1 Pathen namah tah ka Pathen ni. Namah ni kan toem coeng. Namah te ka hinglu loh halthi tih, ka pumsa loh namah te a hue, Diklai ah he rhamrhae neh buhmueh rhathih, tui mueh la om.

2 Tedae na sarhi neh na thangpomnah hmuh ham hmuencim ah nang kan dan.

3 Na sitlohnah he hingnah lakah then tih ka hmuilai he nang taengah domyok ti uh saeh.

4 Te dongah ka hingnah neh nang kan uem vetih, na ming neh ka kut ka thueng ni.

5 A th a neh maehhloi bangla ka hinglu hah vetih ka ka loh omngaih laa kah hmuilai neh a thangthen ni.

6 Ka rhaenghmuen lamkah loh nang kan poek vaengah nang te hlaempang pakhat puet kan mangtuk.

7 Kai ham bomnah la na om dongah na phae hlip ah ka tamhoe.

8 Nang dongah ka hinglu pangnal tih kai he na bantang kut loh n'duel.

9 Amih loh ka hinglu pocinah ham a mae uh dae diklai hmui la kun uh bitni.

10 cunghang kut ah pat uh vetih maetang buham la om uh ni.

11 Tedae, manghai tah Pathen rhang neh a kohoe ni. Amah dongah ol aka caeng boeih te a thangthen vaengah laithae aka thui kah a ka te a biing pah ni.