2 Te dongah long aka phaelh khaw voehvoeh na tlaih tih, Amih te a tholhnah bangla na thui pah tih na rhalrhing sak. Te dongah amih khaw halangnah lamloh loeih saeh lamtah, Boeipa namah dongah pangtung saeh.

3 Hlamat kah na khohmuen cim kah khosa rhoek te,

4 Amih kah hnam bibi neh aka cuem pawh tuisituem khaw, 5 hlang thii saa soah amih kah khotue a khue khaw, a ling a al kah bawknah dongah a tuenpa khaw na thinah.,

6 A manunap khaw a hingnah lungma aka ming te aka ngawn la om uh. Te dongah a pa rhoek kut dongah amih te thup hamla na ngaih.

7 Te dong namah taengkah khohmuen a then koek te Pathen sal rhoek neh a tingtawk khohmuen la dang pai saeh.

8 Tedae amih khaw hlang la a om van dongah na hlun, Na caempuei kah puencoe la khoirhil khaw na tueih tih, Amih te a yol, yol ah a phae.

9 Lailak pataeng caemtloek vaengah hlang dueng kut dongah khaw, kohong satlung aka kawk neh na ol khaa dongah amih phae ham khaw, Na voeih tarha mai moenih.

10 Tedae amih te a yol, yol ah lai nan tloek pah tih, yutnah hamla a tuethen te amih na paek. A moecuek lamloh thae uh tih, a om paek lamloh halang uh dongah, a poeknah longpuei te tho uh pawt cakhaw, Na ngaiyaknah moenih.

11 A tongcuek lamloh amih tah rhunkhuen koca la om uh dae, A tholhnah thuung kolla na khueh te, pakhat khaw rhihnah a om moenih.

12 Unim, “Balae na saii,” aka ti vetih, na laitloeknah te a oelh eh? Namtom a po la na khueh te unim aka kamkaih vetih, hlangthae ham hlangcal la nang taengah unim aka huithui eh?

13 Pilnam cungkuem aka ngaithuen la, Namah phoeiah tah pathen pakhat khaw a om moenih. A haeh la lai na tloek pawh tila u long nang n'cawt eh.

14 Nang long na toel hlang te manghai long khaw, a lu long khaw a hloep thai aya?

15 Na dueng dongah a cungkuem he a dueng la na uktaem, Aka tingtawk pawt la aka sai te, dantat ham neh boe sak ham he, Na thaomnah tah hlang lang bangla a ngai.

16 Na thadueng he khaw duengnah a yung la om tih, na tlungthangnah khaw a cungkuem aka rhen la boeih om.

17 Na thaomnah te na thadueng aka uepvawt rhoek soah na tueng sak tih, Te te aka ming lakli ah vapsa rhoek te na ho coeng.

18 Thaomnah dongah a khuet la na om tih, Bidip la lai na tloek. Thinsen tangkik la kaimih nan uktaem tih, Na coelh sarhui te thuenghlaeng hamla na sarhi tak.

19 Te tlam te bibi dongah pilnam na tukkil dongah hlang dueng long khaw rhennah a khueh, Amih te a tholh yutnah na paek dongah, na ca rhoek tah ngaiuepnah then te a hah la na khueh sak.

20 Dueknah neh aka ting khaw, na sal rhoek kah thunkha khaw, a halangnah te toeng sak hamla a tuetang then na paek tih thinsen neh ngaithuen halue la na toel atah,

21 na ca rhoek te me tlam lae khak lai na tloek pai eh? A napa rhoek taengah khaw olcaeng neh paipi te, a then olkhueh neh muep na paek coeng dae ta.

22 Kaimih nan huih vaengah ka thunkha rhoek te, voei thawng rha na tam coeng. Lai ka tloek uh vaengah na thennah te ka poek uh saeh lamtah, Kaimih lai n'tloek thil vaengah na sitlohnah ka lamtawn pai eh.

23 Te dongah anglat kah hingnah neh paihaeh la kho aka sa tah amah kah tueilaehkoi dongah na phaep.

24 Tholhnah caehlong ah khohmang la cet uh tih, rhamsa khaw pathe bangla a ngai uh. Te te a thankha long pataeng a tuei dae ta.

25 Te dongah kopoek aka talh camoe bangla, Amih aka nueihnah ham na laitloeknah nan tueih.

26 Tedae a doelhyoem la aka ho kah rhalrhingnah te hna aka vainah mueh hlang tah, Pathen kah laitloeknah neh a tingtawk te a ming bitni.

27 A patang uh vaengah a borhim uh tih, Saihluen rhoek pathen la khueh ham a poek uh dongah, Amamih kah yakmingnah loh a ngawn uh. Te daengah ming hamla a aal uh lamha Pathen bueng te a hmuh tih a hmat uh. He tlam ni amih soah dantat nah khaw a bawtnah hil a pai.