1 Bawipa venawh zeelnaak awi kqawn unawh taw, ang ming ce khy lah uh; a ik-oeih sai ce thlangphyn a venawh sim sak lah uh. 2 A venawh laa sa unawh taw, am kyihcahnaak laa sa lah uh; kawpoek kyi ik-oeih a sai ce kqawn uh. 3 Ang ming ciim boeimang seitaw; Bawipa ak suikhqi ak kawlung taw zeel seh. 4 Bawipa ingkaw ak thaawmnaak ce sui u nawhtaw; a haai ce a poepa na sui lah uh. 5 Kawpoek kyi ngaihak ik-oeih a saikhqi ingkaw awidengnaak ak kqawn ce sim poe lah uh, 6 a tyihzawih Abaraham a cadilkhqi aw, amah ing ak tyh Jakob cakhqi aw sim poe lah uh. 7 Anih taw Bawipa ningnih a Khawsa na awm hy; a awidengnaak taw khawmdek boeih ak khan awh awm hy. 8 A paipi ce kumqui dyna sim poe nawh, ak awipeek ce, cadil naa thong oet dyna sim poe hy, 9 Gen 12.7; 17.8; Gen 26.3.Abraham ing ani awk haih paipi ing Isak a venawh awi a taak ce sim khak hy. 10 Gen 28.13.Ce ak awi ce awitlyh a myihna Jakob a venawh caksak nawh, Israel a venawh kumqui paipi na tahy: 11 Kanan qam ce ni pe kawng nyng saw na taham qo amyihna pang kawp ti,” tina hy. 12 Thlangmi ami zawica awh, ak zawica tloek ce, qam khuiawh khin na awm hy, 13 phyn pynoet ingkaw pynoet a venawh, qam pynoet ingkaw pynoet a venawh pla khing uhy. 14 Gen 20.3-7.U ingawm cekkhqi ce am thekha nak khqi uhy; a mingmih awh sangpahrangkhqi ce toel hy: 15 Situi ak sypkhqi ve koeh bi kawm uk ti; ka tawnghakhqi awm nganbawh koeh pe qoe qoe kawm uk ti,” tina hy. 16 Gen 41.53-57.Ram khuiawh khawseet khawkha pha sak nawh cekkhqi a buh boeih ce hqe pehy; 17 Gen 37.28; 45.5.cekkhqi haiawh thlang pynoet – tamnaa na ami zawih Joseph ce tyih pehy. 18 Gen 39.20—40.23.A khaw awh khawcehkhqi byn pe unawh, a hawng awh thi quikhqi ing khit uhy, 19 amah ing ak kqawn oepchoeh ce a soep hlan khui, Bawipak awi ing ak thym ce a sim sak hlan dy cemyihna awm hy. 20 Gen 41.14.Sangpahrang ing thlang tyi nawh loet sak hy, thlang kqeng ak ukkung ing anih ce loet sak hy. 21 Gen 41.39-41.Anih ce ipkhui awh boei na ta nawh, a taak ik-oeihkhqi boeih ak khan awh ukkung na tahy, 22 boei capakhqi ce a ngaih amyihna cawngpyi aham ingkaw, a hqamcakhqi cyihnaak cawngpyi aham cemyihna awm sak hy. 23 Gen 46.6; Gen 47.11.Cekcoengawh Israelkhqi ce Izip ram na kun hy; Ham ram awh khin na Jakob ce awm hy. 24 Ex. 1.7-14.Bawipa ing ak thlangkhqi ce ak thaih qah sak hy; a qaalkhqi ham khawzah na coeng sak hy, 25 amah ak thlangkhqi sawhnaak aham cekkhqi ak kawlung ce hawi pe nawh, a tyihzawihkhqi ce huhqyt sak hy. 26 Ex. 3.1—4.17.A tyihzoeih Mosi ingkaw ak thlang tyk Aaqon ce tyi hy. 27 Cekkqawi ing cekkhqing lak awh kawpoek kyi hatnaak ingkaw ngaihak ik-oeih ce Ham qam awh sai pe hy nih. 28 Ex. 10.21-23.Thannaak ce tyi pe nawh rampum awh khaw than sak hy – kawtih ak awi ce cekkhqi ing am eek pehy na ti nawh nu? 29 Ex. 7.17-21.Tuikhqi ce thi na thoeng sak nawh, ngakhqi thih pe sak kang hy. 30 Ex. 8.1-6.A ram khuiawh ta-ukhqi da pe sak nawh a boeikhqi a ihkhunkhqi dyna awm pe sak hy. 31 Ex. 8.20-24; Ex. 8.16,17.Awi kqawn pe tlaih bai nawh, pikhqi law pe khung bai hy, a rampum awh hlip hqoeng na be sak hy. 32 Ex. 9.22-25.Khawtlan ce qeel na thoeng sak nawh, a rampum awh khaw phla pe sak hy; 33 misurkungkhqi ingkaw thaikungkhqi deh pe kanglak nawh a qam khuiawh kaw thingkhqi tluk pe sak boeih hy. 34 Ex. 10.12-15.Awi kqawn tlaih bai nawh, cawh boeikhqi ce law uhy, noet noeng kaana khamkhawkkhqi ce doem hy; 35 a qam khuiawh kaw thinghah ai pe kanglak nawh dek awh ak cawt tawi a an ai pe kang hy. 36 Ex. 12.29.Cekcoengawh a ram khui awhkaw cakcyk boeih ce him pehy, thlanghqing ak thaihcykkhqi boeih ce him pehy. 37 Ex. 12.33-36.Sui ingkaw ngun phyih sak nawh, Isarel ce cawn sak hy, a pilnam khuiawh tha amak awm pynoet awm am awm hy. 38 Israel a dawngawh cekkhqi ak khan awh kqihnaak a pha a dawngawh, cekkhqi ami ceh awh Izipkhqi amik kaw zeel hy. 39 Ex. 13.21,22.Cekkhqi ak dah aham myi zam sak hy, than awh vangnaak ak pe na mai pehy. 40 Ex. 16.2-15.Cekkhqi ing ami thoeh awh, tytyt pe nawh khan nakaw phaihpi ing ak phoenkhqi phyi pe sak hy. 41 Ex. 17.1-7; Num. 20.2-13.Lungnu awng nawh tui thoeh pe sak hy; kqawng qamkoh awh tuiva a myihna lawng hy. 42 A tyihzawih Abaraham a venawh a peek a awitaak ciim ce sim khak hy. 43 Zeel doena ak thlangkhqi ce ceh pyi nawh, ak tyh thlangkhqi ce awmhly khynaak ing hqui a sawi hy; 44 Josh. 11.16-23.thlangphyn khqi a ram ce cekkhqi venawh pehy, thlak chang ing a bi a lawh ce ram ce qo na pang uhy – 45 a mingmih ing ak awipeekkhqi ce hquut unawh a cawngpyinaak awikhqi ce ami hquutnaak thai aham cekkhqi ce sai pehy. Bawipa taw kyihcah lah uh.