1 Pa kah thuituennah te ca rhoek loh hnatun saeh lamtah yakmingnah dang hamla hnatung saeh. 2 Nangmih taengah aka then rhingtuknah kam paek coeng dongah ka olkhueng he hnoo boeh. 3 Ka camoe vaengah a pa taengah mongkawt la, a nu mikhmuh ah oingaih cangloeng la ka om. 4 Te vaengah kai n'thuinuet tih kamah taengah, “Ka ol he na lungbuei ah dueh lamtah ka olpaek ngaithuen neh hing puei . 5 Cueihnah te lai lamtah yakmingnah khaw lai lah. Ka ka dong lamkah olthui he hnilh boeh, phaelh boeh. 6 Cueihnah te hnoo boeh, na lungnah daengah ni namah te n'ngaithuen vetih nang te n'kueinah eh. 7 Cueihnah he ni tanglue, cueihnah he lai lamtah na hnopai boeih nen khaw yakmingnah he lai lah. 8 Cueihnah te picai lamtah namah te n'pomsang bitni. Namah te n'thangpom atah amah te kop van. 9 Na lu dongah mikdaithen kah lukhueng la om vetih nang taengah boeimang rhuisam han tloeng ni.

10 Ka ca ka hnatun lamtah ka olthui he doe lah. Te daengah ni na hingnah ah kum loh nang hamla a puh eh. 11 Cueihnah longpuei neh nang te ka thuinuet vetih namtlak then ah nang te kan cuuk sak ni. 12 Na caeh vaengah na khokan loh puenca pawt vetih na yong vaengah tongtah mahpawh. 13 Thuituennah te tu lamtah hlong boeh, na hingnah hamla kueinah. 14 Halang kah caehlong ah pongpa boeh, boethae rhoek kah longpuei dongah uem puei boeh. 15 Te te dul laeh, a taengla paan boeh. A taeng lamloh taengphael lamtah khum tak. 16 Thaehuet pawt atah ip uh tloel dae a ih loh a hmil atah hlang paloe sak ham te paloe sak uh thai pawh. 17 Halangnah buh te a ang uh tih kuthlahnah misurtui tul uh thae. 18 Khothaih kah koshae a cikngae vanbangla aka dueng kah caehlong khaw khosae kah a aa bangla a thoeng pah. 19 Halang rhoek kah longpuei tah khohmuep bangla om tih mebang neh a tongtah khaw ming uh pawh.

20 Ka ca, ka ol he hnatung lamtah ka olthui he na hna kaeng lah. 21 Na mik long khaw khohmang boel saeh lamtah na thinko khui ah te te ngaithuen. 22 Te te aka hmuh rhoek ham tah amamih kah hingnah neh a pumsa boeih ham khaw hoeihnah la om. 23 Na lungbuei te kueinah khingrhing lah hingnah kah a dawn tah te lamkah ni. 24 Ka dongkah olhmaang te na taeng lamloh thaek lamtah hmuilai dongkah olrhong oling khaw namah lamloh lakhla sak. 25 Na mik loh phek paelki saeh lamtah na mikkhu loh namah hmaiah buelh dueng saeh. 26 Heb 12. 13.Na kho ham namtlak te saelh pah saeh lamtah na longpuei khaw boeih cikngae saeh. 27 Banvoei bantang la phael boeh, na kho te a thae dong lamloh hoeptlang lah.