NAHUM
(The Book of Nahum)
Introduction
Nahum dongah Boeipa loh pilnam a bom vetih Assyria ne Nineveh te a phae pa ni a ti. 721 b.c., vaengah Assyria caem loh tlangpuei Israel ram te a loh tih pilnam boeih te khohla la a om sak. Te Pathen loh pilnam te Assyria ukknah khui lamloh a hlawt vetih boethae rhalmah loh Israel te muk voel mahpawh. Nahum cabu he Hebrew rhoek loh hlohlai aka dung koek la a thui. Pathen kah thaomah neh Nineveh a bawtnah te tingtoenglung la a sak. Nahum cabu he 612 b.c vaengah a tael coini a ti.
Outline
I. An ode to God’s majesty 1.1—2.2
A. Superscription 1.1
B. God’s vengeance 1.2-11
C. Judah’s restoration 1.12—2.2
II. An ode on Nineveh’s destruction 2.3—3.19
A. The prophecy of Nineveh’s fall 2.3-13
B. The cause of Nineveh’s fall 3.1-19
1
1 Isa 10.5-34; 14.24-27; Zep 2.13-15Elkosh Nahum kah mangthui cabu he tah Nineveh kah olrhuh ni.
Pathen kah Phulohnah
2 Pathen tah thatlai tih BOEIPA loh phu a loh.
BOEIPA loh phu a loh tih kosi boei la om.
BOEIPA loh a rhal soah phu a loh tih
a thunkha rhoek taengah khaw lunguen.
3 BOEIPA loh thintoek a ueh.
A thadueng tah len khaw len tih
hmil rhoe la hmil mahpawh.
BOEIPA tah cangpalam khui neh
hlithae khuiah khaw a longpuei om tih
cingmai te a kho dongah a tangdik nah.
4 Tuitunli te a tluung tih
a kak sak phoeiah tuiva khaw boeih a khah.
Bashan neh Karmel te a tahah sak tih
Lebanon rhaiphuelh khaw a tahah sak.
5 Amah taengah tlang rhoek khaw hinghuen uh tih
som rhoek khaw paci uh. A mikhmuh ah diklai khaw,
lunglai neh a khuikah khosa boeih khaw phoek uh.
6 A kosi hmai ah unim aka pai?
A thintoek thinsa te unim aka oel thai?
A kosi he hmai bangla hawk uh tih
lungpang khaw amah taengah palet uh coeng.
Nineveh Rhawpnah
7 BOEIPA tah citcai tue vaengkah
lunghim la then tih
amah ah aka ying rhoek tah a ming.
8 Tedae lungpook neh aka pah rhoek tah
amah hmuen ah a bawtnah hil a saii vetih
a thunkha rhoek te hmaisuep ah a hloem ni.
9 Balae tih BOEIPA te na taeng.
A bawtnah hil a saii sak vetih
citcai pabae khaw pai thai mahpawh.
10 Hling lakli ah aka ven uh tih
a yuhuem bangla aka yumii rhoek ngawn tah
divawt a rhae rhap bangla ung uh ni.
11 Nang lamlong ni
BOEIPA aka taeng la boethae kah
olrhoep hlang muen khaw a thoeng.
Judah ham Loeihnah Olkhueh
12 BOEIPA loh he ni a thui.
Rhuemtuet la ping uh tangloeng dae
a vok uh vetih khum ni.
Nang te kan phaep cakhaw
nang kan phaep voel mahpawh.
13 A cunghloeng te nang dong lamloh
ka khaem pawn vetih
na kuelrhui te khaw ka bawt ni.
Assyria Manghai Thupnah
14 Nang ham te BOEIPA loh a uen coeng.
Na ming ham khaw na pathen im ah
soem voel mahpawh.
Mueithuk neh mueihlawn te ka hnawt ni.
Na phuel te thaephoei ham ni ka khueh eh.
15 Isa 52.7Tlang soah rhoepnah aka phong tih
aka yaak sak kah a kho aih ke.
Judah aw, na khotue ah lam laeh.
Na olcaeng te thuung laeh.
Aka paan ham long khaw
na khuila paan ham tah
khoep voel ngawn mahpawh.
Aka muen tah a pum la a thup ni.