34
Aka Dueng Tah A Hlawt
[Abimelek hmai ah a omih te a thovael tih a haek dongah a caeh vaengkah David]
1 A tuetang boeih dongah BOEIPA te ka uem vetih,
ka ka dongah amah koehnah om yoeyah saeh.
2 Ka hinglu loh BOEIPA dongah thangthen saeh.
kodo rhoek loh ya saeh lamtah a kohoe uh saeh.
3 BOEIPA te kai neh pomsang uh sih lamtah
a ming te tun pomsang uh sih.
4 BOEIPA te ka tlap vaengah kai n'doo tih
ka rhihnahkoi boeih lamloh kai n'huul.
5 BOEIPA te a paelki vaengah hlampan uh tih
a maelhmai tal uh pawh.
6 Mangdaeng loh a khue te khaw
BOEIPA loh a yaak dongah
citcai boeih lamkah anih te a khang.
7 Amah aka rhih rhoek kah kaepvai ah
BOEIPA kah puencawn te rhaeh tih
amih te a pumcum sak.
8 1Pe 2.3Ten lamtah BOEIPA then tila hmuh lah.
Amah dongah aka ying hlang tah a yoethen.
9 Amah aka rhih rhoek ham tah
a tloelnah a om pawt dongah
a hlang cim rhoek loh BOEIPA te rhih uh lah.
10 Sathuengca rhoek loh vawtthoek tih
lamlum cakhaw BOEIPA aka tlap rhoek ham
hnothen pakhat khaw vaitah uh mahpawh.
11 Camoe rhoek halo uh. Kai ol he ya uh lah.
BOEIPA hinyahnah te nangmih kan cang puei eh.
12 1Pe 3.10-12Khohnin then hmuh ham aka lungnah tih
hingnah dongah aka omtoem hlang te ulae?
13 Na lai te a thae lamkah,
na ka te thailatnah aka thui lamloh rhalrhing lah.
14 A thae te nong tak lamtah hnothen te saii lah.
Rhoepnah te tlap lamtah anih te hloem lah.
15 Hlang dueng rhoek soah BOEIPA mik om tih
amih kah a pang uh te a hna a kaeng.
16 Thae aka saii rhoek te diklai kah
poekkoepnah lamkah khoe ham
BOEIPA loh a hmai a thuh.
17 Hlang dueng rhoek a pang uh vaengah
BOEIPA loh a yaak tih
amamih kah citcai boeih lamkah amih te a huul.
18 Lungbuei aka rhek taengah
BOEIPA a yoei pah tih mueihla aka hnipdik te a khang.
19 Hlang dueng kah yoethae he yet dae
yoethae khui boeih lamkah anih te BOEIPA loh a huul.
20 Jhn 19.36Anih kah a rhuh boeih a ngaithuen pah dongah
pakhat khaw paep mahpawh.
21 Halang te boethae loh a duek sak vetih,
hlang dueng aka hmuhuet te boe ni.
22 A sal rhoek kah a hinglu te
BOEIPA loh a lat tih amah dongah
aka ying boeih tah boe uh mahpawh.