MALAKHI
(The Book of Malachi)
Malkhi Cabu Kawng
Malkhi cabu dongah he Judah pilnam ham khodaeng neh uepvawtnah a pai kawng a thui. Te b.c 515 vaengah Jerusalem bawkim te a sak uh coeng dae ta Pathen kah olkam neh yoethennah tah vikvik aka hla bangla om. He bang khuiah he tonghma Malakhi loh khosoih rhoek kah a pamdah neh a ngaithuen pawt dongah Pathen kah thintoek a pai ham te a thui. Pilnam khaw Pathen taeng lamloh phael uh tih a thuem la Pathen taengah nawn uh pawh. Malkhi long tah pilnam loh khodaeng a ming he Pathen taengkah hnukpoh dongah aka thoeng ni a ti. Tedae Pathen loh a pilnam a lungnah te a thovael moenih, Boeipa aka hinyah tih a ming aka thangpom tah kutdoe a dang ni a ti. Boeipa kah khohnin a pai ham kawng neh te Malkhi loh ol a bawt sak. Te khohnin ah Pathen loh halang hlang te dan a tat vetih, uepom hlang te a hoeih sak ni. Puencawn la tonghma Elijah ha pai vbetih a pilnam lungnah khui la a mawt ni a ti. Malkhi cabu he b.c 455 vaengah tael coi ni a ti.
Sawt Yoeinah
I. Israel ham Pathen kah lungnah 1. 1-5
II. Khosoih rhoek kah tholhnah 1. 6—2. 9
A. Thothueng neh tuisituem vapsa 1. 6—2. 4
B. Cangpueinah khaw vapsa 2. 5-9
III. Pilnam ham rhalrhingnah 2. 10—4. 5
A. Kutveet taengah rhalrhingnah 2. 10-16
B. Laitloeknah ham rhalrhingnah 2. 17—3. 6
C. Yutnah dongah rhalrhingnah 3. 7-12
D. Pathen kah toelnah dongah rhalrhingnah 3. 13—4. 3
IV. Rhalrhingnah dongah culuinah 4. 4-6
A. Moses olkhueng te tuemnah4. 4
B. Messiah pabae la halonah kawng4. 5-6
1
Israel ham BOEIPA kah Lungnah
1 Malakhi kut lamkah Israel ham BOEIPA olrhuh ol,
2 Rom 9. 13.Isa 34. 5-17; 63. 1-6; Jer 49. 7-22; Eze 25. 12-14; 35. 1-15; Amo 1. 11,12; Oba 1. 1-14.BOEIPA loh, “Nangmih kan lungnah,” a ti. Tedae, “Kaimih metlam nan lungnah? Esau tah Jakob manuca moenih a?” na ti uh. He tah BOEIPA kah olphong ni. Jakob he ka lungnah ngawn ta. 3 Esau pataeng ka hmuhuet vaengah tah a tlang tlang te khopong la, a rho te khosoek pongui la ka poeh sak.
4 Edom loh, “N'laih coeng dae m'mael vetih imrhong khaw koep n'thoh bitni,” ti saeh. Caempuei BOEIPA loh he ni a thui. Amih loh thoh uh cakhaw ka koengloeng pah ni. Amih te halangnah khorhi la a khue uh vetih pilnam te BOEIPA loh kumhal duela kosi a hong thil ni. 5 Na mik loh a hmuh vetih, “Israel khorhi voel duela BOEIPA len pai,” na ti uh ni.
Altha Khosoih
6 Capa loh a napa, sal loh a boei a thangpom. Kai he pa la ka om atah kai thangpomnah tah melae? Kai boei atah kai taengah rhimomnah te melae? Caempuei BOEIPA he ni a thui. Nangmih khosoih loh ka ming na sawtsit lalah,
“Na ming te metlam kan sawtsit?” na ti uh.
7 Ka hmueihtuk dongah aka mop loh buh a nok lalah, “Ba nen lae nang kan nok? Amah longni BOEIPA kah caboei a sawtsit,” na ti uh.
8 Olr 15. 21.Mikdael te nawn ham na mop uh vaengah a thae moenih a? Khokhaem neh aka ngoi na mop vaengah a thae moenih a? Na rhalboei taengah te te khuen uh mai lah, nangmih te m'moeithen aya? Na maelhmai te a dangrhoek aya? Caempuei BOEIPA loh he ni a thui. 9 Te dongah Pathen mikhmuh ah kothae uh mai laeh. Te daengah ni mamih n'rhen eh. Nangmih kut lamkah aka thoeng nen he nangmih kah maelhmai te a doe aya? Caempuei BOEIPA loh he ni a thui.
10 Nangmih kongah unim thohkhaih aka khai lah ve. Te dongah ka hmueihtuk na sae sak uh pawh. Lunglilungla la, kai ham tah nangmih taengah ngaihnah tal coeng. Caempuei BOEIPA loh he ni a thui. Te dongah na kut lamkah khocang khaw ka doe mahpawh. 11 Khomik kah khocuk lamloh a khuirhai duela namtom lakli ah ka ming len. Hlupnah hmuen takuem ah ka ming neh khocang cilh khaw na tawn uh. Namtom taengah ka ming he len pai tila Caempuei BOEIPA loh a thui.
12 Tedae, “Ka Boeipa kah caboei te amah loh a nok, a thaih neh a buh khaw a sit om ,” na ti uh nen te na poeih uh. 13 “Te te ngakyal la phen hmut te,” na ti uh. Caempuei BOEIPA loh a thui coeng. A huen phoeiah khokhaem neh aka ngoi ni na khuen tih khocang la na khuen uh. BOEIPA loh, “Nangmih kut lamkah te ka doe aya?” a ti.
14 A tuping khuiah a tal a om lalah aka rhaithi hlang tah thae a phoei thil coeng. A caeng dae ka Boeipa ham tah a po a rhak ni a nawn. Caempuei BOEIPA loh, “Kai tah manghai puei la ka om tih ka ming he namtom taengah a rhimom,” a ti.