopuei boeih te kumhal due imrhong la om ni.
14 Olthang te BOEIPA taeng lamloh ka yaak coeng.
Laipai khaw namtom taengah ka tueih coeng.
Coi uh thae lamtah anih te paan uh laeh.
Te phoeiah caemtloek la thoo uh laeh.
15 Nang te namtom taengah tanoe neh
hlang taengkah a hnaep la kang khueh ni ne.
16 Na mueipuelnah loh nang n'rhaithi coeng.
Na lungbuei althanah neh thaelrhaep thaelpang ah aka om.
Hmuensang som te na loh tih
atha bangla na bu na sang sak cakhaw
te lamloh nang te kan suntlak sak ni.
He tah BOEIPA kah olphong ni.
17 Edom te imsuep la om vetih aka pah boeih khaw a taengah pong uh ni. Te vaengah a hmasoe cungkuem neh hlip ni. 18 Sue 19.24,25Sodom, Gomorrah neh a imben te imrhong la om coeng. BOEIPA loh, “A khuiah hlang loh khosa pawt vetih hlang capa khaw bakuep mahpawh,” a ti. 19 Sathueng bangla Jordan mingthennah lamloh tolkhoeng puei la cet coeng ke. Anih so lamloh ka hoep uh vetih ka cungpoeh ni. Anih te coelh ham unim ka khueh eh? Kamah bang he unim, unim kai aka tuentah? Ka mikhmuh ah pai tih boiva aka dawn te unim? 20 Te dongah BOEIPA loh Edom ham a uen cilsuep neh Teman khosa taengah a moeh a kopoek te hnatun uh. Boiva ca a koeng pah pawt atah a tolkhoeng khaw amih kongah pong mahpawt nim? 21 Amih kah cungku ol ah diklai he hinghuen vetih pangngawlnah ol te carhaek tuipuei duela a yaak uh ni. 22 Thahum bangla luei vetih tih ding ni ne. Te vaengah Bozrah te a phae a khuk thil ni. Te khohnin ah tah Edom hlangrhalh kah lungbuei te puencak nu kah lungbuei bangla om ni.
Damasku Ham Olphong
23 Isa 17.1-3; Amo 1.3-5; Zek 9.1Damasku ham olthang thae a yaak dongah
Khamath neh Arpad yak coeng.
Tuipuei mawnnah dongah paci tih mong thai pawh.
24 Damasku te tahah tih rhaelrham ham
a mael hatah lueihlaknah loh a cuuk thil.
Citcai dongah ca-om nu bangla tharhui loh a doek.
25 Ka omthennah khorha koehnah aih he,
balae tih khopuei koehnah he a toeng pawh.
26 Te dongah a toltung ah
a tongpang rhoek cungku uh vetih
caemtloek hlang boeih khaw
te khohnin ah kuemsuem uh ni.
He tah caempuei BOEIPA kah olphong ni.
27 Damasku vongtung te hmai ka hlup vetih
Benhadad impuei khaw a hlawp ni.
Kedar neh Hazor ham Olphong
28 Nebukhanezar, Babylon manghai Nebukhanezar loh a ngawn Kedar neh Hazor ram kawng khaw BOEIPA loh a thui.
Thoo lamtah Kedar te paan laeh,
khothoeng ca rhoek ke rhoelrhak laeh.
29 A dap neh a boiva te a rhawt pa uh ni.
A himbaiyan neh a hnopai boeih khaw,
amamih ham a kalauk neh a phueih uh vetih
amih te a kaepvai ah rhihnah neh a doek uh ni.
30 Hazor khosak rhoek loh khosak ham
rhaelrham lamtah muelh rhaehba khing mai laeh.
He tah BOEIPA kah olphong ni.
Babylon manghai Nebukhanezar te
nang soah a cilsuep a uen tih
a kopoek neh nang soah amih te a moeh.
31 Thoo uh lamtah thayoeituipan neh
ngaikhuek la aka om namtom te paan uh laeh.
Amah bueng te kho a sak uh dongah
thohkhaih om pawt tih thohkalh khaw om pawh.
He tah BOEIPA kah olphong ni.
32 A kalauk te maeh la,
a boiva boeih te kutbuem la poeh ni.
Baengki aka kuet khaw khohli
cungkuem taengah ka thaek ni.
Amih kah rhainah te kaepvai
rhalvangan boeih lamloh ka thoeng sak ni.
He tah BOEIPA kah olphong ni.
33 Hazor khaw kumhal kah khopong
pongui kah khuirhung la poeh ni.
Teah te hlang loh khosa pawt vetih
a khuiah hlang capa khaw bakuep mahpawh.
Elam Ham Olphong
34 Judah manghai Zedekiah a ram a tongcuek vaengah Elam ham BOEIPA ol te tonghma Jeremiah taengla ha pawk.
35 “Caempuei BOEIPA loh he ni a thui. Elam kah a thayung thamal vueilue lii te ka khaem coeng he. 36 Vaan khobawt pali lamkah khohli pali te Elam taengla ka khuen ni. Te khohli cungkuem taengla amih te ka thaek vetih namtom hmuen khaw om mahpawh. Te kah te Elam khuiah Elam kah a heh long pataeng a pha moenih. 37 Elam te a thunkha rhoek kah mikhmuh neh a hinglu aka toem rhoek mikhmuh ah ka rhihyawp sak ni. Ka thintoek thinsa te amih soah yoethae la ka thoeng sak ni. He tah BOEIPA kah olphong ni. Amih ka khah duela amih hnukah cunghang neh ka tueih ni. 38 Elam ah ka ngolkhoel ka hol vetih te lamkah manghai neh mangpa rhoek te ka milh sak ni. He tah BOEIPA kah olphong ni.
39 Tedae hmailong kah khohnin a pha vaengah Elam kah thongtla, thongtla te ka mael rhoe ka mael sak ni. He tah BOEIPA kah olphong ni,” a ti.