LUKA
(The Gospel According to Luke)
Olthangthen Luka Cabu Kawng
Pathen loh a cungkuem a lungnah dongah pilnam boeih kah khangkung la Jesuh halo. Hekah he ol panit he kungpuei la a khueh. Pathen kah lungnah Kawng a dangkah a kawng dongah n'hmuh thai. Samaria Hlang then kawng (10.25-37), Tu hma kawng (15.1-7), Capa aka hma (15.11-32). Jesuh mangmu aka coi im la a caeh kawng (19.1-10) neh hlang thloh laihmu pataeng a duek tomah daemnah (23.39-43) Luka cabu dongah ni dawk a thui.
Luka Olthangthen long tah Pathen Mueihla Cim kawng he a naep la a thui. Baptistma Johan he a manu bung khuiah ah Mueihla neh baetawt coeng (1.15) a ti. Mary taengah khaw , “Mueihla Cim nang taengah ha rhum ni” (1.35) a ti nah. Jesuh Khaw Mueihla hnukah a vai (4.1, 14, 18; 10.21) tih Mueihla he tah a lenkoek kutdoe ni (11.13) tila a cang puei.
Jesuh he thangthuinah olpuei la a khuehnah kawng khaw Luka loh a thui bal. Baptistma a dang vaengah (3.21), hnukbang a tuek vaengah (6.12), hnukbang rhoek a dawt vaengah (9.18), thinglam dongkah a hingnah a pat tom vaengah (23.34, 46) khawt thangthui. Thangthuinah neh tukkai tih thuinuetnah pathum a thui (11.5-9; 18.1-8, 9-14).
Khodaeng lungma ngaithuennah kawng olpuei la a thui. Amih hamla olthangthen a thui pah (4.18; 7.22), amih loh Pathen yoethennah a dang (6.20), amih te buhloeikung la a khue (14.13, 21), khodaeng Lazarus loh vaan a pha (16.20, 22), na khuehtawn te khodaeng rhoek ham tael pah (12.33) a ti.
Jesuh pumtak la thohkoepnah om ti te Luka loh rhep a thui. Jesuh loh nga a caak (24.42, 43). Te dongah Jesuh thohkoepnah he mueihla bueng pawt a pum taksa rhoe thoo a ti. A thokoepnah he oltak la om tih hlanghing a mueimang mailai bal moenih. Luka loh Caeltueih rhoek kah Bibinah cabu he khaw koep a tael bal.
Olthangthen cabu he Jesuh vaan la a lueinah kawng neh a bawt sak.
Sawt Yoeinah
I. Olrhannah 1.1-4
II. Hlang Capa kah hlanghing tukkainah 1.5—2.52
III. Hlang Capa kah baptisma, rhuirhong, noemcainah 3.1—4.13
IV. Hlang Capa loh tonghma, manghai boei la bibinnah 4.14—9.50
V. Hlang Capa Galilee lamloh Jerusalem la 9.51—19.44
VI. Hlang Capa Israel mang kah pumpaeknah 19.45—23.56
VII. Hlang Capa thohkoepnah neh Vaan la lueinah 24.1-53
1
Theophilus ham Capat
1 Mamih taengah aka soep tangtae hno kah cilol te muep a thuep tih boelrhai vaengah, 2 oltak kah tueihyoeih la aka om rhoek neh a tongcuek lamloh loh aka hmu rhep rhoek loh mamih taengah m'paek uh vanbangla, 3 kai khaw khaeh khaeh boeih ka thuep koep tih hlangcong Theophilu nang taengah daek ham tluep ka poek. 4 Te daengah ni hiluepnah ol loh n'thuituen te khaw na ming eh.
Johan Cun Ham A Thui
5 1 Kho 24. 10. Judea manghai Herod tue vaeng ah, Abijah rhoihui khosoih pakhat, a ming ah Zekhariah te om tih Elizabeth aka ming nah Aaron canu te a yuu nah. 6 Pathen hmaiah a dueng la bok om rhoi. Boeipa kah rhilam neh olpaek cungkuem dongah cuemthuek la pongpa rhoi. 7 Tedae Elizabeth tah cakol la om tih camoe a om kolla a kum khaw patong la bok om rhoi coeng. 8 Pathen hmaiah a khosoih vaengkah bangla anih rhoihui te aitlaeng loh a pha. 9 Khosoih kah khosing bangla, Boeipa kah bawkim khuiah kun tih hmueihphum ham a yo. 10 Bo-ul tue vaengah pilnam khuikah aka om rhaengpuei boeih khaw poeng ah thangthui uh. 11 Te vaengah Boeipa kah puencawn tah a taengah a phoe pah tih bo-ul hmueihtuk kah bantang ah pai. 12 Zekhariah loh a thuen doela a sawt dongah rhihnah loh anih a tlak thil. 13 Tedae anih te puencawn pakhat loh, “Zekhariah rhih boeh, nang kah rhenbihnah te a hnatun coeng dongah na yuu Elizabeth loh nang ham capa pakhat han cun vetih, a ming te Johan la na khue ni. 14 Nang ham omngaihnah neh kohoenah la om vetih anih kah rhuirhong dongah boeih omngaih uh ni. 15 Lam 6. 3. Boeipa hmaiah a len la om vetih, misurtui neh yu te o loengloeng mahpawh. A manu bung khuiah a om vaengah Mueihla Cim neh baetawt ni. 16 Israel ca rhoek te a Boeipa Pathen taengla muep a mael puei ni. 17 Anih tah a hmaiah Elijah kah mueihla neh thaomnah dongah lamhma ni. Pa rhoek kah thinko te ca rhoek taengla, lokhak rhoek te aka dueng lungcueinah dongla mael ni. Rhoekbah tangtae pilnam tah Boeipa ham a hmoel ni,” a ti nah.
18 Te phoeiah Zekhariah loh puencawn taengah, “Hekah he Ba nen lae ka ming eh? Kai tah patong la ka om coeng tih ka yuu khaw a kum te ham coeng,” a ti nah.
19 Dan 8. 16; 9. 21. Te dongah puencawn loh anih te a doo tih, “Kai tah Pathen hmaiah aka pai Gabriel ni, nang taengah he rhoek he phong ham neh thui ham n'tueih. 20 Tedae kai ol te na tangnah pawt dongah he he a soep nah khohnin duela olmueh la na om vetih na cal thai mahpawh ne. Amah tue ah ka ol te soep bit ni,” a ti nah.
21 Te vaengah Zekhariah te aka lamso pilnam a om dongah bawkim khuiah a di te a ngaihmang uh. 22 Ha thoeng vaengah tah amih te voek thai voel pawh. Te dongah bawkim khuiah a mangthui a hmuh coeng tila a ming uh. Te dongah Zekhriah loh amih taengah a lu a thuk tih olmueh la phat om. 23 Amah kah thothueng khohnin te a cup la a om phoeiah tah amah im la cet. 24 Te khohnin phoeiah a yuu Elizabeth te vawn tih amah khaw hla nga thuh uh. 25 “Boeipa loh kai ham hnin at neh a saii tangloeng coeng, te nen ni hlang lakliah kai dogkah hnaelnah te khoe hamla n'hip,” a ti.
Jesuh Cun Ham A Thui
26 Hla rhuk dongah Pathen taeng lamkah puencawn Gabriel te Galilee khopuei, a ming ah Nazareth la a tueih. 27 Mat 1. 18. David imkhui kah hlang pakhat, a ming ah Joseph ham te oila a bae pah. Oila ming tah Mary ni. 28 Te phoeiah huta taengla kun tih, “A lungvat tangtae aw, omngaih lah, Boeipa tah nang taengah om pai,” a ti nah.
29 Tedae Mary te tekah olka dongah konglong ngaihit la om tih te toidalnah loh metla a om eh tila a poek. 30 Puencawn loh anih te, “Mary rhih boeh, Pathen taengkah lungvatnah na dang coeng te. 31 Mat 1. 21. Te dongah bungvawn neh na yom tih capa na cun vaengah a ming te Jesuh sui ne. 32 2 Sam 7. 12,13,16; Isa 9. 6. Anih tah tanglue la om vetih Khohni capa tila a khue ni. Boeipa Pathen loh anih te a napa David kah ngolkhoel te a paek ni. 33 Jakob im ah kumhal due manghai pawn ni. A ram te khaw bawt ti om mahpawh,” a ti nah.
34 Te vaengah Mary loh puencawn taengah, “Hekah he metlam a om eh? tongpa khaw ka ming moenih,” a ti nah.
35 Te dongah anih te puencawn loh a doo tih, “Mueihla Cim loh nang n'thoeng thil vetih, Khohni kah thaomnah te nang m'muek sak ni. Te dongah na cun te aka cim Pathen Capa tila a khue bal ni. 36 Te phoeiah namah huiko Elizabeth te a patong soiah, camoe a yom van coeng ke. Te dongah cakol la a khue te tahae ah hla rhuk lo coeng. 37 Suen 18. 14. Pathen kah olka boeih long tah a tloel nah moenih,” a ti nah.
38 Te dongah Mary loh, “Boeipa kah salnu he, na olka bangla kai taengah om saeh,” a ti nah.
Te phoeiah puencawn tah anih taeng lamloh nong.
Elizabeth taengla Mary Cet
39 Mary tah tekah khohnin ah thoo tih tlang kah Judah kho ah thahluenah neh cet. 40 Zekhariah im khuiah kun tih Elizabeth te a voek. 41 Mary kah toidalnah te Elizabeth loh a yaak vaengah a bung khuikah cahni te soipet tih Elizabeth khaw Mueihla Cim neh baetawt. 42 Te vaengah tamlung neh pang khungdaeng tih, “N