1 जब दाऊद के मरे के बेरा ह लकठा म आईस, त ओह अपन बेटा सुलेमान ला ये कहिके अधिकार दीस:

2 “मेंह जम्मो संसार के रीति के मुताबिक जवइया हंव, एकरसेति तेंह मजबूत होके एक मनखे के सहीं काम कर, 3 अऊ जऊन कुछू यहोवा तोर परमेसर चाहथे, ओला मान: ओकर ईछा के मुताबिक चल, अऊ जइसने मूसा के कानून म लिखे हवय वइसने ही ओकर रीति-बिधि अऊ हुकूम, ओकर कानून अऊ नियममन ला मान। तेंह ये जम्मो ला माने कर, ताकि तोर हर काम अऊ तोला हर जगह म सफलता मिलय 4 अऊ यहोवा ह मोर ले करे ये वायदा ला पूरा करय: ‘यदि तोर संतानमन अपन चालचलन ला सही रखहीं, अऊ यदि ओमन अपन पूरा मन अऊ परान के संग म मोर आघू म सच्चई म चलहीं, त इसरायल के सिंघासन म बईठे बर तोर खानदान म उत्तराधिकारी के कभू कमी नइं होही।’

5 “तेंह खुद जानत हस कि सरूयाह के बेटा योआब ह मोर संग का करिस—याने कि नेर के बेटा अबनेर अऊ येतेर के बेटा अमासा, इसरायल के ये दूनों सेनापतिमन के संग ओह का करिस। ओह ओमन ला मार डारिस, अऊ सांति के समय म लड़ई के बेरा सहीं खून बहाईस अऊ ओ खून ले अपन कनिहां के कमरबंध अऊ अपन गोड़ के पनहीमन म दाग लगाईस। 6 अपन बुद्धि के मुताबिक ओकर संग बरताव कर, पर ओ पक्का चुंदीवाला ला सांति से मरन झन देबे।

7 “पर गिलाद के बरजिलै के बेटामन ऊपर दया करबे अऊ ओमन तोर मेज म खाना खवइया होवंय, काबरकि जब मेंह तोर भाई अबसालोम ले भागत रहेंव, त ओमन मोर साथ दे रिहिन।

8 “अऊ सुन, तोर संग बहूरीम के बिनयामीनी गेरा के बेटा सिमी हवय, जऊन ह मोला ओ दिन कठोर सराप देय रिहिस जब मेंह महनैम ला जावत रहेंव। पर जब ओह मोर ले भेंट करे बर यरदन मेर आईस, त मेंह ओकर ले यहोवा के किरिया खाके कहे रहेंव: ‘मेंह तोला तलवार ले नइं मारंव।’ 9 पर अब तेंह ओला निरदोस झन ठहिराबे। तेंह एक बुद्धिमान मनखे अस; तोला पता होही कि ओकर संग का करना हे। ओ पक्का चुंदीवाला के खून बहाके ओला मार डारबे।”

10 तब दाऊद ह अपन पुरखामन के संग सुत गीस अऊ ओला दाऊद के सहर म माटी दिये गीस। 11 ओह इसरायल ऊपर चालीस साल तक राज करिस—सात साल हेबरोन सहर म अऊ तैंतीस साल यरूसलेम सहर म। 12 तब सुलेमान ह अपन ददा दाऊद के सिंघासन म बईठिस, अऊ ओकर राज ह मजबूत होवत गीस।

13 तब हगीत के बेटा अदोनियाह ह सुलेमान के दाई बतसेबा करा गीस। बतसेबा ह ओकर ले पुछिस, “का तेंह मितानभाव ले आय हस?”

ओह जबाब दीस, “हव, मितानभाव ले!” 14 फेर ओह कहिस, “मोला तोर से कुछू कहना हे।”

बतसेबा ह कहिस, “तेंह कह सकत हस!”

15 त ओह कहिस, “जइसे कि तेंह जानत हस कि राज ह मोर हो गे रिहिस। जम्मो इसरायल ह मोला अपन राजा के रूप म देखत रिहिस। पर चीजमन बदल गीन, अऊ अब राज ह मोर भाई के हो गे हवय, काबरकि येह यहोवा कोति ले ओला मिले हवय। 16 एकरसेति अब मेंह तोर ले एक बिनती करत हंव। मोला इनकार झन करबे।”

बतसेबा ह कहिस, “अपन बिनती ला बता।”

17 ओह कहिस, “राजा सुलेमान ह तोर बात ला नइं काटही—एकरसेति ओकर ले पुछ कि ओह मोला सुनेमिन अबीसग ला मोर घरवाली के रूप म देवय।”

18 बतसेबा ह कहिस, “बने बात ए, मेंह तोर बर राजा ले बात करहूं।”

19 जब बतसेबा ह अदोनियाह के बारे म राजा सुलेमान करा गोठियाय बर गीस, त राजा ह ओकर ले भेंट करे बर उठिस, अऊ झुकके ओला दंडवत करिस अऊ तब ओह अपन सिंघासन म बईठ गीस। राजा ह अपन दाई बर घलो एक सिंघासन रखवा दीस, अऊ ओकर दाई ह ओकर जेवनी हांथ कोति बईठ गीस।

20 तब राजा के दाई ह कहिस, “मेंह तोर ले एक छोटे बिनती करे चाहत हंव, मोला इनकार झन करबे।”

राजा ह कहिस, “हे मोर दाई, का बिनती करे चाहत हस? मेंह तोला इनकार नइं करंव।”

21 ओह कहिस, “सुनेमिन अबीसग ह तोर भाई अदोनियाह ला बिहाव म दिये जावय।”

22 राजा सुलेमान ह अपन दाई ला जबाब दीस, “तेंह अदोनियाह बर सुनेमिन अबीसग ला ही काबर मांगत हस? तेंह ओकर बर राज ला घलो मांग सकत हस, काबरकि ओह तो मोर बड़े भाई अय—हव, सिरिप ओकर बर ही काबर! अबियातार पुरोहित अऊ सरूयाह के बेटा योआब बर घलो मांग!”

23 तब राजा सुलेमान ह यहोवा के कसम खाके कहिस: “यदि अदोनियाह ह ये बिनती बर मार डारे नइं जावय, त परमेसर ह मोर ले बहुंत कठोरता से बरताव करय! 24 अऊ अब यहोवा के जिनगी के कसम—जऊन ह मोला मोर ददा दाऊद के सिंघासन म बने करके स्थापित करे हवय अऊ अपन वायदा के मुताबिक मोर बर एक राजबंस कायम करे हवय—आज ही अदोनियाह ह मार डारे जाही।” 25 एकरसेति राजा सुलेमान ह यहोयादा के बेटा बनायाह ला हुकूम दीस अऊ ओह गीस अऊ अदोनियाह ऊपर घात करके ओला मार डारिस।

26 अबियातार पुरोहित ला राजा ह कहिस, “अनातोत नगर म अपन भुइयां म जा। तेंह मार डारे जाय के लईक अस, पर मेंह तोला अभी नइं मारंव, काबरकि तें मोर ददा दाऊद के आघू म परमपरधान यहोवा के सन्दूक ला उठाय करत रहय अऊ मोर ददा के जम्मो दुख म तेंह ओकर संग रहय।” 27 सुलेमान ह अबियातार ला पुरोहित पद ले उतार दीस, ये किसम ले जऊन बचन यहोवा ह एली के बंस के बारे म सीलो म कहे रिहिस, ओह पूरा होईस।

28 जब ये खबर योआब करा हबरिस, जऊन ह अबसालोम के संग तो नइं, पर अदोनियाह के संग साजिस रचे रिहिस, तब ओह यहोवा के तम्बू म भाग के गीस अऊ बेदी के सींगमन ला धर लीस। 29 राजा सुलेमान ला बताय गीस कि योआब ह यहोवा के तम्बू म भाग गे हवय अऊ बेदी के बाजू म हवय। तब सुलेमान ह यहोयादा के बेटा बनायाह ला हुकूम दीस, “जा अऊ ओला मार डार!”

30 तब बनायाह ह यहोवा के तम्बू भीतर गीस अऊ योआब ला कहिस, “राजा के हुकूम अय कि बाहिर निकल आ!”

पर ओह जबाब दीस, “नइं, मेंह इहां मरहूं।”

बनायाह ह ये बात के सूचना राजा ला दीस, “योआब ह मोला अइसने जबाब दे हवय।”

31 तब राजा ह बनायाह ला हुकूम दीस, “ओकर कहे के मुताबिक ओला मार डार। ओला मारके माटी देय दे, अऊ अइसने करके योआब के दुवारा बहाय निरदोसमन के खून के दोस ले मोला अऊ मोर जम्मो परिवार ला बरी कर। 32 जऊन खून, ओह बहाय रिहिस, यहोवा ह ओकर बदला लीही, काबरकि मोर ददा दाऊद के बिगर जाने, ओह दू झन मनखे ऊपर हमला करिस अऊ ओमन ला तलवार ले मार डारिस। ओ दूनों मनखे—नेर के बेटा अबनेर, इसरायल के सेना के सेनापति, अऊ येतेर के बेटा अमासा यहूदा के सेना के सेनापति रिहिन। ये दूनों झन योआब ले जादा बने अऊ धरमी मनखे रिहिन। 33 येमन के खून के दोस ह योआब अऊ ओकर संतान के मुड़ म सदाकाल तक बने रहय। पर दाऊद अऊ ओकर संतान, ओकर घर अऊ ओकर सिंघासन ऊपर यहोवा के सांति सदाकाल तक बने रहय।”

34 एकरसेति यहोयादा के बेटा बनायाह ह जाके योआब ला मार डारिस, अऊ ओला देहात इलाका म ओकर घर म माटी दिये गीस। 35 तब राजा सुलेमान ह योआब के जगह म यहोयादा के बेटा बनायाह ला सेना के सेनापति ठहिराईस अऊ अबियातार के जगह म सादोक पुरोहित ला ठहिराईस।

36 तब राजा ह सिमी ला बुलवाईस अऊ ओला कहिस, “तें यरूसलेम म अपन बर एक घर बना अऊ उहां रह, पर उहां ले बाहिर कोनो अऊ जगह ला झन जाबे। 37 तें ये बात ला पक्का जान ले कि जऊन दिन तेंह निकलके किदरोन घाटी के ओ पार जाबे, त ओहीच दिन, तेंह जरूर मार डारे जाबे; तोर खून के दोस तोरेच मुड़ ऊपर होही।”

38 सिमी ह राजा ला जबाब दीस, “तेंह बने बात कहे हस। जइसने मोर मालिक, राजा ह कहे हवय, तोर सेवक ह वइसने ही करही।” अऊ सिमी ह बहुंत समय तक यरूसलेम म रिहिस।

39 पर तीन साल के बाद, सिमी के दू झन गुलाम माका के बेटा आकीस करा भाग गीन, जऊन ह गत नगर के राजा रिहिस, अऊ सिमी ला ये बात बताय गीस, “तोर गुलाममन गत म हवंय।” 40 ये सुनके सिमी ह अपन गदहा ऊपर काठी कसिस अऊ अपन गुलाममन ला खोजे बर गत म आकीस करा गीस। ये किसम ले सिमी ह निकलके गीस अऊ अपन गुलाममन ला गत ले वापिस ले आईस।

41 जब सुलेमान ला बताय गीस कि सिमी ह यरूसलेम ले गत गे रिहिस अऊ फेर वापिस आ गे हवय, 42 त ओह सिमी ला बुलवाईस अऊ ओला कहिस, “का मेंह तोला यहोवा के कसम खवाके ये चेतउनी नइं दे रहेंव, ‘तें ये बात पक्का जान ले कि जऊन दिन तेंह निकलके कोनो अऊ जगह ला जाबे, त तेंह जरूर मार डारे जाबे’? अऊ ओ समय तेंह मोला कहे रहय, ‘तेंह बने बात कहे हस। मेंह येला मानहूं।’ 43 त फेर तेंह यहोवा के खाय कसम ला काबर टोरय अऊ मोर दिये हुकूम ला नइं मानय?”

44 राजा ह सिमी ला ये घलो कहिस, “तेंह खुद अपन मन म ओ जम्मो गलत काम ला जानत हस, जऊन ला तेंह मोर ददा दाऊद के बिरूध करे हवस। अब यहोवा ह तोर गलत काम के बदला तोर ले लीही। 45 पर राजा सुलेमान ह आसीस पाही, अऊ दाऊद के सिंघासन ह यहोवा के आघू म सदा मजबूत बने रहिही।”

46 तब राजा ह यहोयादा के बेटा बनायाह ला हुकूम दीस, अऊ ओह बाहिर म जाके सिमी ला अइसने मारिस कि ओह मर गीस।

ये किसम ले सुलेमान के हांथ म राज ह स्थापित होईस।