SIRACH
(ECCLESIASTICUS)
SIRACH THUITUENNAH CABU KAWNG
Sirach cabu he a ngen long tah Thuituen Ol cabu a pabaenah la a ti uh. He kah cabu he Jesus Ben Sirach loh a tael coini a ti uh. Hebrew rhoek kah khokhuen cabu dongah koep a hmuh uh vaengah tah Eleazar Ben Sirach capa Jesuh casak Simon loh a tael coinih a ti uh. Simon he Hebrew hlang cueih khat la om tih anih he BC yacut panit tluk vaengah Jerusalem ah kho a sak. (Ecclus 50:27; cf. 51:23ff.). He kah cangpueinah dongah khak aka cak rhoek he a voelvai atah Saducean la om a ti. Hekah catael neh cangpueinah he Jews. Khat ben ah tah Olcueih (Proverb) cabu he ni a cak la koep a thuicaihnah ngaih la om. He kah a catael he sawt vaengah Jews hlang rhuem rhoek kah a tael longim bangla om. Jew rhoek neh Khristian rhoek long a phu a om sak uh. He cabu he BC 180 tluk vaengah a tael.
Sawt Yoeinah
Cueih thangpomnah (Boel 1) 1.1—23.27
a. Hutnah neh bibi kutdoe 1.1—16.23
b. Pathen kah cueihnah neh hlanghing 16.24—23.27
Cueih thangpomnah (Boel 2) 24.1—50.21
a. Cueihnah neh moeimae 24.1—32.13
b. Pathen cueihnah neh hlanghing khoboe 32.14—42.14
c. Pathen kah thangpom coengnah42.15—43.33
d. Patuel rhoek uemonah 44.1—50.21
Olbawtnah neh tomnah 50.22—51.30
1
Cueinah A Uem
1 Cueihnah boeih Boeipa lamkah tih. amah taengah a yoeyah la om.
2 Tuitunli kah laivin khaw, khotlan tuicip khaw, kumhal kah khohnin he u long a tae thai?
3 Vaan kah a sang neh, diklai kah a ka khaw, tangrhom kah a dung khaw u long a khe thai?
4 Cueinah he hno tloe cungkuem lakah a suen lamhma coeng, 5 yakmingnah neh mueltuetnah khaw khosuem kah pawn ni.
6 Cueihnah a yung tah u taengah nim a phoe? A langnah te uh long a ming?
7 Cueihnah mingnah he a phoe pah rhoek taengah om tih, aka yaakming rhoek taengah tah a coih la a hmuh.
8 Hlang pakhat om tih, anih tah cueih, bahoeng rhih ham aka om tah, A ngolkhoel dongah aka ngol Boeipa ni.
9 Amah loh cueihnah a suen tih, Te te a sawt phoeihah a nueh bal pueng, Te ni a bibinah boeih dongah a lun.
10 A kutdoe tarhing la mulhing boeih soah a paek tih, amah aka lungnah soah moeihoeih la a paek.
Boeipa Rhih he Cueihnah ni
11 Boeipa rhihnah he thangpomnah neh pomsangnah, kohoenah neh omngaihnah rhuisam la om.
12 Boeipa rhihnah loh thinko a hmae sak tih, kohoenah, omngaihnah, hinglung vangnah a paek.
13 Boeipa aka rhih tah a bawtnah hil omngaih vetih, a dueknah hnin ah yoethennah om ni.
14 Boeipa rhihnah he tah cueihnah a tongnah ni, te te bungko khuiah khaw uepomnah neh a suen.
15 Cueihnah tah hlanghing lakli ah kumhal khoengim la a suen tih, a cadil lakli ah khaw uepom la rhaehrhong pawn ni.
16 Boeipa rhihnah loh cueihnah a baetawt sak, a thai te hlang a hah sak.
17 Im pum te ngaih om hno neh a bae sak tih, a khai te a thaih neh a khawk sak.
18 Boeipa rhihnah he cueihnah rhuisam la om, mongnah neh saitlimnah ham sadingah a paek.
19 Mingnah te a tlan sak tih nuemnainah te a ngaih sak, Amah aka tu rhoek kah thangpomnah te a sang sak.
20 Boeipa rhihnah tah cueinah a yung la om, a hlaeng khaw hinglung a vangnah la om.
21 Boeipa rhihnah long tah tholhnah a haek tih, amah dongah aka tukkai hlang a thintoeknah boeih a nong tak.
22 A thuem mueh kah thintoeknah he a thuem la a om moenih, cungnueh a bawtnah hil kah thintoeknah loh hlang a poci sak.
23 A thuemnah rhi hil kammueh la om tih aka ueh tah, amih te kohoenah loh koep a mael thil.
24 A thuemnah rhi hil a ol aka tuem rhoek tah, A yet kah hmuilai dongah amih kah a then te a thui.
25 Cueihnah thakvoh khuikah tah olthui khaw cueih, tedae hingcimnah he hlangtholh ham tah tueilaeh kap.
26 Cueinah te na ngaih tah olpaek te tuem, Boeipa loh nang soah a hmoek bitni.
27 Boeipa rhihnah tah cueihnah neh rhilam la om tih, uepomnah neh kodonah ni a ngaingaih.
28 Boeipa rhihnah te altha boel lamtah, lungbuei kaekvang neh amah te paan boeh.
29 Hlang tloe hmuh ah thailatnah neh om boeh, na hmuilai khaw dawn lamtah tuem.
30 Namah te pom uh soeh boeh, Na tla vetih nang soah mingthaenah la pai ve. Boeipa loh na olhuep khaw a phoe vetih, hlangping hmai ah nang m'palet ve. Boeipa rhihnah neh na lo pawt dongah, na thinko ah thailainah ni a bae.