13
1 A cungkuem he ka mik loh a hmuh coeng.
Te te ka hna loh a yaak tih a yakming coeng.
2 Nangmih kah mingnah bangla kai khaw ka ming tih,
kai he nangmih lakah ka toem moenih.
3 Tedae kai tah Tlungthang taengah ka thui tih,
Pathen taengah ka ngaih bangla ka tluung lah sue.
4 Tedae nangmih ah laithae kap tih
nangmih boeih te mueirhol siboei ni.
5 U long nim n'ngam sak lah sue?
Na ngam uh lah vetih
nangmih ham cueihnah la om mako.
6 Kai kah toelthamnah hnatun dae lamtah,
ka hmuilai dongkah tuituknah he hnatung uh.
7 Pathen yueng la dumlai na thui uh vetih,
amah yueng la vuelvaeknah na thui uh aya?
8 A maelhmai na then sak uh vetih,
Pathen yueng la na ho uh aya?
9 Nangmih te n'khe vetih hlanghing taengkah,
omsaa bangla a taengah na omsaa uh koinih then aya?
10 Yinhnuk ah maelhmai na dan uh koinih,
a tluung ham khaw nangmih te ni n'tluung eh.
11 A boeimang loh nangmih te n'let sak tih,
amah kah birhihnah loh
nangmih soah tla het mahpawt nim?
12 Nangmih poekkoepnah he hmaiphu dongkah,
thuidoeknah banghui,
nangmih kah amkhawn khaw
amlai amkhawn banghui ni.
13 Kai taengah hilphah uh lamtah ka cal mai akhaw
kamah taengah mebang khaw thoeng mai saeh.
14 Balae tih ka saa te ka no dongla ka khueh vetih,
ka hinglu he ka kut neh ka pom eh.
15 Kai n'rhaem mai cakhaw
amah taengah ka ngaiuep mahpawt nim?
Ka longpuei he a mikhmuh ah ka thui pueng ni.
16 He khaw kai hamla khangnah la om pai.
Lailak tah a mikhmuh la kun mahpawh.
17 Nangmih hna dongkah ka olthui neh
ka olhoe he hnatun khaw hnatun mai dae.
18 Ka tang ni tila ka ming dongah
laitloeknah ka tawn coeng he.
19 Kai aka ho te unim?
Ka ngam mai laeh vetih ka pal mai mako.
20 Kai taengah panit bueng saii boeh,
na mikhmuh lamloh ka ying pawt ve.
21 Na kut te kai dong lamloh lakhla sak lamtah
na mueirhih neh kai n'let sak boeh.
22 Te phoeiah n'khue lamtah kan doo bitni.
Ka thui saeh lamtah kai he n'thuung saeh.
23 Ka taengkah thaesainah neh tholhnah he meyet nim?
Ka boekoeknah neh ka boirhaem lai kai n'tueng lah.
24 Balae tih na maelhmai na thuh,
kai he na taengkah thunkha bangla nan moeh mai.
25 Hawnlae a yawn nim na sarhing vetih
divawt rhae te nim na hloem eh?
26 Kai taengah khahing te nan daek tih,
ka camoe kah thaesainah te kai nan pang sak.
27 Job 33.11Ka kho he hloong dongah nan buen tih
ka caehlong boeih na ngaithuen. Ka kho dongkah khotang ham khaw na vuel.
28 Te khaw keet bangla hmawn tih,
himbai bangla bungbo loh a caak.