JOEL
(The Book of Joel)
Joel Cabu Kawng
Tonghma Joel kah mangthui dongah tholh yutnah aka khueh tah dantatnah a khoe pah tih hingthainah ham khodawk a ngai a ti. Khohmuen kah kaisih a tlung te Joel loh a hmuh. Te kaisih tangboeng long te vaan khaw boeih a hmuep sak. Te long te khohmuen kah toi-an neh sulrham boeih a caak. Te kah tangboeng kaisih tah hnukpoh pilnam hamla Pathen kah dantatnah ni. Kaisih bangla caem loh namtu a ngawn te a hmuh sak. Khohmuen te hi coeng, khosoih rhoek khaw nguekcoi coeng, lunglai khaw rhungrhap coeng. Ngaihmangnah hmanah Joel loh Boeipa a khue tih aka loh ham olcaeknah Boeipa khohnin kawng a thui. Boeipa long tah pilnam te ha bal saeh lamtah amih te lungma ka ti bitni,” a ti. A bawtnah ah tah kaisih loh a phae te koep a hoeih sak vetih pilnam loh Boeipa a bawk pawn ni. Israel neh Judah aka uk rhoek soah khaw Pathen kah dantatnah pai ni. Pathen uknah hmuiah ram te hoeih vetih Pilnam khaw hil uep pawn ni.
Sawt Yoeinah
I. Boeipa kah Khohnin a painah 1.1-20
A. Tonghma 1.1
B. Kaisih lucik 1.2-7
C. Pilnam yutnah neh Thangthuinah 1.8-20
II. Boeipa kah khohnin a phong 2.1-32
A. Rhalmah sahai 2.1-10
B. Armageddon Boeipa Caempuei 2.11
C. Palestin rhaengnaeng kah yutnah 2.12-27
D. Rhaengnaeng taengah hlatnah 2.28-29
E. Boeipa Khohnin kah miknoek 2.30-32
III. Namtom Soah Laitloeknah 3.1-16
A. Israel kho koep saknah3.1
B. Namtom Laitloeknah 3.2-3
C. Phoenicia neh Philistia a ho 3.4-8
D. Caem neh laitloekkung khuenah 3.9-16
IV. Kum Thawngkhat yoethennah 3.17-21
A. Jerusalem rhoeng hang 3.17
B. Judah ah khobuh 3.18
C. Egypt neh Edom pong 3.19
D. Jerusalem kah pomsangnah 3.20-21)
1
1 BOEIPA ol tah Pethuel capa Joel taengah pai.
Kaisih Lucik
2 He he patong rhoek loh ya uh lamtah
khohmuen khosa boeih loh hnatun uh.
He he nangmih tue neh
na pa rhoek tue ah khaw om noek nim?
3 Te te na ca rhoek ham neh
na ca rhoek kah a ca rhoek ham khaw,
a ca rhoek kah cadilcahma
patoeng ham khaw daek pah.
4 Lungmul cakcoih te kaisih loh a caak,
kaisih cakcoih te lungang loh a caak,
lungang cakcoih te phol loh a caak.
5 Yurhui rhoek haenghang uh lamtah rhap uh laeh.
Thingtui loh na dang te a koek ham coeng dongah
misurtui aka o boeih loh rhung uh laeh.
6 Olp 9.8Namtom loh ka pilnu khohmuen ah pongpa tih
hlangmi na moenih.
A no khaw sathueng no coeng tih
sathuengnu kah pumcu khaw a khueh.
7 Ka misur khaw loto la a khueh tih
ka thaibu he vahhu la tlaai rhoe tlaai coeng.
A baek te bokphae la a voeih.
8 A va camoe ham tlamhni aka bai
oila bangla rhaloei laeh.
9 BOEIPA im lamkah khocang neh
tuisi khaw pat tih BOEIPA bibi
khosoih rhoek te kohuet coeng.
10 Khohmuen a rhoelrhak tih diklai nguekcoi coeng.
Cangpai a rhoelrhak pah tih misur thai khaw kak.
Situi khaw ha.
11 Lopho rhoek yak uh lamtah
dumpho rhoek te rhung uh laeh.
Cang ham neh cangtun ham khaw
lohma cangah paltham coeng.
12 Misur neh thaibu te rhae coeng.
Tale, rhophoe neh thaihthawn khaw huum tih
khohmuen thingkung boeih koh.
Hlang ca rhoek lamkah
omngaihnah khaw daeh coeng.
13 Khosoih rhoek aw yen uh lamtah rhaengsae uh.
Hmueihtuk kah aka thotat rhoek rhung uh laeh.
Ka Pathen kah tueihyoeih rhoek kun uh lamtah
tlamhni neh rhaeh uh.
Na Pathen im lamkah khocang neh
tuisi khaw a hloh coeng.
14 Yaehnah te ciim uh lamtah
pahong khaw hoe uh laeh.
Patong rhoek, khohmuen khosa boeih te
na Pathen BOEIPA im ah tingtun uh lamtah
BOEIPA taengah pang uh.
Boeipa Hnin
15 Isa 13.6Ya-oe khohnin aih!
BOEIPA kah khohnin yoei coeng tih
tlungthang lamloh rhoelrhanah la pai ni.
16 Buh he mamih mikhmuh kah moenih a?
Mamih Pathen im lamloh
kohoenah neh omngaihnah khaw pat coeng.
17 A tii a muu te a laitling hmuiah ut coeng.
Thakvoh khaw pong coeng.
Cangpai te pok tih khai koengloeng uh coeng.
18 Rhamsa loh luemnah tal tih mat huei uh.
Saelhung tuping rhoek a lukil uh.
Amih kongah boiva tuping khaw boe coeng.
19 Khosoek kah toitlim te hmai loh a hlawp tih
khohmuen thingkung boeih hmaisai loh a hlawp dongah
BOEIPA nang taengah ka puen.
20 Kohong rhamsa pataeng sokca tui boeih kak tih
khosoek kah a toitlim hmai loh a hlawp pah dongah
nang te m'phoe coeng.