26
दुवारपालमन
1 दुवारपालमन के दल येमन रिहिन:
कोरहीमन ले:
कोरे के बेटा मसेलेमियाह, जऊन ह आसाप के संतानमन ले एक झन रिहिस। 2 मसेलेमियाह के बेटामन:
पहिलऊठा बेटा जकरयाह, दूसरा यदीएल,
तीसरा जबदयाह, चौथा यतनिएल,
3 पांचवां एलाम, छठवां यहोहानान
अऊ सातवां एलिहोएनै।
4 ओबेद-एदोम के घलो बेटामन रिहिन:
पहिलऊठा बेटा समायाह, दूसरा यहोजाबाद,
तीसरा योआह, चौथा साकार
पांचवां नतनेल, 5 छठवां अमीएल,
सातवां इस्साकार अऊ आठवां पुलेताई।
(काबरकि परमेसर ह ओबेद-एदोम ला आसीस दे रिहिस।)
6 ओबेद-एदोम के बेटा समायाह के घलो बेटामन रिहिन, जऊन मन अपन ददा के परिवार म अगुवा रिहिन, काबरकि ओमन बहुंत योग्य आदमी रिहिन। 7 समायाह के बेटामन:
ओतनी, रपाएल, ओबेद अऊ एलजाबाद;
ओकर रिस्तेदार एलीहू अऊ समाकियाह घलो योग्य आदमी रिहिन।
8 ये जम्मो झन ओबेद-एदोम के संतान रिहिन; ओमन अऊ ओकर बेटामन अऊ ओमन के रिस्तेदारमन योग्य मनखे रिहिन अऊ ओमन म कोनो भी काम करे के ताकत रिहिस—ओबेद-एदोम के संतानमन के कुल संखिया 62 रिहिस।
9 मसेलेमियाह के बेटा अऊ रिस्तेदारमन रिहिन, जऊन मन योग्य आदमी रिहिन—येमन कुल 18 झन रिहिन।
10 मरारी के बंस के होसा के बेटामन:
पहिलऊठा बेटा सिमरी (हालाकि ओह पहिलऊठा नइं रिहिस, पर ओकर ददा ह ओला पहिलऊठा ठहिराय रिहिस),
11 दूसरा हिलकियाह, तीसरा तबलियाह
अऊ चौथा जकरयाह।
होसा के बेटा अऊ रिस्तेदारमन के कुल संखिया 13 रिहिस।
12 ये दुवारपालमन के ये दलमन ला ओमन के रिस्तेदारमन के सहीं ओमन के अगुवामन के जरिये यहोवा के मंदिर म सेवा के जबाबदारी दिये जावत रिहिस। 13 ओमन के परिवार के मुताबिक हर एक दुवार बर चिट्ठी निकाले गीस, जवान अऊ सियान जम्मो बर एक समान।
14 पूरब के दुवार के चिट्ठी सेलेमियाह*सेलेमियाह ह मसेलेमियाह के आने नांव ए के नांव निकलिस।
तब ओकर बेटा जकरयाह बर चिट्ठी निकाले गीस, जऊन ह एक बुद्धिमान सलाहकार रिहिस, अऊ ओकर नांव म उत्तर के दुवार के चिट्ठी निकलिस।
15 दक्खिन के दुवार के चिट्ठी ओबेद-एदोम के नांव निकलिस, अऊ भंडारघर के चिट्ठी ओकर बेटामन के नांव म आईस।
16 पछिम के दुवार अऊ ऊपर के सड़क म सलेकेत दुवार के चिट्ठी सुप्पीम अऊ होसा के नांव निकलिस।
पहरेदार ह पहरेदार के संग रहय:
17 पूरब म हर दिन छै लेवी रहंय,
उत्तर म हर दिन चार झन,
दक्खिन म हर दिन चार झन
अऊ भंडारघर म एक समय म दू झन।
18 पछिम कोति के अंगना बर चार झन सड़क म अऊ अंगना म ही दू झन रहंय।
19 ये दुवारपालमन के दल रिहिन, जऊन मन कोरह अऊ मरारी के संतान रिहिन।
खजांची अऊ आने अधिकारीमन
20 ओमन के संगी लेवीमन के ऊपर परमेसर के घर के खजाना अऊ चघाय गे चीजमन के खजाना के जिम्मेदारी रिहिस।
21 लादान के संतान, जऊन मन लादान के जरिये गेरसोनी रिहिन अऊ जऊन मन गेरसोनी लादान के परिवारमन के मुखिया रिहिन, ओमन ये रिहिन—यहीएली, 22 यहीएली के बेटा जेताम अऊ ओकर भाई योएल। येमन यहोवा के मंदिर के खजाना के अधिकारी रिहिन।
23 अमरामी, ईसहारी, हेबरोनी अऊ उजीएलीमन ले:
24 मूसा के बेटा गेरसोम के एक संतान सूबाएल ह खजाना के मुखिया अधिकारी रिहिस। 25 ओकर रिस्तेदार एलिएजेर के जरिये: ओकर बेटा रहबियाह, रहबियाह के बेटा येसायाह, येसायाह के बेटा योराम, योराम के बेटा जिकरी अऊ जिकरी के बेटा सलोमीत रिहिस।
26 (राजा दाऊद अऊ परिवारमन के मुखिया, जऊन मन हजार-हजार मनखे ऊपर सेनापति अऊ सौ-सौ मनखे ऊपर सेनापति रिहिन, अऊ सेना के आने सेनापति जऊन चीजमन ला चघाय रिहिन, ओ जम्मो चीज के खजाना के जिम्मेदारी सलोमीत अऊ ओकर रिस्तेदारमन के ऊपर रिहिस। 27 लड़ई म लूटे गे कुछू चीजमन ला घलो ओमन यहोवा के मंदिर के सुधार के काम बर चघाय रिहिन। 28 अऊ समूएल अगम-दरसी के दुवारा अऊ कीस के बेटा साऊल के दुवारा, नेर के बेटा अबनेर अऊ सरूयाह के बेटा योआब के दुवारा चघाय गे चीजमन, अऊ मंदिर के उपयोग बर चघाय गे आने जम्मो चीजमन के देखरेख के जिम्मेदारी सलोमीत अऊ ओकर रिस्तेदारमन के ऊपर रिहिस।)
29 ईसहारीमन ले:
कननियाह अऊ ओकर बेटामन ला मंदिर के बाहिर इसरायल देस के ऊपर अधिकारी अऊ नियायधीस के काम करे बर ठहिराय गे रिहिस।
30 हेबरोनीमन ले:
हसबियाह अऊ ओकर रिस्तेदार, जऊन मन सतरह सौ योग्य आदमी रिहिन, ओमन इसरायल म यरदन नदी के पछिम कोति यहोवा के जम्मो काम अऊ राजा के सेवा बर जिम्मेदार रिहिन। 31 हेबरोनीमन बर, ओमन के परिवारमन के बंसावली के मुताबिक यरियाह ह ओमन के मुखिया रिहिस।
(दाऊद के राज के चालीसवां साल म अभिलेखमन म खोजे गीस, अऊ गिलाद के याजेर नगर म हेबरोनीमन के बीच योग्य आदमीमन पाय गीन। 32 यरियाह के सत्ताईस सौ रिस्तेदार रिहिन, जऊन मन योग्य आदमी रिहिन अऊ परिवारमन के मुखिया रिहिन, दाऊद राजा ह ओमन ला रूबेनी, गादी अऊ मनस्से के आधा बंस के ऊपर परमेसर ले संबंधित जम्मो काम बर अऊ राजा ले संबंधित काम बर अधिकारी ठहिराईस।)