Solomon Cueihnah
(Wisdom of Solomon)
SOLOMON CUEINAH CABU KAWNG
He cabu dongah he rhaepnah la olcueih muep a hlum. Solomon Cueinah cabu dongah he ya suen Hebrew poeknah neh Greek poeknah he rhenten a thoek. Hekah cabu he lamhma cuek tah Greek ollung nen ni ana tael uh. Hekah olcueih he n'tae vaengah Greek rhoek kah olcueih neh, Septuagint (LXX) ollung a hnonah muep om. He cabu he tah kum BC yacut a pacuek vaengkah Alexandria ah a tael coini. Suen hlang boel mawtkung father rhoek khuiah khaw Origen, Caesarea Eusebius, neh Hippo kah Augustine long tah Bible dongah a thum sak. Kum yacut a nit AD Muratorian Canon ah tah Bible dongah ana hlum uh. Protestants hlangboel rhoek long khaw bahoeng ana tae ngawn dae Bible Canon khuiah tah ana thum sak pawh. Roman Catholic longtah AD 1546 Trebt tunpuei ah tah langya ah Bible pakhat la ana khueh.
Judah rhoek te patuel rhoek kah tangnah lamloh nong pawt ham, hnaemtaeknah, ngaihmangnah, mueibawknah soep rhaep neh caemrhal tlung mai cakhaw Pathen kongaih la hing ham thapaeknah a thui.
Sawt Yoeinah
Duengnah khoboe then neh om a ngoe1. 1—5. 23
In praise of wisdom 6. 1—9. 18
Cueihnah Pathen kah hoeptlangnah10. 1—12. 27
Hlang-ang neh mueibawk rhoek13. 1—15. 13
Israel ham yoethennah neh dantatnah 15. 14—19. 22
1
A Thuemnah Ham Thaphohnah
1 Nangmih diklai khoboei rhoek loh duengnah te lungah uh lamtah Boeipa te a then la poek. Amah te thinko cim neh tlap uh.
2 Aka noemcai pawt long ni amah te hmuh tih Amah aka uepvawt pawt taengah ni a phoe pah.
3 Voeldak kah poeknah loh pilnam te Pathen neh a hla sak tih, A thaomnah aka noemcai hlang-ang te a toel.
4 Cueihnah he tah thailat hinglu khuila kun pawt tih, Tholh sal kah pum dongah ah khaw nuen mahpawh.
5 A cim neh mueihla a toel pah tah, thailatnah lamloh yong vetih Hlang ang kopoek khaw a hnuk la a nong tak ni, A haeh lah pongpa ham khaw yak ni.
6 Cueihnah loh mueihla a thintlonah tih, Aka salpham rhoek te tah a ol thae lamloh loeih mahpawh. Pathen tah kotak kah ngaihlih dongah laipai la om.
7 Boeipa kah mueihla he diklai ah bae tih, A tuuk hno boeih loh a thui te rhenten a ming
8 Te dongah a haeh la ol aka cal boeih tah hlipdahnah om pawt vetih, Tiktamnah neh lai a tloek ham khaw rhael thai mahpawh.
9 Lailak kah a lungpoek khuiah khaw khenah om vetih, Amih kah olka yasaknah te khaw Boeipa taeng a pha ni.
10 Hlang uet hna loh a soeprhaep he a yaak tih kohuet ol khaw a yaak mueh la cet pawh.
11 A poeyoek la kohuet khaw rhalrhing, na lai te khaw lokhak taeng lamloh kuemsuem lah.
12 Na khosak a thae dong lamloh dueknah te khue boeh, Na kut dongkah bisai lamloh khaw pocinah khaw khuen boeh.
13 Pathen loh dueknah a saii moenih, Aka hing kah dueknah dongah khaw a hmae bal moenih.
14 Hno cungkuem om saeh tila a suen coeng tih, Diklai a soepnah hamla rhuirhong boeih a khueh. Te khuiah te pocinah sue khaw a om moenih, Hell kah thaomnah khaw diklai ah a om moenih.
15 Duengnah neh aka nguel hno la om.
16 Tedae lailak kah a ol neh a khoboe loh dueknah a khue. A paya la a poek tih rhap a sun, Anih neh moi a boh khaw, A pueipo neh a kiba la a om dongah ni.