ZEPHANIAH
(The Book of Zephaniah)
Zephaniah Cabu Kawng
Tonghma Zephaniah loh Boeipa kah Khohnin puei ham a rhalrhing sak. Te tah a ol aka ngai pawt rhoek boeih dantat hamla Pathen kah khohnin kawng ni. Zephaniha taengkah ol aka pai he Pathen kah muei loh a cahoehnah neh a tong. Diklai mulhing boeih, pilnma neh rhamsa khaw, vaa neh nga khaw amah loh a suen dae a phae pawn ni. Boeipa kah khohnin he buengrhuet ha pai koeloe pawn ni. Amah aka bawk tih tlayae rhoek boeih a hnukkhueng hil ah daem ni. Boeipa taengah uepom hlang rhoek long tah Jerusalem la koep bal ni. Amih loh Boeipa kah tanah te umponah a khueh uh ni.
Sawtyoeinah
I. Boeipa Khohnin ham Rhalrhingnah, 1. 1—2. 3
A. Ol a tongnah 1. 1.
B. A cungkuem pocinah 1. 2-3.
C. Judah neh Jerusalem so laitloeknah 1. 4-13.
E. Laitloeknah kawng thuicaihnah 1. 14-18.
F. Laitloeknah khaw a hoep khaming2. 1-3.
II. Kholong namtom sokah laitloeknah 2. 4-15
A. Philistia 2. 4-7.
B. Moab neh Ammon2. 8-11.
C. Egypt 2. 12.
D. Assyria2. 13-15.
III. Jerusalem sokah Yoethennah, 3. 1-20
A. Jerusalem kah tholhnah3. 1-8.
B. Rhaengnaeng ham yoethennah 3. 9-20.
1
1 2Mg 22. 1—23. 30; 2Kh 34. 1—35. 27.Judah manghai Amon capa Josiah tue vaengah, Hezekiah koca, Amariah capa Gedaliah kah a capa, Kushi capa Zephaniah taengah BOEIPA ol pai.
BOEIPA kah Khohnin Puei
2 Diklai maelhmai dong lamkah a cungkuem he tun ka thup ni. He tah BOEIPA kah olphong ni. 3 Hlang neh rhamsa khaw ka thup ni. Vaan kah vaa neh tuitunli kah nga khaw, a rhok a rhap neh halang khaw ka thup ni. Hlang he diklai maelhmai dong lamloh ka hnawt ni. He tah BOEIPA kah olphong ni. 4 Judah taeng neh Jerusalem kah khosa boeih taengah ka kut ka thueng ni. He hmuen lamloh Baal kah a coih, mueirhol khosoih ming neh, khosoih rhoek te khaw, 5 Imphu ah vaan caempuei taengla aka bakop rhoek te khaw, BOEIPA taengah a toemngam lalah Milkom taengah aka toemngam tih aka bakop khaw, 6 BOEIPA hnuk lamloh aka balkhong rhoek te khaw, BOEIPA te tlap pawt tih amah aka toem pawt te khaw ka khoe ni. 7 BOEIPA hnin he yoei coeng tih ka Boeipa Yahovah mikhmuh ah he saahlah hoeih. BOEIPA loh hmueih a tawn tih a khue rhoek te a ciim coeng. 8 BOEIPA kah hmueih hnin a pha pawn ni. Te vaengah mangpa rhoek taeng neh manghai capa rhoek taengah khaw, kholong kah hnicu aka bai boeih taengah khaw ka cawh ni. 9 Te khohnin ah tah thohkong aka poe boeih, a boei im te kuthlahnah neh hlangthai palat aka bae sak khaw ka cawh ni. 10 He tah BOEIPA kah olphong ni. Te khohnin ah nga vongka lamkah pangngawlnah ol, a hmatoeng lamkah rhungol, som lamkah a len pocinah om ni. 11 Vakawh sumngol kah khosa rhoek te rhung uh laeh. Hnoyoi pilnam boeih hmata vetih cak phueikung boeih khaw khoe uh ni. 12 A tue te a pha vaengah Jerusalem te hmaithoi neh ka phuelhthaih ni. A sampa a khal dongkah hlang rhoek te ka cawh ni. Te rhoek loh a thinko nen tah, 'BOEIPA a then moenih, thaehuet mahpawh,’ a ti. 13 A thadueng te maehbuem la, a im te khopong la om ni. Im a sak uh akhaw om nah uh mahpawh. Misurdum a tawn uh akhaw a misurtui te o uh mahpawh. 14 BOEIPA kah khohnin yoei coeng, yoei tangkik coeng. BOEIPA hnin kah ol tah bahoeng tok coeng. Hlangrhalh khaw khahing la pahoi kawk coeng. 15 Te khohnin tah thinpom khohnin, citcai neh khobing khohnin, khohli rhamrhael neh imrhong khohnin, hmaisuep neh khohmuep khohnin, cingmai neh yinnah khohnin ni. 16 Khopuei cakrhuet taeng neh a sang bangkil taengkah tuki neh tamlung khohnin ni. 17 Hlang te ka daengdaeh vetih mikdael bangla pongpa uh ni. BOEIPA taengah a tholh uh dongah amih thii te laipi bangla a hawk ni. A buhcak te Aekkhuel bangla om ni. 18 BOEIPA kah thinpom hnin ah tah a cak long khaw, a sui long khaw amih huul hamla noeng mahpawh. A thatlainah hmai loh diklai pum he a hlawp ni. Diklai khosa boeih te a bawtnah hil tlek a saii ni.