MAIKAH
(The Book of Micah)
Maikah Cabu Kawng
Micah he kum yacut parhet b.c. kah khosa hlang ni. Anih kah olthui dongah he tlangpuei Israel ram kah khopuei Samaria neh, tuithim Judah ram kah khopuei Jerusalem soah laitloeknah ham a rhalrhing sak. A tiktammueh la aka om te rhalthen la phetphet a voek. Boei loh khodaeng a hnaep te a ho tih, mueirhol bawknah, mawtkung hlangmuen, laithae khosoih, tangka tonghma rhoek te a cawh. Jerusalem khaw tim vetih bawkim khaw imrhong la om ni a ti. Tedae hmailong ah ram mongnah neh khobuhnah om ni a ti. Boeipa a pilnam te im la a mael puei ni. Mawt kung thai tah lunglai pum loh a ming vetih a hinyah ni.
A bawtnah dongah Abraham taengkah paipi aka poek Boeipa tah koeh uh pai ti la koehnah neh a bawt sak.
Sawt Yoeinah
I. Laitloeknah ham a hmuh1.1—2.13)
A. Samaria 1.2-8)
B. Judah 1.9-16)
C. Hlang muen 2.1-11)
D. Rhaengnaeng 2.12-13)
II. Messiah kah ram painah 3.1—5.15)
A. Laitloeknah ham laihuennah 3.1-12)
B. Ram kawng thuinah4.1-5)
C. Ram painah 4.6-13)
D. Manghai hnawtnah 5.1-2)
E. A hnalaknah 5.3)
F. Messiah pabae la painah 5.4-15)
III. Hnukkhueng kah rhennah 6.1—7.20)
A. Pilnam khoboe neh tholhnah 6.1—7.6)
B. Tonghma kah huithuinah 7.7-20)
MAIKAH
(The Book of Micah)
1
1 2Mg 15. 32-38; 2Kh 27. 1-7; 2Mg 16. 1-20; 2Kh 28. 1-27; 2Mg 18. 1—20. 21; 2Kh 29. 1—32. 33.BOEIPA ol he Judah manghai Jotham, Ahaz, Hezekiah tue vaengah Morasthite Maikah taengla cet. Te te Samaria neh Jerusalem ham ni a hmuh.
Israel Sokah Laitloeknah
2 Pilnam loh a cungkuem te hnatun saeh. Diklai neh a cungkuem loh hnatung saeh. Ka Boeipa Yahovah tah nangmih taengah om saeh. Ka Boeipa tah a hmuencim bawkim lamloh laipai la om coeng. 3 BOEIPA tah amah tolhmuen lamloh ha pai ngawn coeng ne. Te phoeiah suntla tih diklai hmuensang, hmuensang te a cawt. 4 Tlang rhoek he a yung duela yut uh coeng. Tuikol rhoek te hmai hmai kah khoirhat bangla phih uh tih tui bangla singling ah long. 5 Te boeih te Jakob kah boekoeknah neh Israel imkhui kah tholhnah dongah ni. Jakob kah boekoeknah te Samaria moenih a? Judah kah hmuensang te Jerusalem moenih a? 6 Te dongah Samaria te khohmuen lairhok la, misurdum kah thingling la ka khueh ni. A lungto te kolrhawk la ka lun pah vetih a khoengim te ka yoe pah ni. 7 A mueidaep boeih te a phop uh vetih a paang boeih te hmai ah a hoeh uh ni. A muei boeih te khopong la ka khueh ni. Pumyoih paang te coi sitoe cakhaw pumyoih paang la mael ni.
Maikha kah Rhaengsaelung
8 He ham he ka rhaengsae vetih ka rhung ni. Khotling neh pumtlingla ka van ni. Pongui bangla rhaengsaelung ka khueh vetih, tuirhuk vanu bangla nguekcoinah ka khueh ni. 9 A boengha te rhawp coeng tih Judah taengla a caeh dongah Jerusalem hil ka pilnam kah vongka te a pha. 10 Gath ah khaw puen boeh, Bethophrah ah rhap rhoe rhap uh boeh. Laipi dongah bol la bol nawn. 11 Saphir khosa rhoek nang khaw yahpohnah neh yangyal la nong laeh. Zaanan khosa khaw cet mahpawh. Bethezel kah rhaengsaelung loh a tungduelnah te nang lamloh a loh coeng. 12 BOEIPA taeng lamkah yoethaenah loh Jerusalem vongka duela a suntlak dongah Maroth khosa rhoek tah hnothen ham te kilkul coeng. 13 Lakhish khosa rhoek loh marhang te leng dongah buen laeh. Te tah Zion nu kah tholhnah a moenah ni. Na khuiah Israel kah boekoeknah ni a tueng rhoe. 14 Te dongah Israel manghai rhoek taengah phokhapnah la Akhzib imkhui kah Moreshethkath te maan na paek ni. 15 Mareshah khosa nang aka haek te koep kang khuen vetih Israel kah thangpomnah loh Adullam duela a pha ni. 16 Na omthenbawnnah camoe rhoek te kuet lamtah vok pah laeh. Na lungawng khawatha bangla ka sak. Nang taeng lamloh a poelyoe uh hae ni.