RUTH
(The Book of Ruth)
Ruth Cabu Kawng
Laitloekkung rhoek neh Israel manghai rhoek a om tom vaengkah ni. Ruth kawng cil ol a toi ca bawt a daek. Bethlehem kah cako pakhat te khokha dongah khothoeng kah Moab ram la a poenngnah kawng a thui. Kho a sak li vaengah a ca rhoi loh Moab nu a yunah rhoi. Kum rha tluk a om vaengah a ca rhoi neh a va khaw duek tih Naomi te nuhmai la om. Te vaengah Bethlehem ah khobuh coeng tila a yaak dongah mael hamla cai. A langa rhoi loh a vai dae Moab ah khosa rhoi mai a ti nah. Te vaengah Orpah loh a ngai tih Ruth tah Judah ram la cet ham altha. Ruth he bahoeng khuel tih a hnukah tah Boaz loh a yunah. Ruth he Moab hoel la om dae Jew hlang a vanah rhang neh a casak lamloh manghai David he thoeng. Ruth dongah he yan Palestine ram kah lotawn cangah kawng khaw, manuca neh nuhmai cadah ham khokhan kawng khaw a thui. Ruth Cabu he b c 400 tluk vaengah daek coini tila poeknah om.
Sawt Yoeinah
Ruth loh Moaba caehtak 1. 1-22
Ruth Bethlehem kah khosaknah 2. 1—4. 22
1
Naomi Cako Moab La Poeng Uh
1 Laitloek rhoek lai a tloek tue vaengah khohmuen ah khokha pai. Te dongah Judah Bethlehem lamkah hlang pakhat tah Moab kho ah bakuep ham a yuu neh a ca rhoi te a caeh puei . 2 Te hlang kah a ming tah Elimelekh tih a yuu ming tah Naomi, a ca rhoi ming tah Mahlon neh Kilion a ming nah. Amih rhoek tah Judah Bethlehem kah Ephraim lamloh Moab khohmuen la cet tih om uh. 3 Te vaengah Noami tah a va Elimelekh te duek tih anih neh a ca rhoi la cul. 4 A ca rhoi loh Moab nu a ming ah Orpah neh Ruth te a loh rhoi tih kum rha tluk om uh. 5 Tedae Mahlon neh Kilion khaw bok a duek bal dongah a va, a ca om kolla huta amah buengla cul.
Ruth tah Noami Taengla Kibaeng
6 Tedae BOEIPA loh a pilnam te buh paek ham a hip coeng tila Moab kho ah a yaak. Te dongah hlah uh tih a langa rhoi neh Moab kho lamloh bal. 7 Te dongah a om nah hmuen lamloh nong tih a langa rhoi neh amah neh Judah kho long la bal ham cet uh.
8 Tedae a langa rhoi taengah Naomi loh , “Cet rhoi lamtah na manu im la mael rhoi laeh. Aka duek rhoek neh kai taengah na saii vanbangla sitlohnah te nangmih rhoi taengah BOEIPA loh han saii khaw han saii khaming. 9 BOEIPA loh nangmih rhoi te m'pae saeh lamtah na va im kah duemnah khaw hmu rhoi van,” a ti nah tih amih rhoi te a mok hatah a ol a huel uh tih rhap uh.
10 Te phoeiah anih te, “Namah neh na pilnam taengla bal uh sih,” a ti na rhoi.
11 Tedae Naomi loh , “Ka canu rhoi aw mael rhoi laeh. Kai taengla balae nan loh rhoi eh ? Nangmih rhoi kah na va la aka poeh ham khaw ka ko khuiah camoe ka khueh pueng tih nim ? 12 Ka canu rhoi mael rhoi lamtah cet rhoi laeh, ka patong coeng he, va khueh ham khaw kai hamla ngaiuepnah om ka ti koinih hlaempang pakhat ah ka va taengla ka om vetih ca kan sak sue, 13 Te te a rhoeng duela na lamso rhoi aya ? Hlang la aka poeh pawt te na oei rhoi aya ? Ka ca rhoi aw te moenih ta. BOEIPA kut loh kai n'nan coeng dongah kai tah nangmih rhoi lakah ka phaep uh phat coeng,” a ti nah.
14 A ol a huel tih koep a rhah uh phoeiah tah Orpah loh a mani te a mok. Tedae Ruth long tah khak a lingven. 15 Te vaengah, “Na maya tah a pilnam taeng neh a pathen taengla bal ke! na maya neh bal laeh,” a ti nah.
16 Tedae Ruth loh , “Nang hnoo ham neh nang hnuk lamkah bal ham tah kai he nan doo pawt mako, na pongpa nah ah ka pongpa vetih na rhaehba nah ah ka rhaehba ni, na pilnam khaw ka pilnam van, na Pathen khaw ka Pathen ni. 17 Na duek nah ah ka duek saeh lamtah pahoi ng'up uh van saeh. BOEIPA loh kai taengah han saii saeh lamtah hang khoep nawn saeh. Kai laklo neh nang laklo ah duek long mah n'tuiphih nawn saeh,” a ti nah.
18 A taengah caeh ham a ning mangkhak te a hmuh vaengah voek ham khaw a toeng.
19 Te dongah amih rhoi te Bethlehem a pha duela cet rhoi. Bethlehem a pha rhoi van neh amih rhoi kongah khopuei boeih te pangngawl tih, “Noami a te ?,” a ti uh.
20 Tedae amih taengah tah, “Kai he Naomi la ng'khue uh boeh, Tlungthang loh kai mat m'phaep coeng dongah kai he Mara la ng'khue uh mai. 21 Kai he khangrhueng la ka cet van dae BOEIPA loh kuttling la kai m'bal sak. Balae tih kai te Naomi la nang khue uh. BOEIPA loh kai n'doo tih Tlungthang loh kai soah thae a huet coeng,” a ti nah.
22 Naomi a bal vaengah Moab kho lamkah anih neh aka mael hmaih a langa Moab Ruth neh cangtun cangah cuek vaengah Bethlehem a pha rhoi.