SOLOMON LAA
(The Song of Solomon)
Solomon Laa Kawng
Solomon Laa he Laa boeih khuikah Laa Then Koek la a pom sang uh. He laa dongah he hlang ngaih rhoi hlohlailung neh a then hlang a hlainah kawng a thui. Tongpag neh Oila loh amah rhoi tloeptloep hlai uh rhoi. Lungnah te a thangpom tih a hlai. Solomon kah Laa a ti lakah Solomon a hlainah laa coini a ti. Jews rhoek long tah Pathen neh Israel ca a lungnah rhoi la a poek. Khrihca rhoek long tah Khrih neh hlangboel (church) a lungah uh rhoi laa la a khueh. He Laa Bu he 586 b.c vaengah a tael.
Sawt Yoeinah
Solomon Laa 1. 1
Lungnah rhaipai 1. 2—2. 7
Lungnah yin mang 2. 8—3. 5
Lungnah hmakhuen 3. 6—6. 10
Lungnah lamcawn 6. 11—8. 4
Lungnah Thadueng 8. 5-14
1
1 1Mg 4. 32.Laa rhoek khuikah Laa he Solomon kah ni.
Oila Tongpa Hlainah
Oila
2 Namah hlo tah misurtui lakah then tih a ka dongkah moknah neh kai m'mok lah sue. 3 Namah tah situi bo neh na then pai tih situi loh na ming a puem pai. Te dongah ni hula rhoek long nang n'lungnah. 4 Namah hnukah kai m'mawt lamtah yong mai sih. Kai he manghai loh amah imhman la n' khuen coeng.
Rhoihui
Namah ah ka omngaih uh tih ka kohoe uh. Nang kah hlo rhoek tah misurtui lakah ka poek uh tih vanat la nang n'lungnah uh.
Oila
5 Ka muem cakhaw Jerusalem nu rhoek tah Kedar dap banglam khaw, Solomon himbaiyan banglam khaw rhoeprhui mai. 6 Khomik loh kai n'hmuh tih ka muem dongah nim kai nan hmuh pawh? Ka manu ca rhoek te kai taengah sai tih misurdum aka hung la kai n'khueh uh. Kamah taengkah ka misurdum ka hung pawt ah. 7 Ka hinglu kah a lungnah te kamah taengah thui lah. Melam na luem sak? Khothun ah melam na kol sak? Te boel tah balae tih na hui rhoek kah tuping taengah aka kulup bangla ka om?
Solomon neh A Cangyaeh
Tongpang
8 Huta rhoek khuiah sakthen te na ming pawt atah boiva kholaeh ah namah cet. Na maae-ca te aka dawn rhoek kah dungtlungim ah luem sak. 9 Ka cangyaeh namah tah Pharaoh leng dongkah ka marhang manu kam puet sak. 10 Na kam te aitlaeng neh, na rhawn khaw oidik neh damyal mai.
Rhoihui
11 Nang hamla sui aitlaeng neh cak hnathawn khaw n'saii bitni.
Oila
12 Kamah kah rhai-ul tah manghai amah loh a caboei dongah a hmuehmuei la a khueh. 13 Kamah hlo kah murrah cun tah kamah ham ka rhangsuk laklo ah rhaeh coeng. 14 Kamah taengkah kamah hlo tah Engedi misurdum kah tlansum thaihsu ni.
Tongpang
15 Ka cangyaeh tah na rhoep ne, vahui na mik khaw na sakthen ne.
Oila
16 Ka hlo nang tah na sakthen ne, mah kah soengca hingsuep khaw naepnoi bal. 17 Lamphai tah mah im kah tungpum saeh lamtah hmaical tah mah kah paekhop saeh.