ROM
(Paul’s Letter to the Romans)
ROM CAPAT KAWNG
Hekah cabu dongah he Paul loh Rom kho kah Khrihca hlangboel taengah amah kawng neh olthangthen kawng a thui pah. Amah he Rom khopuei ah om pawt dae Khrihca rhoek loh anih te bahoeng a lamtawn uh. (15.22—-16.21). Amah he caeltueih la om tih olthangthen aka phong la a tuek (1.1). Pathen kah khangnah he hlang tom boeih Judah, Gentles boeih ham ni. (1.16).
Paul loh mamih boeih he tah Pathen thangpomnah neh aka tingtawk pawh hlangtholh rhoek ni a ti (3.23). Te koinih Pathen kah kolonah la metlam n'om thai eh? Hekah a kawng ni Paul loh amah kah capat dongah a thui. Ol a tongnah dongah Pathen kongaih bang hlang boeih a hing thai moenih a ti. Judah rhoek loh Moses kah olkhueng te a poe uh tih Gentiles rhoek loh Pathen kopoek te a hnawt uh. Pathen loh amih ham a hnuk a hmai la ol a thui a ti. (1.18—-3.20).
Rom capat he AD 56-57 tluk, Paul Korin kho ah a om vaengah a tael.
Sawt Yoeinah
Paul neh Pathen kah olthangthen (1.1-17)
Hlang tom he boeih tholh (1.18—3.20)
Pathen loh pilnam a doenah a longim (3.21—4.25)
Pathen kah pilnam ham hingnah thai (5.1—8.39)
Israel ca rhoek kah moeiboe (9.1—11.36)
Lungnah neh hingnah thai (12.1—15.13)
Paul kah toidal nah (15.14—16.27)
1
Rom ham Olthangthen
1 Jesuh Khrih kah sal, caeltueih la a khue tih Pathen kah olthangthen ham a coelh kai Paul, 2 Cabu cim khuiah amah kah tonghma rhoek lamloh ol a khueh tangtae, 3 A capa kawng tah pumsa ah David kah a tiingan lamkah ha thoeng. 4 Mamih kah Boeipa Jesuh Khrih tah, aka duek kah thohkoepnah lamloh cimcaihnah mueihla tarhing la thaomnah dongah Pathen capa la a hmoel coeng. 5 Anih dongah lungvatnah neh a ming yueng la namtom boeih taengah tangnah kah olngainah caeltueih te n'dang uh. 6 Te rhoek lakli ah nangmih khaw Jesuh Khrih kah a khue la na om uh. 7 Rom ah aka om tih Pathen kah thintlo, hlangcim la a khue rhoek boeih, nangmih taengah mamih kah Pa Pathen neh Boeipa Jesuh Khrih lamkah ngaimongnah neh lungvatnah soep saeh.
Rom kho Hip a Hue
8 Nangmih kah tangnah te diklai boeih ah a doek uh dongah nangmih boeih ham Jesuh Khrih lamloh ka Pathen te lamhma la ka uem. 9 Pathen tah kai ham laipai la om. Amah te a capa kah olthangthen dongah ka mueihla neh tho ka thueng. Te vanbangla nangmih poekkoepnah te ka thangthuinah dongah phat ka khueh yoeyah. 10 Pathen kah kongaih neh nangmih taengah pawk ham vai vai tah bet khui koinih kana ti. 11 Nangmih aka duel la mueihla kutdoe te nangmih taengah ka pak bet ham ni nangmih te hmuh ham ka rhingda. 12 Nangmih neh kai kah tangnah he nangmih taeng khat khat soah aka hloephloei la om. 13 Clt 19.21Manuca rhoek nangmih te mangvawt sak laeh ka ngaih moenih. Te ni nangmih taengla lo ham ka cai ninoe he. Tedae tahae hil he n'kang pueng. Te daengah ni nangmih taengah khaw, a tloe namtom rhoek taengah khaw a thaih pakhat la ka om van eh. 14 Greek rhoek neh kholong rhoek taengah, aka cueih neh aka ang taengah, laiba ka khueh. 15 Te dongah ni Rom kah nangmih taengah khaw phong ham ka yakvawt.
Tangnah rhangneh Duengcim nah
16 Mrk 8.38Olthangthen ham he ka yak pawh. Te tah Pathen kah thaomnah neh aka tangnah boeih ham tah lamhma ah Judah neh Greek ham khaw khangnah la om. 17 Hab 2.4“Hlang dueng tah tangnah loh a hing sak ni,” tila a daek. Te dongah Pathen kah duengnah tah tangnah lamloh tangnah dongah pumphoe coeng.
Gentile rhoek kah Khosak
18 Pathen kah kosi tah oltak boethae neh aka vueinan hlang rhoek kah boethae neh hlangrhong boeih soah vaan lamloh pumphoe coeng. 19 Pathen tah amih taengah a phoe pah coeng dongah te nen te amih taengah mingpha la aka om Pathen te hmat saeh. 20 Diklai suentae lamkah a kutngo hmuhmueh te phaeng a tueng la n'yakming. A thaomnah neh Pathen a coengnah tah dungyan la om. Te dongah amih te basa tloel la om. 21 Eph 4.17,18Pathen te a ming uh dae Pathen bangla thangpom uh pawt tih uem uh pawh. Tedae a poeknah dongah moelh uh tih a thinko lungmong kotalh la hmuep coeng. 22 Hlang cueih la om ham cai uh dae dap uh coeng. 23 Olr 4.16-18Pathen taengkah aka kuei thangpomnah te, aka hmawn thai hlang, vaa, rhamsa neh rhulcai kah mueimae, mueisa la a thovael uh.
24 Te dongah Pathen loh amih te amamih neh amamih a pum te yahbai ham amih kah thinko hoehhamnah dongah rhongingnah taengla a paek coeng. 25 Amih loh Pathen kah oltak te laithae neh a thovael uh. Te dongah aka suen lakah a suentae te tho a thueng thil uh tih a bawk uh. Amah tah kumhal ah uemom la om pai. Amen.
Muei bawk lamkah Pocinah
26 Te dongah Pathen loh amih te rhaidaeng kah a huebawtnah dongla a voeih. Huta long khaw a pongthohnah aka omnoek te aka omnoek neh a kingkalh la a thovael uh coeng. 27 Te banghui la tongpa rhoek long khaw huta neh pongthohnah aka omnoek te a hlahpham uh. Pakhat taengah a kocuknah neh a cahoeh uh dongah tongpa neh tongpa rhaidaeng la thoeng uh. Te dongah a tholhhiknah neh a kuek dantatnah te a yook uh.
28 A mingnah khuiah Pathen te khaw om sak ham a soepsoei uh pawt vanbangla Pathen loh amih te lungbuei a lolhmaih la a khueh pah. Te dongah saii ham koi te khaw khuetnet uh pawh. 29 Boethae, halangnah, phayoenah, halhkanah, boeih neh baetawt uh tih uethnetnah, ngawnnah, tohhaemnah, tuengkhuepnah, kothetnah, hlangthetkung khaw bae. 30 Hohmuh, Pathen aka thii nah, hnaephnapkung, buhueng aka pom, hlangoek, boethae aka phuengkung, a manu napa taengah aka lokhak, 31 lungmong rhoek, olpok rhoek, kotalh rhoek, muenying muenyang la om uh. 32 Te bang khosa rhoek te a duek uh tueng tila Pathen kah rhilam a ming uh lalah amamih bueng kah a saii bueng kolla te bang aka saii rhoek te khaw a rhoi uh.