OLCUEIH
(Proverbs)
Olcueih Cabu Kawng
Olcueih cabu he Thuituen Ol (Ecclesiate) neh Joba (Job) cabu bangla Jews rhoek kah olcueih ol pakhat la om. He cabu dongah Pathen loh lunglai a longim neh tlueptluep a suennah kawng, Pathen kah mangtaengnah neh hlanghing a bomnah kawng a tael. Israel ca rhoek kah olcueih aka om te boeih a coi tih tun a khueh. He kah dongah he pilnam kah khosaknah, khoboe rhamlang, omih kawng, mawtnah, imkhui sadingnah kawng, pilnam kah khosaknah kawng a thui. Cueinah a kung la Pathen om tih boethae halangnah a then pawt kawng te a thui. He boeih nen ni Pathen hinyahnah kawng a tueng thai a ti. Boethae halang loh hlang he pocinah lamni a mawt. Cueihnah loh Pathen taengah uepom la om tih, Boeipa hnukbang ham khaw a hoihaeng.
Outline
I. Solomon kah Olcueih 1. 1—9. 18
A. Cueihnah a khue 1. 1—1. 33
B. Cueihnah Thaphang 2. 1—7. 27
C. Cueihnah Thangpom 8. 1—9. 18
II. Solomon kah Thuidoeknah (10.1—22.16)
III. Hlangcueih ham Olka 22. 17—24. 34
IV. Heziakiah loh a khueh Solomon olcueih 25. 1—29. 27
V. Agur kah ol 30. 1—30. 33
VI. Lemuel kah ol 31. 1—31. 9
VII. Huta then moeiboe 31. 10—31. 31
1
Thuidoeknah Loh A Mangtaeng
1 1Mg 4. 32.Israel manghai David capa Solomon kah he, 2 cueihnah ming sak ham neh ol yakmingnah te yakming sak ham thuituennah la om. 3 Thuituennah la loh ham neh duengnah, tiktamnah neh vanatnah te aka cangbam sak la om. 4 Camoe hlangyoe taengah mingnah neh thuepnah, khinglangnah aka pae la om. 5 Aka cueih loh hnatun saeh lamtah rhingtuknah la thap thil saeh, aka yakming loh a niing la hol saeh. 6 Aka cueih rhoek kah, nuettahnah olka neh amih kah olkael aka yakming sak la om. 7 Job 28. 28; Tgt 111. 10; Olc 9. 10.BOEIPA hinyahnah tah cueihnah, mingnah a tongnah la om tih aka ang loh thuituennah a hnoelrhoeng.
Boethae Longpuei Rhael Lah
8 Ka ca aw na pa kah thuituennah he hnatun lamtah na nu kah olkhueng khaw tloeng sut boeh. 9 Te te na lu ham mikdaithen kah lukhueng neh na rhawn ham oi la om. 10 Ka ca nang te hlangtholh rhoek loh n'hloih cakhaw rhoih boeh. 11 “Kaimih taengah pongpa lamtah hlang thii te rhongngol thil sih, ommongsitoe te a tloengtlaih la dawn sih. 12 Amih te saelkhui bangla a hing la dolh sih lamtah tangrhom ah a pum la a cungpung bangla om saeh. 13 A boei a rhaeng boeih neh a phu aka tlo te n'dang uh vetih mamih im he kutbuem neh m'baetawt sak mako. 14 Na hmulung te kaimih lakli ah naan lamtah mamih boeih ham sungsa pakhat la om saeh,” a ti uh atah, 15 Ka ca aw, amih kah longpuei ah cet boel lamtah na kho te amih kah a hawn lamloh hoi lah. 16 Amih kah a kho tah boethae hamla cungpoeh uh tih thii long sak ham loe uh. 17 Vaa phae boeih kah a hmaiah a tloengtlaih la lawk a tung uh. 18 Amih loh amamih kah a thii te a rhongngol thil uh tih a hinglu te a mae uh. 19 Mueluemnah dongah aka mueluem boeih kah a khosing te tah a boei kah a hinglu ni a rhawt pah.
Cueihnah A Hoe
20 Olc 8. 1-3.Cueihnah tah vongvoel ah tamhoe tih toltung ah a ol a huel. 21 Thohka ah aka kawk rhoek kah a lu ah a pang pah tih khopuei vongka ah ol a thui. 22 Hlangyoe nang loh mevaeng hil nim hlangyoe na lungnah ve, hmuiyoi rhoek tah amamih kah saipaat dongah naep uh tih, aka ang rhoek loh mingnah te a hmuhuet uh. 23 Ka toelthamnah he mael thil lah, ka mueihla he nang hamla kan thaa saeh lamtah ka ol he khaw nang kam ming sak eh. 24 Kang khue vaengah na aal uh tih ka kut kan cavaih vaengah nim te hnatung uh pawh. 25 Kai kah cilsuep boeih te na dul uh tih, kai kah toelthamnah khaw na ngaih uh pawh. 26 Kai khaw nangmih kah rhainah te ka nueih thil vetih nangmih ah birhihnah a thoeng vaengah kan tamdaeng ni. 27 Nangmih kah birhihnah tah khohli rhamrhael bangla ha pawk vetih na rhainah loh cangpalam bangla halo vaengah, citcai neh khobing loh nangmih te m'paan vaengah, 28 Kai ng'khue uh cakhaw ka doo mahpawh, kai n'toem uh cakhaw m'hmu uh bal mahpawh. 29 Te yueng te mingnah a hmuhuet uh tih BOEIPA kah hinyahnah te tuek uh pawh. 30 Kai cilsuep dongah naep uh pawt tih, kai kah toelthamnah khaw boeih a tlaitlaek uh. 31 A khosing kah a thaih te a caak uh vetih a cilkhih loh a lawn uh bitni. 32 Hlangyoe hnuknong loh amih te a ngawn vetih aka ang kah ommongnah loh amih te a milh sak ni. 33 Tedae kai taengah aka hnatun long tah ngaikhuek la kho a sak vetih yoethae kah birhihnah khuiah khaw rhalthal van ni.