23
लेवीमन
1 जब दाऊद ह बहुंत उमर के हो गीस अऊ डोकरा हो गीस, त ओह अपन बेटा सुलेमान ला इसरायल के ऊपर राजा बनाईस।
2 ओह इसरायल के जम्मो अगुवा अऊ संग म पुरोहित अऊ लेवीमन ला घलो इकट्ठा करिस। 3 जतेक लेवी तीस साल या तीस साल के ऊपर के रिहिन, ओमन के गनती करे गीस, अऊ आदमीमन के कुल संखिया अड़तीस हजार होईस। 4 दाऊद ह कहिस, “येमा के चौबीस हजार मनखेमन के ऊपर यहोवा के मंदिर के काम के जिम्मेदारी होही अऊ छै हजार मनखे अधिकारी अऊ नियाय करइया होहीं। 5 चार हजार मनखेमन दुवारपाल अऊ चार हजार मनखेमन ओ बाजामन के संग यहोवा के महिमा करहीं, जेला मेंह ओ काम बर देय हवंव।”
6 दाऊद ह लेवीमन ला लेवी के बेटा गेरसोन, कहात अऊ मरारी के नांव के मुताबिक अलग-अलग दल म बांट दीस।
गेरसोनीमन
7 गेरसोनीमन के बंसज:
लादान अऊ सिमी।
8 लादान के बेटामन:
पहिलऊठा यहीएल, तब जेताम अऊ फेर योएल—कुल तीन झन।
9 सिमी के बेटामन:
सलोमोत, हजीएल अऊ हारान—कुल तीन झन।
(येमन लादान के परिवारमन के मुखिया रिहिन।)
10 अऊ सिमी के बेटामन:
यहत, जीजा,*पद 11 भी देखव; जादा इबरानी लेखमन म जीना यूस अऊ बरीया।
येमन सिमी के बेटा रिहिन—कुल चार झन।
11 (यहत पहिलऊठा रिहिस, अऊ जीजा ह दूसरा, पर यूस अऊ बरीया के जादा बेटा नइं रिहिन: एकरसेति येमन ला एक भाग के संग एक परिवार के रूप म गने गीस।)
कहातीमन
12 कहात के बेटामन:
अमराम, ईसहार, हेबरोन अऊ उजीएल—कुल चार झन।
13 अमराम के बेटामन:
हारून अऊ मूसा।
हारून ला अलग करे गीस, ओला अऊ ओकर संतानमन ला हमेसा बर, ताकि ओमन परम पबितर चीजमन ला पबितर ठहिरांय, यहोवा के आघू म बलिदान चघावंय, ओकर आघू म सेवा करंय अऊ ओकर नांव म हमेसा आसीस देवंय। 14 परमेसर के जन मूसा के बेटामन ला लेवी बंस के एक भाग के रूप म गने गीस।
15 मूसा के बेटामन:
गेरसोम अऊ एलिएजेर।
16 गेरसोम के संतान:
सूबाएल ह पहिलऊठा रिहिस।
17 एलिएजेर के संतान:
रहबियाह ह पहिलऊठा रिहिस।
(एलिएजेर के अऊ कोनो बेटा नइं रिहिन, पर रहबियाह के बहुंत बेटा रिहिन।)
18 ईसहार के बेटामन:
सलोमीत ह पहिलऊठा रिहिस।
19 हेबरोन के बेटामन:
यरियाह ह पहिलऊठा, अमरयाह ह दूसरा,
यहजीएल ह तीसरा अऊ यकमाम ह चौथा।
20 उजीएल के बेटामन:
मीका ह पहिलऊठा अऊ यिसियाह ह दूसरा।
मरारीमन
21 मरारी के बेटामन:
महली अऊ मूसी।
महली के बेटामन:
एलिआजर अऊ कीस।
22 (एलिआजर के मिरतू बिगर कोनो बेटा के हो गीस: ओकर सिरिप बेटीमन रिहिन। कीस के बेटामन याने कि ओमन के चचेरा-भाईमन ओमन ले बिहाव कर लीन।)
23 मूसी के बेटामन:
महली, एदेर अऊ यरीमोत—कुल तीन झन रिहिन।
24 येमन ओमन के परिवार के मुताबिक लेवी के संतान रिहिन—परिवार के मुखियामन के नांव लिखे गीस अऊ ओमन ला एक-एक करके गने गीस, याने कि ओ काम करइयामन, जेमन बीस साल या बीस साल ले जादा उमर के रिहिन अऊ यहोवा के मंदिर म सेवा करत रिहिन। 25 काबरकि दाऊद ह कहे रिहिस, “जब यहोवा, इसरायल के परमेसर ह अपन मनखेमन ला अराम दे हवय अऊ यरूसलेम म हमेसा रहे बर आय हवय, 26 त लेवीमन ला पबितर-तम्बू या येकर सेवा म उपयोग होवइया कोनो चीज ला अऊ ले जाय के जरूरत नइं ए।” 27 दाऊद के पिछला निरदेस के मुताबिक बीस साल या बीस साल के ऊपर के लेवीमन के गनती करे गीस।
28 लेवीमन के काम ह यहोवा के मंदिर के सेवा म हारून के संतानमन के मदद करई रिहिस: याने कि अंगनामन के देखरेख करई, बाजू के कमरामन के देखरेख करई, जम्मो पबितर चीजमन के सुध करई अऊ परमेसर के घर म आने किसम के काम करई। 29 ओमन मेज म सजे रोटी, अन्न-बलिदान बर बिसेस पीसान, बिगर खमीर के बनाय पातर रोटी, रोटी के सेंकई अऊ पीसान के मिलई, अऊ जम्मो चीजमन के मात्रा अऊ आकार के नाप-तौल के देखरेख करंय। 30 ओमन ला यहोवा के धनबाद अऊ इस्तुति करे बर हर बिहनियां ठाढ़ होना घलो पड़य। ओमन सांझ के बेरा घलो वइसने करंय 31 अऊ जब भी बिसराम दिन, नवां चंदा के तिहार अऊ ठहिराय तिहारमन म यहोवा ला होम-बलिदान चघाय जावय, ओमन वइसने ही करंय। ओमन सही संखिया म होके लगातार यहोवा के आघू म सेवा करंय अऊ ओमन येला ओमन बर ठहिराय गे नियम के मुताबिक करंय।
32 अऊ ये किसम ले लेवीमन मिलापवाला तम्बू बर, पबितर स्थान बर यहोवा के मंदिर के सेवा म अपन रिस्तेदार हारून के संतानमन के अधीन अपन जिम्मेदारी ला पूरा करंय।